Kɔ emu nsɛm afã hɔ

Kɔ emu nsɛm afã hɔ

So Wunim?

So Wunim?

 So Wunim?

Efesofo 2:11-15 no, so na ɔsomafo Paulo reka ɔfasu ankasa ho asɛm bere a ɔkaa ɔfasu a na etwa Yudafo ne Amanaman mufo ntam ho asɛm no?

Ɔsomafo Paulo maa nsonsonoe a ɛda Israelfo ne “ananafo” ntam no daa adi wɔ krataa a ɔkyerɛw kɔmaa Efesofo no mu. Ɔkae sɛ na “ɔfasu” bi ‘atwa’ nnipakuw abien no ntam. (Efesofo 2:11-15) Ná Paulo reka “Mmara nsɛm a ahyɛde ahorow wom no” a wɔnam Mose so de mae no ho asɛm. Nanso ebia asɛmfua “ɔfasu” a ɔde dii dwuma no maa akenkanfo no kaee ɔfasu bi a wɔde abo ato a na ɛwɔ hɔ no.

Wɔ afeha a edi kan no mu no, na abangua pii wɔ Yehowa asɔrefie a ɛwɔ Yerusalem no mu a na nnipa bi nkutoo na wotumi kɔ hɔ. Ná obiara betumi akɔ Amanaman mufo Abangua no mu, nanso na Yudafo ne wɔn a wɔasakra abɛyɛ Yudafo no nkutoo na na wotumi kɔ abangua ahorow a ɛwɔ asɔrefie hɔ no mu. Ná ɔfasu kɛse bi a wɔde abo ato a wɔkyerɛ sɛ ne tenten bɛyɛ anammɔn anan, a wɔfrɛ no Soreg, atwa baabi a nkurɔfo bi nkutoo na wotumi kɔ hɔ, ne baabi a obiara tumi kɔ hɔ no ntam. Sɛnea afeha a edi kan Yudani abakɔsɛm kyerɛwfo Flavius Josephus kyerɛ no, na wɔde Hela ne Latin kasa akyerɛw asɛm bi abɔ ɔfasu no ho, a na ɛbɔ Amanaman mufo no kɔkɔ sɛ ɛnsɛ sɛ wɔtra kɔ kronkronbea hɔ.

Wɔahu Hela nkyerɛwee a ɛwɔ ɔfasu a na atwa asɔrefie abangua no ntam ho no biako a emu nsɛm no nyinaa wom. Ɛkenkan sɛ: “Ɛnsɛ sɛ ɔnanani biara kɔ abangua no ne baabi a wɔagye ho wɔ asɔrefie hɔ no mu. Obiara a wobehu no wɔ hɔ no, obewu.”

Ɛda adi sɛ Soreg a na egyina hɔ ma Mose Mmara apam a na atetew Yudafo ne Amanaman mufo ntam mfe pii no ho asɛm na na Paulo reka. Yesu afɔrebɔ wu no yii Mmara apam no fii hɔ, ma enti ‘ɛsɛee ɔfasu a na atwa wɔn ntam no.’

Dɛn nti na Bible taa ka Israel mmusuakuw 12 ho asɛm bere a mmusuakuw no yɛ 13 ankasa?

Israel mmusuakuw no yɛ Yakob a wɔsesaa ne din yɛɛ no Israel no mmabarima no asefo. Ná Yakob wɔ mmabarima 12—Ruben, Simeon, Lewi, Yuda, Dan, Naftali, Gad, Aser, Isakar, Sebulon, Yosef, ne Benyamin. (Genesis 29:32–30:24; 35:16-18) Wɔde nuabarimanom dubiako yi din too mmusuakuw no so, nanso wɔamfa Yosef din anto abusuakuw biara so. Mmom no, wɔde ne mmabarima Efraim ne Manase din na ɛtoo mmusuakuw abien no so ma wɔn mu biara bɛyɛɛ abusuakuw no ti. Enti Israel bɛyɛɛ mmusuakuw 13. Ɛnde, dɛn nti na Bible taa ka mmusuakuw 12 ho asɛm?

Wɔ Israelfo mu no, wɔpaw Lewi abusuakuw no mu mmarima sɛ wɔnsom wɔ Yehowa ntamadan no mu, na akyiri yi wɔsomee wɔ asɔrefie hɔ. Ne saa nti, na wɔnkɔ asraadi. Yehowa ka kyerɛɛ Mose sɛ: “Lewi abusuakuw no nko de, nkan wɔn, nanso mmu wɔn dodow ano mfra Israelfo, na wo ara, fa Lewi mma no sisi adanse trabea no ne ɛho nneɛma nyinaa ne ade biara a ɛka ho no so.”—Numeri 1:49, 50.

Afei nso, Lewifo no annya asase biara wɔ Bɔhyɛ Asase no so. Mmom no, wɔma wɔtratraa nkurow 48 mu wɔ Israel asase so nyinaa.—Numeri 18:20-24; Yosua 21:41.

Nneɛma abien yi nti, na wɔntaa mmɔ Lewi abusuakuw no din nka mmusuakuw a aka no ho. Ɛno nti, wɔtaa ka sɛ Israel mmusuakuw no dodow yɛ 12.—Numeri 1:1-15.

[Mfonini Fibea wɔ kratafa 21]

Archaeological Museum of Istanbul