Kɔ emu nsɛm afã hɔ

Kɔ emu nsɛm afã hɔ

ADESUA ASƐM 21

DWOM 107 Ɔdɔ Ho Nhwɛso

Wobɛyɛ Dɛn Anya Obi Aware No?

Wobɛyɛ Dɛn Anya Obi Aware No?

“Ɔyere pa, hena na obenya? Ne bo yɛ den sen ɛpo mu abohene koraa.”MMEB. 31:10.

NEA ADESUA YI BƐKA HO ASƐM

Yɛbɛhwɛ Bible nnyinasosɛm a ɛbɛboa obi ama wanya obi a ɔfata aware no. Afei nso, yebehu sɛnea asafo no mufo betumi aboa asigyafo.

1-2. (a) Sɛ Kristoni bi pɛ sɛ ɔyɛ aware nhyehyɛe a, dɛn na ɛsɛ sɛ ɔhwɛ ansa? (b) Yɛka sɛ obi ayɛ “aware nhyehyɛe” a, ɛkyerɛ sɛn? (Hwɛ “Asɛm Bi Mu Nkyerɛkyerɛmu” no.)

 WOPƐ sɛ woware anaa? Ɛwom, enhia sɛ obi ware ansa na n’ani agye, nanso Kristofo asigyafo bebree hwɛ kwan sɛ daakye wɔbɛware. Ansa na wobɛyɛ aware nhyehyɛe no, ɛsɛ sɛ wohwɛ hu sɛ wo bɔtɔ mu ye, wo ne Yehowa ntam yɛ kama, na wunim wo ho yiye. a (1 Kor. 7:36) Woyɛ saa a, w’aware betumi akɔ yiye.

2 Nanso, ɛnyɛ bere nyinaa na ɛyɛ mmerɛw sɛ wubenya obi a ɔfata aware no. (Mmeb. 31:10) Na sɛ wunya obi a wopɛ sɛ wuhu no yiye mpo a, ebia ɛrenyɛ mmerɛw sɛ wode bɛto n’anim sɛ wopɛ sɛ wo ne no yɛ aware nhyehyɛe. b Adesua yi mu no, yɛbɛhwɛ nea ebetumi aboa Kristofo asigyafo ama wɔanya obi a ɔfata a wɔbetumi ne no ayɛ aware nhyehyɛe. Afei nso, yɛbɛhwɛ nea asafo no mufo betumi ayɛ de aboa wɔn a wɔpɛ sɛ wɔware no.

WOBƐYƐ DƐN ANYA OBI A ƆFATA AWARE NO?

3. Sɛ Kristoni sigyani repɛ obi aware no a, dɛn na ɛsɛ sɛ ɔhwɛ?

3 Sɛ wopɛ sɛ woware a, ɛho hia paa sɛ wuhu nea wopɛ ansa na wo ne obi afi ase ayɛ nhyehyɛe. Sɛ woanyɛ saa a, anhwɛ a, obi a ɔfata wo no, wubetwa no agyaw anaa anhwɛ a obi a ɔmfata wo mmom na wo ne no bɛyɛ aware nhyehyɛe. Wunim dedaw sɛ, obi a wopɛ sɛ woware no no, ɛsɛ sɛ ɔyɛ Kristoni a wabɔ asu. (1 Kor. 7:39) Nanso ɛnyɛ obiara a wabɔ asu na woware no a ɛbɛkɔ yiye. Enti wubetumi abisa wo ho sɛ: ‘Dɛn na esi m’ani so? Obi a mepɛ sɛ meware no no, suban pa bɛn na mepɛ sɛ mihu wɔ ne ho? Nea mepɛ no, ntease wom anaa?’

4. Ɛdɛn na ebinom abɔ ho mpae?

4 Sɛ worepɛ obi aware no a, yegye di sɛ woabɔ ho mpae. (Filip. 4:6) Nea ɛwom ne sɛ, Yehowa nhyɛɛ obiara bɔ sɛ ɔbɛma no obi aware no. Nanso odwen wo ho, na onim sɛnea wote nka, na obetumi aboa wo ma woanya obi aware no. Enti nea wopɛ ne sɛnea wote nka no, kɔ so ara ka ho asɛm kyerɛ no. (Dw. 62:8) Bɔ mpae sɛ ɔmma wo abotare ne nyansa. (Yak. 1:5) John c yɛ onua sigyani bi a ofi United States. Sɛ ɔrebɔ mpae a, nea ɔka ho asɛm no bi ni: “Ɔbea a mɛware no no, suban pa a mepɛ sɛ ɔda no adi no, ɛyɛ a meka ho asɛm kyerɛ Yehowa. Mebɔ mpae sɛ, ommue hokwan mma minhyia obi a metumi aware no. Afei nso, mebɔ mpae sɛ ɔmmoa me mma minnya su a ɛbɛma mayɛ okunu pa.” Onuawa bi a ofi Sri Lanka a ne din de Tanya ka sɛ: “Bere a merehwehwɛ obi a metumi aware no yi, mebɔ mpae srɛ Yehowa sɛ ɔmmoa me mma menkɔ so nsom no, na m’ani nnye.” Sɛ ɛsɛ sɛ wotwɛn kyɛ ansa na woanya obi aware no mpo a, Yehowa ahyɛ bɔ sɛ ɔbɛkɔ so ama wo nsa aka nea wuhia na wahyɛ wo den.—Dw. 55:22.

