Kɔ emu nsɛm afã hɔ

Kɔ emu nsɛm afã hɔ

Mprempren Nhyehyɛe Yi Bɛtra Hɔ Akosi Bere Bɛn?

Mprempren Nhyehyɛe Yi Bɛtra Hɔ Akosi Bere Bɛn?

 Ti 3

Mprempren Nhyehyɛe Yi Bɛtra Hɔ Akosi Bere Bɛn?

1. Dɛn na yɛn mu pii abisa wɔ Bible mu bɔhyɛ ahorow no ho?

ƐYƐ ne kwan so sɛ yɛbɛpɛ sɛ yehu bere tenten a aka ansa na nsɛm a ebesisi a wɔaka ho asɛm pefee wɔ Bible mu a ɛbɛkɔ akowie Harmagedon mu no abam. Bere bɛn na wɔbɛsɛe mprempren nhyehyɛe bɔne yi? So yɛbɛtra ase ahu bere a asase so bɛyɛ beae a trenee adɔfo betumi anya asomdwoe ne dwoodwoo asetra a edi mu no?

2. (a) Asɛm a ɛte saa ara bɛn na Yesu asomafo no bisae? (b) Yenim bere pɔtee a mprempren nhyehyɛe bɔne yi bɛba awiei? (d) Nanso amanneɛbɔ a ɛho hia yiye bɛn na Yesu de mae?

2 Yesu Kristo de nkyerɛkyerɛmu a ɛyɛ anigye a ebua saa nsemmisa no mae. Ɔyɛɛ saa bere a n’asomafo no bisaa no sɛ: “Ɛdɛn na ɛbɛyɛ wo ba ne nneɛma nhyehyɛe no awiei ho sɛnkyerɛnne?” no. Yesu kaa mprempren nhyehyɛe bɔne yi sɛe ankasa ho asɛm pefee sɛ: “Da no ne dɔn ko no de, obiara nnim, ɔsoro abɔfo ne Ɔba no mpo nnim, gye Agya no nko.” (Mateo 24:3, 36, NW) Nanso ɔkaa awo ntoatoaso a ebehu “nneɛma nhyehyɛe no awiei [Hela: syn·teʹlei·a],” bere a ɛbɛkɔ akowie “awiei [Hela: teʹlos]” no mu ho asɛm kɔɔ akyiri. W’ankasa kenkan fi wo Bible mu wɔ Mateo 24:3–25:46, ne afei kyerɛwtohɔ no ara bi a ɛwɔ Marko 13:4-37 ne Luka 21:7-36 no.

3. Yɛyɛ dɛn hu sɛ na Yesu mmuae no mfa nneɛma a ebesisi wɔ afeha a edi kan no mu ara kwa ho?

3 Bere a wokenkan kyerɛwtohɔ ahorow yi no, wubehu sɛ wɔ ne fã bi nkutoo mu na na Yesu reka nsɛm a ebesisi na ɛbɛkɔ akowie Yerusalem ne n’asɔrefi no sɛe wɔ 70 Y.B.  mu no ho asɛm. Ɛda adi sɛ na biribi a ɛkɔ akyiri sen saa wɔ n’adwenem. Dɛn ntia? Efisɛ wɔ Mateo 24:21 no, ɔka “ahohiahia kɛse a efi wiase asefi de besi nnɛ ebi mmae da nanso ɛremma da” bi ho asɛm. Ɛno bɛsen kurow biako a wɔbɛsɛe no aka emu nnipa a wɔaka wɔn ahyem no koraa. Na wɔ Luka 21:31 no, wɔka sɛ nea wɔaka ho asɛm no twe adwene si “Onyankopɔn ahenni” a wɔde bere tenten atwɛn no ba so. Dɛn ne “sɛnkyerɛnne” titiriw a Yesu kae sɛ wɔnhwɛ kwan no?

SƐNKYERƐNNE A ƐWƆ AFÃ AHOROW

4. Dɛn ne “sɛnkyerɛnne” a Yesu de mae no?

4 Ɔhyɛɛ akodi, ɔkɔm, ɔyaredɔm a ebebu so, asasewosow akɛse, ne ɔdɔ a wonyi no adi a ɛbɛba wɔ bere bi a amumɔyɛ bɛdɔɔso mu ho nkɔm, nanso eyinom mu biara nni hɔ a ɛno nkutoo yɛ “sɛnkyerɛnne” no. Ɛsɛ sɛ nneɛma a ɔhyɛɛ ho nkɔm no nyinaa ba wɔ awo ntoatoaso biako asetram ansa na adi mũ. Na nea ɛbɛka ho bio nso ne sɛ ‘amanaman ho bɛyeraw wɔn, a wonhu nea wɔnyɛ . . . na ehu ama nnipa atotɔ beraw’ esiane nneɛma a ebesisi wɔ soro ne ɛpo a atwa wɔn ho ahyia no mu nti. (Luka 21:10, 11, 25-32; Mateo 24:12; fa toto 2 Timoteo 3:1-5 ho.) Nea ɛne eyi nyinaa bɔ abira nanso ɛyɛ sɛnkyerɛnne no fã bi no, Yesu hyɛɛ nkɔm sɛ wɔbɛka Onyankopɔn Ahenni ho asɛmpa no wiase nyinaa wɔ amanaman ntam ɔtaa a wɔde bɛba n’akyidifo so nyinaa akyi. (Marko 13:9-13) So saa nkyerɛkyerɛmu a ɛwɔ afã horow pii no fa bere a yɛte mu yi ho pɔtee?

5. Dɛn na ɛbɛma nneɛma a ebesisi no ayɛ nea ɛsen abakɔsɛm mu nsɛm a ɛresan asisi bio kɛkɛ?

5 Ebia fɛwdifo bedi fɛw aka sɛ akodi, ɔkɔm, asasewosow, ne nea ɛkeka ho, aba mpɛn pii wɔ abakɔsɛm mu. Nanso sɛ saa nsɛm no nyinaa bom sisi bere koro mu, a ɛnyɛ  mmeae kakraa bi a atetew ne ho, na mmom ɛba wiase nyinaa wɔ bere tenten bi a na wɔaka afe pɔtee a ebefi ase ho asɛm asie bere tenten mu a, ɛbɛkyerɛ biribi titiriw.

6, 7. Afeha a ɛto so 20 mu nsɛm a asisi ne tebea horow bɛn na ɛne sɛnkyerɛnne a ɛwɔ afã horow no hyia pɛpɛɛpɛ? (Sɛ worema mmuae a, fa Bible no di dwuma na kyerɛ Yesu nkɔmhyɛ no afã horow a woreka ho asɛm no.)

6 Susuw nokwasɛm ahorow yi ho: Ná ɔko a esii wɔ 1914 mu no yɛ kɛse araa ma wɔfrɛɛ no wiase ko a edi kan, na efi saa bere no, asomdwoe mmaa asase so ankasa da. Nea edii Wiase Ko I akyi bae ne ɔkɔm a ɛsen biara a adesamma ahu pɛn no mu biako, na nnɛ mpo ɔkɔm kunkum nnipa bɛyɛ ɔpepem 40 afe biara. Ahoɔhare a Spania influensa a ɛbaa 1918 mu no de kunkum nnipa no yɛ nea ebi mmae da wɔ ɔyare abakɔsɛm mu, na wɔ nyansahufo nhwehwɛmu nyinaa akyi mpo no, kokoram, komayare, nyarewa a wonya fi nna mu a ɛyɛ tan, atiridii, dwensɔyaw ne anifurae ka nnipa ɔpepedudu pii. Asasewosow akɛse a sɛ wɔkyekyem a esisi no anya nkɔanim mmɔho 20 asen dodow a na esisi wɔ mfe mpem abien ansa na 1914 reba mu no. Ehu ne ahoyeraw ka nnipa a wɔadi mfe ahorow nyinaa wɔ wiase baabiara. Nea ama aba saa no bi ne sikasɛm mu ahokyere, amumɔyɛsɛm, ne ɔsɛe a ebetumi afi nuklea akodi a wɔde po ase akohyɛn mu akode anaa nea wobefi soro atow bedi dwuma wom mu aba no ho hu—ade a ansa na afeha 20 reba no anka wonim sɛ entumi mma.