5. Dɛn na Kristoni sigyani betumi ayɛ na ama watumi ahyia obi a ɔdɔ Yehowa? (1 Korintofo 15:58) (Hwɛ mfoni no nso.)

5 Bible hyɛ yɛn nkuran sɛ ‘yɛnyɛ pii wɔ Awurade adwuma no mu.’ (Kenkan 1 Korintofo 15:58.) Sɛ woyere wo ho wɔ Yehowa som mu na wo ne anuanom ahorow ahorow bɔ a, ɛbɛhyɛ wo nkuran. Afei nso, ɛbɛma woahyia asigyafo a wɔte sɛ wo ara a wɔn nso de Yehowa som asi wɔn ani so. Bio nso, bere a woreyɛ nea wubetumi nyinaa sɛ wobɛsɔ Yehowa ani no, w’ani begye paa.

Sɛ woyere wo ho wɔ Yehowa som mu na wo ne anuanom ahorow ahorow bɔ a, ebia wubehyia asigyafo a wɔn nso pɛ sɛ wɔware (Hwɛ nkyekyɛm 5)


6. Sɛ Kristoni sigyani repɛ obi aware no a, dɛn na ɛsɛ sɛ ɔkae?

6 Hwɛ yiye na okunu anaa ɔyere a worehwehwɛ no annye w’adwene ammɔ so. (Filip. 1:10) Koma mu anigye de, ɛnyɛ aware anaa sigyadi na ɛde ba, mmom egyina wo ne Yehowa ayɔnkofa so. (Mat. 5:3) Afei nso, bere a wonwaree yi, wubetumi anya kwan atrɛw wo som adwuma mu. (1 Kor. 7:​32, 33) Fa saa bere no di dwuma yiye. Jessica yɛ onuawa bi a ɔte United States. Ɔwaree no, na wadi mfe 40 ara ne sa. Ɔkaa sɛ, “Ɛwom sɛ na mepɛ sɛ meware, nanso mamfa asɛnka adwuma no anni agorɔ koraa. Wei boaa me maa me koma tɔɔ me yam.”

GYE BERE FA HU NIPA NO YIYE

7. Sɛ w’ani gye obi ho a, adɛn nti na eye paa sɛ wugye bere de hu no yiye ansa na wode ato n’anim? (Mmebusɛm 13:16)

7 Sɛ wuhu obi a wubetumi aware no a, dɛn na ɛsɛ sɛ woyɛ? Ɛsɛ sɛ ɛhɔ no ara wode kɔto n’anim anaa? Bible ka sɛ, sɛ onyansafo pɛ sɛ ɔyɛ biribi a, odi kan hwehwɛ nimdeɛ. (Kenkan Mmebusɛm 13:16.) Enti sɛ wuhu obi a w’ani gye ne ho a, ɛsɛ sɛ wode w’ani to fam hu sɛnea ɔte ansa na wode ato n’anim. Aschwin a ofi Netherlands no ka sɛ: “Atenka a yenya ma obi no betumi aba prɛko pɛ, na ebetumi nso atew akɔ prɛko pɛ. Enti sɛ wugye bere hu obi yiye a, atenka a ɛreyɛ ara ni na atew kɔ no, ɛnyɛ ɛno na wubegyina so ne obi ayɛ aware nhyehyɛe.” Afei nso, sɛ woto wo bo ase hu onii no yiye a, ebia wubehu sɛ ɛnyɛ ade a wubetumi aware no.

8. Ɔkwan bɛn so na obi a ɔnwaree betumi de n’ani ato fam ahwɛ obi a ɔpɛ sɛ ɔne no yɛ aware nhyehyɛe? (Hwɛ mfoni no nso.)