7 Eyi nyinaa mu no wɔreka Onyankopɔn Ahenni no ho asɛmpa no wɔ ɔkwan a ɛda nsow koraa so wɔ wiase nyinaa, sɛnea Yesu ka siei no. Wɔ bɛboro nsase ne po mu nsupɔw 200 so no, afe biara Yehowa Adansefo de nnɔnhwerew ɔpepehaha pii boa nnipa ahorow nyinaa ma wɔte  sɛnea Onyankopɔn Asɛm no kyerɛkyerɛ nsɛm a esisi wɔ wiase no mu ase a wonnye hwee. Adansefo no fi komam kyerɛ nnipa ɔkwan a wɔbɛfa so anya nkwa wɔ “ahohiahia kɛse” no mu sɛ Onyankopɔn Ahenni no nkoa. Na Adansefo no yɛ eyi a ɛmfa ho sɛ, sɛnea Canada atesɛm amanneɛbɔ bi kae no, “ebia wogyina ɔtaa pii ano wɔ mfomso ketewaa bi a wodi ho sen nyamesom kuw biara wɔ wiase” no mu.

8. Bere bɛn nso na wɔkaa ho asɛm wɔ nkɔmhyɛ yi mu?

8 Ɛsɛ sɛ yesusuw ho nso sɛ Yesu nkɔmhyɛ no fã bi kaa bere pɔtee bi a ɛbɛba awiei ho asɛm sɛ: “Amanaman no betiatia Yerusalem so, akosi sɛ amanaman mmere a wɔahyɛ ato hɔ no bewie du.” (Luka 21:24, NW) Saa “mmere a wɔahyɛ ato hɔ” no aba awiei?

“AMANAMAN MMERE A WƆAHYƐ ATO HƆ”

9. (a) “Yerusalem” bɛn na amanaman no ‘tiatiaa so’ no? (b) Bere bɛn na saa ‘ntiatiaso’ no fii ase?

9 Nea ɛbɛma yɛate mmuae no ase yiye no, ɛsɛ sɛ yɛte nea Yerusalem gyina hɔ ma ankasa no ase. Na wɔfrɛ kurow a n’ahemfi si Bepɔw Sion so no sɛ “ɔhenkɛse kurow . . . Awurade kurow.” (Dwom 48:2, 8; Mateo 5:34, 35) Na wɔka sɛ Dawid adehye abusua no mu ahemfo no te “Awurade agua so.” Enti na Yerusalem yɛ sɛnkyerɛnne a ani tua a ɛkyerɛ sɛ Yehowa di hene wɔ asase so. (1 Beresosɛm 29:23) Enti bere a Onyankopɔn maa Babilon asraafodɔm kwan ma wɔsɛee Yerusalem, de ne hene kɔɔ nnommumfa mu na wɔyɛɛ asase no amamfõ no, na wɔretiatia Onyankopɔn Ahenni a ɔnam Ɔhene Dawid aseni ɔdehye bi so di no so. Bere a ɛbaa saa wɔ 607 A.Y.B. mu no, efii “Amanaman mmere a wɔahyɛ ato hɔ” no ase. Efi saa bere no, Dawid aseni biara nnii tumi sɛ ɔhene wɔ Yerusalem bio da.

10. (a) ‘Ntiatiaso’ no awiei bɛkyerɛ dɛn? (b) “Yerusalem” bɛn na na afei Yesu befi hɔ adi tumi, na dɛn ntia?

 10 Ɛnde ‘Yerusalem so atiatia’ no awiei bɛkyerɛ dɛn? Ɛbɛkyerɛ sɛ Yehowa de ɔhene a n’ankasa pɛ, Dawid aseni, asi agua so sɛ afei de onni tumi, ɛnyɛ Yudafo mu nkutoo na mmom adesamma nyinaa nsɛm mu. Ɔno ne Awurade Yesu Kristo. (Luka 1:30-33) Nanso ofi he na ebedi tumi? Obedi tumi no afi asase so kurow Yerusalem? Yesu kae pefee sɛ wobegye Onyankopɔn Ahenni no hokwan ahorow afi honam fam Israelfo nsam. (Mateo 21:43; hwɛ 23:37, 38 nso.) Ɛno akyi no, nokware Nyankopɔn asomfo de wɔn ani too “ɔsoro Yerusalem,” Onyankopɔn soro ahyehyɛde a honhom abɔde anokwafo na wɔwom no so sɛ wɔn nã. (Galatifo 4:26) Saa ɔsoro Yerusalem no mu na na wɔde Yesu bɛtra ahengua so ma wadi asase so tumi. (Dwom 110:1, 2) Na ɛno bɛba wɔ “amanaman mmere a wɔahyɛ ato hɔ” no awiei. Ɛno bɛyɛ bere bɛn?

11, ne akontaabu pon no (kratafa 27). (a) Wobu “mmere a wɔahyɛ ato hɔ” no awiei ho akontaa dɛn? (b) Enti, dɛn na efii ase bere a saa “mmere a wɔahyɛ ato hɔ” no baa awiei no? (d) Abakɔsɛm akyerɛwfo bu 1914 dɛn? (Hwɛ kratafa 29.)

11 Wohu siei mfe dudu pii sɛ ɛno bɛba wɔ 1914 mu, bere a Daniel 4:10-17 mu “mmere nson” no anya ne mmamu kɛse awie no. * Nanso wɔtee nea ɛkyerɛ ankasa ase nkakrankakra wɔ mfe a edii ɛno akyi bae no mu. Bible asuafo hui sɛ sɛnkyerɛnne a ɛwɔ afã horow a Yesu kae sɛ ɛbɛkyerɛ sɛ waba wɔ Ahenni tumi mu wɔ soro no rebam nnidiso nnidiso. Ɛbɛdaa adi sɛ na wɔahyɛn “nneɛma nhyehyɛe no awiei” no mu ampa, sɛ Kristo afi ase di tumi sɛ Ɔhene wɔ 1914 mu ne sɛ wiase bɔne yi awiei bɛba wɔ awo ntoatoaso a ehuu nneɛma yi mfiase no mu.

 NNEƐMA A WOHWƐ KWAN NO DI MŨ DƐN?

12. Akwanhwɛ a ɛnteɛ bɛn na ɛma ɛyɛ den ma ebinom sɛ wobegye asɛm yi atom? (Mateo 24:26, 27; Yohane 14:3, 19)

12 Ɛyɛ den ma ebinom a wonim nokwasɛm ahorow yi a ɛma Yesu nkɔmhyɛ no bam no sɛ wobegye nea eyi kyerɛ no atom. Dɛn ntia? Efisɛ wɔrehwɛ biribi foforo kwan. Wɔkyerɛkyerɛɛ wɔn sɛ Kristo ba a ɛto so abien no bɛyɛ nea wɔde wɔn ani behu na ɛbɛma adesamma nyinaa asakra. Afeha a edi kan no mu no, na Yudafo no nso wɔ akwanhwɛ ahorow a amma mu. Na wɔn anidaso ne sɛ Mesia no ba a, ɔde tumi bedi dwuma de agye wɔn afi Roma tumidi ase. Esiane sɛ wɔkɔɔ so kuraa wɔn akwanhwɛ a ɛnteɛ no mu nti, wɔpow Onyankopɔn ankasa Ba no. Hwɛ sɛnea nyansa nnim sɛ yebedi mfomso koro no ara bere a Kristo aba wɔ Ahenni tumi mu yi! Hwɛ sɛnea ɛyɛ papa koraa sɛ yebehu nea Kyerɛwnsɛm no ankasa ka!