8 Sɛ wopɛ sɛ wode w’ani to fam hwɛ obi a wopɛ sɛ wo ne no yɛ aware nhyehyɛe a, wobɛyɛ no sɛn? Sɛ wokɔ adesua anaa muhyiam sɛ moregye mo ani a, ebia wubehu ne suban anaa sɛnea ɔne Yehowa ntam te. Henanom ne ne nnamfo, na dɛn na ɔka ho asɛm? (Luka 6:45) Botae a esi n’ani so no, ɛno ara bi na esi w’ani so anaa? Wubetumi ne n’asafo mu mpanyimfo anaa Kristofo afoforo a wɔn ho akokwaw a wɔnim no yiye adi nkɔmmɔ. (Mmeb. 20:18) Wubetumi abisa wɔn ne suban anaa sɛnea ɔte ho asɛm. (Rut 2:11) Bere a wopɛ sɛ wuhu sɛnea ɔte yiye no, hwɛ na woantaataa no amma wanyɛ basaa.

Sɛ wuhu obi a w’ani gye ne ho a, ɛsɛ sɛ wode w’ani to fam hu sɛnea ɔte ansa na wode ato n’anim (Hwɛ nkyekyɛm 7-8)


9. Ansa na wode bɛto obi anim sɛ wopɛ sɛ wo ne no yɛ aware nhyehyɛe no, dɛn na ɛsɛ sɛ wusi w’adwene pi wɔ ho?

9 Wohwɛ a, ɛsɛ sɛ wode w’ani to fam hwɛ onii no bere tenten sɛn ansa na wode ato n’anim? Sɛ wode kɔto n’anim ntɛm a, anhwɛ a obenya adwene sɛ wo ho pere wo. (Mmeb. 29:20) Nanso sɛ woma ɛkyɛ dodo nso a, anhwɛ a obenya adwene sɛ w’adwene nsi wo pi, ɛnkanka, sɛ onii no ahu sɛ w’ani gye ne ho a. (Ɔsɛnk. 11:4) Kae sɛ, ansa na wode bɛto n’anim no, ɛnsɛ sɛ woyɛ w’adwene sɛ worekɔware no. Nanso, ɛsɛ sɛ wusi w’adwene pi sɛ woayɛ krado sɛ wobɛware, na onii no betumi abɛyɛ wo kunu anaa wo yere.

10. Sɛ wuhu sɛ obi ani gye wo ho nanso wo de w’ani nnye ne ho a, dɛn na ɛsɛ sɛ woyɛ?

10 Na sɛ wuhu sɛ obi ani gye wo ho nso ɛ, dɛn na ɛsɛ sɛ woyɛ? Sɛ w’ani nnye ne ho a, bɔ mmɔden fa wo nneyɛe kyerɛ. Sɛ woma onii no nya adwene sɛ ebetumi ayɛ yiye na ɛnte saa a, wohwɛ a eye?—1 Kor. 10:24; Efe. 4:25.

11. Sɛ wopɛ sɛ woyɛ aware nhyehyɛe ma obi a, dɛn na ɛsɛ sɛ woma ɛtena w’adwenem?

11 Aman bi so no, awofo anaa afoforo a wɔn ani afi na wɔhwehwɛ kunu anaa yere ma wɔn abusuafo a wɔnwaree. Aman foforo so nso, abusuafo anaa nnamfo na wɔhwehwɛ bi ma obi a ɔpɛ sɛ ɔware; sɛ wɔnya bi a, na wɔayɛ nhyehyɛe ama wɔn baanu ahyia ahwɛ sɛ wɔbetumi ayɛ aware nhyehyɛe a. Sɛ obi de to w’anim sɛ pɛ kunu anaa yere ma no a, hwɛ sɛ wubehu nea ɔbea no ne ɔbarima no nyinaa pɛ. Sɛ wunya bi a, bɔ mmɔden hu onii no suban ne sɛnea ɔte yiye. Afei nso, bɔ mmɔden paa sɛ wubehu sɛnea ɔne Yehowa ntam te efisɛ ɛno na ehia paa. Sɛ obi ne Yehowa ayɔnkofa mu yɛ den a, eye koraa sen sɛ ɔyɛ onipa titiriw, ɔwɔ sika anaa wakɔ sukuu adu akyiri. Nanso kae sɛ, awiei koraa no, sɛ ɔbea no ne ɔbarima no bɛware oo, sɛ wɔrenware oo, wɔn ankasa na ɛsɛ sɛ wɔsi saa gyinae no.—Gal. 6:5.