13. Nsɛm a ebesisi bɛn na Bible no ankasa kyerɛ sɛ ɛfa Kristo ba no ho?

13 Bible no kyerɛ sɛ Kristo befi ase adi tumi wɔ n’atamfo mfinimfini. (Dwom 110:1, 2) Ɛka Satan ne n’adaemone a wɔbɛpam wɔn afi soro aba asase so bere a wɔama Kristo Ahenni tumi akyi no ho asɛm; enti amanehunu bere bi a emu bɛkɔ so ayɛ den bere bi bɛba asase so. (Adiyisɛm 12:7-12) Saa bere no, wɔbɛhyɛ Ahenni asɛm no ka mu den, na ama nkurɔfo anya hokwan ayɛ nea ɛbɛma wɔanya nkwa. (Mateo 24:14; Adiyisɛm 12:17) Nanso so ɛno bɛma wiase nnipa nyinaa asakra? Nea ɛne no bɔ abira no, Bible no kyerɛ sɛ ɔsɛe a ebi mmae da wɔ adesamma abakɔsɛm mu na ebedi akyi aba. Ɛwom sɛ nnipa remfa wɔn ani ankasa nhu Yesu Kristo a wɔahyɛ no anuonyam no da de, nanso wɔbɛhyɛ wɔn a womfii wɔn pɛ mu nnyee nokwasɛm ahorow a ɛfa Kristo ba a waba sɛ ɔhene ho no ntoom no ma ‘wɔahu’ sɛ ɔno na, sɛnea wɔhyɛɛ nkɔm no, ɔresɛe  wɔn no.—Adiyisɛm 1:7; Mateo 24:30; fa toto 1 Timoteo 6:15, 16; Yohane 14:19 ho.

14, 15. Dɛn nti na ɛnsɛ sɛ mfe a atwam fi 1914 no ma adwenem naayɛ bi ba sɛ ebia yenni “nna a edi akyiri” no mu ampa?

14 Nanso mfe 70 a mprempren atwam fi 1914 no nkyerɛ sɛ ebia yɛnhyɛnee “nna a edi akyiri” mu efi saa afe no ankasa mu, na bere a Kristo bɛba sɛ ɔbrafo no nnui? Ɛnte saa koraa! Yesu kaa wɔn a wobehu “sɛnkyerɛnne” no mmamu a efii ase wɔ 1914 mu no ho asɛm sɛ: “Nokware mise mo sɛ: Awo ntoatoaso yi rentwam, gye sɛ eyinom nyinaa aba ansa.” (Marko 13:30) Ɛwom sɛ saa awo ntoatoaso no mufo dodow so rehuan ntɛmntɛm de, nanso ebinom da so ara wɔ ha.

15 Ɛyɛ ampa sɛ nkontaabu kyerɛ sɛ, sɛ wɔkyekyem pɛpɛɛpɛ a, mprempren nnipa nkwa nna wɔ wiase nyinaa no yɛ mfe 60 pɛ de, nanso nnipa ɔpepem pii nyin tra saa mfe no. Akontaabu a ɛwɔ hɔ kyerɛ sɛ wɔ 1980 mu no, na nnipa a wɔte ase wɔ 1914 mu no bɛyɛ 250,000,000 da so te ase. Saa awo ntoatoaso no nnya ntwaa mu. Nanso, nea ɛyɛ anigye ne sɛ wɔn a wɔwoo wɔn 1900 anaasɛ ansa na saa bere no reba no ho akontaa bi a Amanaman Nkabom no de too gua no kyerɛ sɛ na wɔn mu bɛyɛ 35,316,000 pɛ na wɔda so te ase wɔ 1980 mu. Enti wɔn dodow so tew ntɛmntɛm bere a ankorankoro di mfe aduɔson ne aduɔwɔtwe no. Sɛ yesusuw eyinom ne Yesu nkɔmhyɛ mu sɛnkyerɛnne no nyinaa ho a, nokwasɛm ahorow yi kyerɛ yiye sɛ awiei no abɛn.—Luka 21:28.

16. Enti, su bɛn na ɛsɛ sɛ yenya?

16 Eyi nyɛ bere a ɛsɛ sɛ yɛyɛ anibiannaso. Ɛyɛ bere a ɛsɛ sɛ yɛde ntɛmpɛ yɛ ade! Sɛnea Yesu bɔɔ n’asuafo no kɔkɔ no: “Munsiesie mo ho nsie, efisɛ dɔn a munsusuw no mu na onipa ba [Yesu Kristo] no reba.”—Mateo 24:44.

[Ase hɔ asɛm]

^ nky. 11 Sɛ wopɛ nkyerɛkyerɛmu a ɛkɔ akyiri a, hwɛ “W’Ahenni Mmra,” nhoma no nkratafa 127-39, 186-9.