SƐNEA WUBEFI AWARE NHYEHYƐE ASE

12. Sɛ wopɛ sɛ wo ne obi yɛ aware nhyehyɛe a, wobɛyɛ dɛn aka akyerɛ no?

12 Sɛ wopɛ sɛ wo ne obi fi ase yɛ aware nhyehyɛe a, ɔkwan bɛn na wubetumi afa so aka akyerɛ no? d Wubetumi ama wahyia wo wɔ baabi a nnipa behu mo na woaka akyerɛ no, anaa wubetumi afrɛ no fon so de ato n’anim. Ma onhu pefee sɛ w’ani gye ne ho. (1 Kor. 14:9) Sɛ ɛho hia a, ma ɔno nso bere ma ɔmfa nkodwen ho. (Mmeb. 15:28) Sɛ onii no ani nnye ho sɛ ɔne wo bɛyɛ aware nhyehyɛe a, te no ase.

13. Sɛ obi ka kyerɛ wo sɛ n’ani gye wo ho a, dɛn na wubetumi ayɛ? (Kolosefo 4:6)

13 Sɛ obi ka kyerɛ wo sɛ n’ani gye wo ho nso ɛ, dɛn na wobɛyɛ? Ebia na ɛnyɛ mmerɛw mma onii no sɛ ɔbɛba abɛka akyerɛ wo, enti da obu adi kyerɛ no na ma w’anom kasa nyɛ dɛ. (Kenkan Kolosefo 4:6.) Sɛ wopɛ sɛ ɔma wo bere ma wode kodwen ho a, ka kyerɛ no. Nanso mma ɛnnkyɛ ansa na woama no mmuae. (Mmeb. 13:12) Sɛ wompene so a, kyerɛ mu kyerɛ no pefee nanso ma w’anom kasa nyɛ dɛ. Hans yɛ onua bi a ɔwɔ Austria. Bere a onuawa bi ka kyerɛɛ no sɛ n’ani gye ne ho no, yɛnhwɛ nea ɔyɛe. Ɔkaa sɛ: “Mekaa nea ɛwɔ me koma mu kyerɛɛ no pefee a mammu no animtiaa. Mamma ankyɛ koraa efisɛ na mempɛ sɛ obenya adwene sɛ ɛbɛyɛ yiye. Ɛno nti efi saa bere no rekɔ no, mehwɛe sɛ merenyɛ anaa merenka biribiara a ɛbɛma wate nka sɛ gyama masesa m’adwene.” Nanso sɛ w’ani gye ho sɛ wo ne onii no bɛyɛ aware nhyehyɛe a, ɛnde sɛnea mopɛ sɛ nhyehyɛe no kɔ no, monka ho asɛm. Mo amammerɛ anaa nneɛma foforo bi nti, sɛnea mopɛ sɛ nhyehyɛe no kɔ no, ebia ɛbɛsono obiara adwene.

SƐN NA AFOFORO BETUMI ABOA KRISTOFO ASIGYAFO?

14. Yɛbɛyɛ dɛn de yɛn anom kasa ahyɛ Kristofo asigyafo nkuran?

14 Dɛn na yɛn nyinaa betumi ayɛ de ahyɛ Kristofo asigyafo nkuran? Ɔkwan baako a yɛbɛfa so ayɛ saa ne sɛ yɛbɛhwɛ yɛn kasa yiye. (Efe. 4:29) Yebetumi abisa yɛn ho sɛ: ‘Ɛyɛ a midi asigyafo ho fɛw anaa? Sɛ mihu sɛ onua sigyani bi ne onuawa sigyani bi redi nkɔmmɔ a, ɛyɛ a minya adwene sɛ biribi wom anaa?’ (1 Tim. 5:13) Afei nso, ɛnsɛ sɛ yɛma anuanom asigyafo te nka da sɛ esiane sɛ wɔnwaree nti, biribi tɔ sin wɔ wɔn ho. Hans a yɛadi kan aka ne ho asɛm no ka sɛ: “Ɛyɛ a anuanom bi ka sɛ, ‘Adɛn nti na wonware? Wonyɛ abofra.’ Nsɛm a ɛtete saa ma Kristofo a wɔnwaree te nka sɛ anuanom ani nnye sigyadi ho; wei betumi apiapia wɔn sɛ wɔnware.” Sɛ yɛhwehwɛ hokwan a yɛde bɛkamfo anuanom a wɔnwaree a, wunhu sɛ ɛno mmom na ɛbɛboa paa?—1 Tes. 5:11.

15. (a) Sɛ yɛhwɛ nnyinasosɛm a ɛwɔ Romafo 15:2 a, ansa na yɛbɛboa obi ma wanya obi aware no no, dɛn na ɛsɛ sɛ yedi kan susuw ho yiye? (Hwɛ mfoni no nso.) (b) Asuade titiriw bɛn na wunya fii video no mu?