[Adesua no ho Nsɛmmisa]

 [Kratafa 29 adaka]

Sɛnea Abakɔsɛm Akyerɛwfo Hu 1914

Ntease pa bi nti, wɔafrɛ ɔko a efii ase 1914 no Ɔko Kɛseɛ no ne Wiase Ko I. Na wɔnkoo ɔko biara a ɛsɛee ade kɛse saa da. Akodi a aba fi saa bere no ayɛ nea efii ase 1914 no ntoaso kɛkɛ. Susuw nsɛm a afoforo aka afa nkɛntɛnso a saa afe titiriw yi de aba yi ho:

● “Ɛnyɛ Europa asase ho mfonini a ɛsesae ne ɔman anidan ahorow a ɛsɛee ahemman abiɛsa nko na ɔko no de bae, na mmom ɛkame ayɛ sɛ ne nkɛntɛnso a ɛyɛ tẽẽ ne nea ɛnyɛ tẽẽ no kɔɔ akyiri sen saa wɔ biribiara mu. Ɔko no akyi no, amammuifo ne afoforo bɔɔ mmɔden sɛ wɔbɛbrɛ nsakrae no ase anaasɛ wobesiw ano, na wɔasan de nneɛma aba ne ‘dedaw mu’ bio, sɛnea na wiase no te ansa na 1914 reba no. Nanso antumi anyɛ yiye. Na asasewosow no ano yɛ den, na ɛkyɛe araa ma na wɔadwiriw wiase dedaw no agu ma akodu ne nnyinaso so. Na obiara nni hɔ a obetumi asan ahyehyɛ ma ayɛ te sɛ nea na ɛte no, anya n’asetram nhyehyɛe ahorow, n’adwenhorow, ne n’abrabɔ ho nnyinasosɛm ahorow no.

“. . . Ade titiriw ne suban a ɛsesae, a ɛde suban ho gyinapɛn foforo koraa baa nneɛma pii mu. . . . Ɛnyɛ asraafo a wɔwɔ akono no nko na wɔn tirim bɛyɛɛ den na wɔn yɔnko agyapade ho asɛm anhia wɔn. Ɛnyɛ nnaadaa bebree, adwemmɔne pii ne suban bɔne pii nko na ɛbaa awiei na mmom asetram gyinapɛn ne asetram nneyɛe ahorow a na ɛwɔ hɔ dedaw nso. Ná suban resesa, na ɛte sɛ nea biribiara refi ne sibea, te sɛ nea nneɛma nni ntini a ase yɛ den bio—saa ara na na ɛte wɔ sikasɛm ho nhyehyɛe ne nna mu ɔbra pa, amammui nnyinasosɛm ahorow ne adesua ho mmara ahorow ho. . . .

“Na wotumi hu asetram ahokyere a ɛwɔ hɔ saa bere no wɔ sikasɛm mu titiriw. Na ɔko no asɛe nhyehyɛe bi a emu dɔ, ɛyɛ fakaa na ɛkari pɛ, ne mmara horow a emu yɛ den ne suban a edi mũ no pasaa. . . . Ná wontumi mma nhyehyɛe yi mu biara nsan nkɔ ne ‘dedaw mu.’”—VärldshistoriaFolkens liv och Kultur (Stockholm; 1958), Po VII, nkratafa 421, 422.

● “Mfe aduonum atwam, nanso nkekae a Ɔko Kɛseɛ no mu awerɛhosɛm no de baa amanaman no nnipadua ne wɔn akra so no mpopae . . . Na honam fam ne abrabɔ fam ɔhaw a ahohia yi de bae no yɛ kɛse araa ma biribiara nni hɔ a ɛkɔɔ so yɛɛ sɛnea na ɛte no ara. Nnipa asetra nyinaa: nniso ho nhyehyɛe ahorow, aman ahye, mmara, asraafo, amanaman ntam nkitahodi, ne adwenhorow, abusua asetra, ahonya, dibea, ankorankoro ntam abusuabɔ nso—biribiara sesae fi soro besii fam. . . . Awiei koraa no nnipa asetra ankɔ so ankari pɛ, na entumi nsii ne dedaw mu bio de besi nnɛ.”—Ɔsahene Charles de Gaulle, asɛm a ɔkae wɔ 1968 mu (Le Monde, November 12, 1968).