15 Sɛ wuhu sɛ onua bi ne onuawa bi ware a ɛbɛkɔ yiye a, dɛn na ɛsɛ sɛ woyɛ? Bible ka sɛ mma yɛnnyɛ biribi a ɛbɛhaw afoforo. (Kenkan Romafo 15:2.) Kristofo asigyafo pii wɔ hɔ a, wɔmpɛ sɛ obi bɛhwehwɛ kunu anaa yere ama wɔn, na ɛsɛ sɛ yɛte wɔn ase. (2 Tes. 3:11) Ebinom nso pɛ sɛ afoforo boa wɔn, nanso sɛ wɔnkaa sɛ yɛmmoa wɔn a, ɛsɛ sɛ yɛhwɛ yiye. e (Mmeb. 3:27) Asigyafo afoforo nso, ɛyɛ a wɔmpɛ sɛ wɔbɛkɔ no tee. Lydia yɛ onuawa sigyani bi a ofi Germany. Ɔkaa sɛ: “Sɛ woreyɛ nhyehyɛe ama anuanom bebree abehyiam ayɛ biribi a, wubetumi de wɔn aka ho. Nea ehia ara ne sɛ wobɛyɛ biribi ama wɔn baanu no atumi ahyia. Ɛno akyi no, na woagyaw nea aka no ama wɔn.”

Sɛ nnipa pii hyiam a, ebetumi ama anuanom a wɔyɛ asigyafo ahyia (Hwɛ nkyekyɛm 15)


16. Dɛn na ɛsɛ sɛ Kristofo asigyafo kae?

16 Sɛ yɛaware oo, sɛ yɛnwaree oo, yɛn mu biara ani betumi agye, na yɛn koma atɔ yɛn yam! (Dw. 128:1) Enti sɛ wopɛ sɛ woware, na wunnya nnyaa obi a wubetumi aware no a, kɔ so yere wo ho som Yehowa. Onuawa bi a ofi Macao a ne din de Sin Yi ka sɛ: “Bere a wode bedi sigya no, sɛ wode toto bere tenten a wo ne wo kunu anaa wo yere de bɛtena Paradise no ho a, bere a wode bedi sigya no nnu baabiara. Enti bere a woredi sigya yi, ma w’ani nnye na fa saa bere no di dwuma yiye.” Nanso yɛmfa no sɛ woanya obi a wubetumi aware no, na moafi aware nhyehyɛe ase. Sɛ saa a, dɛn na ebetumi aboa wo? Adesua a edi hɔ no, yɛbɛhwɛ sɛnea mo aware nhyehyɛe no betumi akɔ yiye.

DWOM 137 Tete Mmea Anokwafo ne Kristofo Mmea

a Sɛ wopɛ sɛ wuhu sɛ woaso aware a, hwɛ asɛm a yɛato din, “Aware Nhyehyɛe—Ɔfã 1: Masõ Sɛ Me Ne Obi Bɛyɛ Aware Nhyehyɛe Anaa?” Ɛwɔ jw.org.

b ASƐM BI MU NKYERƐKYERƐMU: Adesua yi ne nea edi hɔ no mu no, sɛ yɛka sɛ ɔbarima ne ɔbea bi reyɛ “aware nhyehyɛe” a, nea ɛkyerɛ ne sɛ, wɔn mu biara rebɔ mmɔden ahwɛ sɛ obehu ne yɔnko yiye, na wɔahwɛ sɛ wɔbetumi aware a. Sɛ wɔn mu biara ma ne yɔnko hu pefee sɛ n’ani gye ne ho a, ɛkyerɛ sɛ aware nhyehyɛe no afi ase; ɛbɛkɔ so ara akosi sɛ wɔbesi no pi sɛ wɔbɛware anaa biribi nti wɔbetwa nhyehyɛe no mu.

c Wɔasesa edin no bi.

d Aman bi so no, mpɛn pii no, onuabarima na ɛyɛ a ɔde kɔto onuawa bi anim sɛ ɔpɛ sɛ ɔne no yɛ aware nhyehyɛe. Nanso, onuawa nso betumi aka akyerɛ onua bi sɛ ɔpɛ sɛ ɔne no yɛ nhyehyɛe. (Rut 3:​1-13) Sɛ wopɛ wei ho nsɛm pii a, hwɛ asɛm a yɛato din, “Young People Ask . . . How Can I Tell Him How I Feel? (“Mmabun Bisa Sɛ . . . Sɛnea Mete Nka No, Mɛyɛ Dɛn Aka Akyerɛ No?”) Ɛwɔ October 22, 2004 Nyan! Borɔfo de no mu.