● “Efi 1914 reba no, obiara a n’ani da hɔ wɔ wiase nsɛm ho no ahaw kɛse wɔ nea ayɛ te sɛ aprenten a wɔkɔ so tu kɔ ɔsɛe kɛse a wɔahyɛ ato hɔ a wontumi nkwati mu. Nnipa a wodwen yiye ate nka sɛ wontumi nyɛ hwee mfa nkwati ɔsɛe a yɛrekɔ mu no. Wohu adesamma abusua no te sɛ Helafo anansesɛm mu ɔkatakyie bi a anyame a wɔn bo afuw piapia no a onni n’ankasa awiei so tumi bio.”—Bertrand Russell, New York Times Magazine, September 27, 1953.

● “Sɛ yegyina nnɛyi tebea so hwɛ yɛn akyi a, yehu no pefee nnɛ sɛ Wiase Ko I a ɛbae no na ɛde afeha a ɛto so aduonu mu ‘Ɔhaw Bere’ bae—sɛnea Britaniani abakɔsɛm kyerɛwfo Arnold Toynbee kyerɛɛ mu pefee no—a akyinnye biara nni ho sɛ ɛno mu na asetra a yɛwom yi fi bae. Sɛ́ efi no tee anaa emfi no tee no, mfe aduonum a abɛsen kɔ no mu sakasakayɛ no nyinaa fii ase 1914.”—The Fall of the Dynasties: The Collapse of the Old Order (New York; 1963), a Edmond Taylor kyerɛwee, kratafa 16.

Nanso dɛn na ɛde wiase nsɛm tebea bɔne a ɛte sɛɛ yi aba?

Bible nkutoo na ɛde nkyerɛkyerɛmu a ntease wom ma.

 [Nsɛm a wɔahyehyɛ wɔ kratafa 27]

1914—Afe a Bible Akontaabu ne Wiase Nsɛm Ahyɛ no Agyirae

Akontaabu

→ Bible kaa “mmere nson” a ɛno akyi no

Onyankopɔn de wiase nniso bɛma nea

wapaw no no ho asɛm siei

(Daniel 4:3-17)

→ “Mmere nson” = mfe 2,520

(Fa toto Adiyisɛm 11:2, 3; 12:6, 14;

Hesekiel 4:6 ho.)

→ “Mmere nson” mfiase: 607 A.Y.B.

(Hesekiel 21:25-27; Luka 21:24)

→ “Mmere nson” awiei: 1914 Y.B.

Wɔde Yesu Kristo sii ahengua so

wɔ soro saa bere no, ofii ase dii ade

wɔ n’atamfo mfinimfini (Dwom 110:1, 2)

Wotuu Satan fii soro; adesamma nnue

(Adiyisɛm 12:7-12)

Nna a edi akyiri fii ase (2 Timoteo 3:1-5)

Nsɛm a Wɔka Siei sɛ Ɛbɛhyɛ Nna a Edi Akyiri Agyirae

→ Ɔko (Wiase ko a edi kan fii ase wɔ 1914 mu;

asomdwoe ankasa nsan mmae bio)

→ Ɔkɔm (Seesei ekunkum nnipa bɛyɛ

ɔpepem 40 afe biara)

→ Ɔyaredɔm (Ɛmfa ho nkɔanim a wɔanya wɔ

nyansahu mu nhwehwɛmu mu)

→ Asasewosow (Sɛ wɔkyekyem pɛpɛɛpɛ a,

efi 1914 no, akɛse a asisi bɛyɛ 25)

→ Ehu (Wɔ nsɛmmɔnedi, sikasɛm a ɛyɛ basaa,

nuklea akode a ɛbɛtɔre nnipa ase ho)

Onyankopɔn bɛsɛe mprempren wiase bɔne yi ansa na awo ntoatoaso a ehu sɛnkyerɛnne no atwam (Mateo 24:3-34; Luka 21:7-32)