Kɔ emu nsɛm afã hɔ

Kɔ emu nsɛm afã hɔ

Yohane So Huan, Yesu Dɔre

Yohane So Huan, Yesu Dɔre

 Ti 18

Yohane So Huan, Yesu Dɔre

BERE a Yesu ne n’asuafo no di afe 30 Y.B. mu asusow bere mu Twam no wie no, wofi Yerusalem. Nanso, wɔansan ankɔ wɔn fi wɔ Galilea, na mmom wɔkɔ Yudea mantam no mu na wɔbɔ nkurɔfo asu wɔ hɔ. Yohane Osuboni ayɛ saa adwuma yi bɛyɛ afe biako ni, na ɔda so ara wɔ asuafo ka ne ho.

Nokwarem no, Yesu ankasa ammɔ asu no bi, nanso n’asuafo no yɛ saa wɔ n’akwankyerɛ ase. Wɔn asubɔ no te sɛ Yohane de no ara, efisɛ ɛyɛ Yudafo no bɔne a wɔayɛ atia Onyankopɔn Mmara apam no ho adwensakra ho sɛnkyerɛnne. Nanso, wɔ Yesu wusɔre akyi no, ɔkyerɛkyerɛ n’akyidifo no sɛ wɔmmɔ asu bi a ɛwɔ ntease foforo. Nnɛyi Kristofo asubɔ yɛ obi ho so a wahyira sɛ ɔbɛsom Yehowa Nyankopɔn no ho sɛnkyerɛnne.

Nanso wɔ Yesu som adwuma no mfiase yi mu no, ɔne Yohane nyinaa kyerɛkyerɛ na wɔbɔ wɔn a wɔasakra wɔn adwene asu, ɛwom sɛ obiara yɛ ne de nko de. Nanso ɛyɛ Yohane asuafo no anibere na wɔka Yesu ho asɛm kyerɛ no sɛ: “Rabi, . . . hwɛ, ɔno nso bɔ asu, na nnipa nyinaa ba ne nkyɛn.”

Sɛ anka ɛbɛyɛ Yohane anibere mmom no, n’ani gye sɛ Yesu nya nkɔso na ɔpɛ sɛ n’asuafo no nso ani gye. Ɔkae wɔn sɛ: “Mo ankasa mudi me adanse sɛ mekae sɛ: Ɛnyɛ me ne Kristo no, na wɔsomaa me dii n’anim.” Afei ɔde mfatoho fɛfɛ bi di dwuma sɛ: “Nea ayeforo wɔ no no ne ayeforokunu; na ayeforokunu adamfo a ogyina hɔ na otie no de, ogye na n’ani gye, ayeforokunu no nne nti. Afei na me saa anigye yi awie pɛyɛ.”

Na Yohane, sɛ ayeforokunu adamfo no, adi kan anya anigye bɛyɛ asram asia ni bere a ɔde n’asuafo kyerɛɛ Yesu no. Wɔn mu binom bɛyɛɛ wɔn a wobenya hokwan abɛyɛ Kristo ɔsoro ayeforo kuw a Kristofo a wɔde honhom asra wɔn na wɔwom no mufo. Yohane pɛ sɛ n’asuafo a wɔwɔ hɔ no nso di Yesu akyi, efisɛ n’atirimpɔw ne sɛ obesiesie kwan ama Kristo som adwuma no nkɔso. Sɛnea Yohane kyerɛkyerɛ mu no: “Ɔno de etwa sɛ ɔdɔre, na me de, me so huan.”

Yesu suani foforo Yohane a anka ɔyɛ Osuboni Yohane suani no kyerɛw Yesu fibea ne n’afã a ɛho hia wɔ adesamma nkwagye mu no ho asɛm sɛ: “Nea ofi soro ba no sen nnipa nyinaa. . . . Agya no dɔ ɔba no, na ɔde nneɛma nyinaa ahyɛ ne nsa. Nea ogye ɔba no di no wɔ daa nkwa; na nea ontie ɔba no renhu nkwa, na Onyankopɔn abufuw da no so.”

Yohane ka ne dwumadi ahorow so huan ho asɛm akyi bere tiaa bi no, Ɔhene Herode kyere no. Na Herode afa ne nua Filipo yere Herodia sɛ ne yere, na bere a Yohane kasa tia ne nneyɛe no wɔ baguam sɛ ɛnteɛ no, Herode ma wɔde no to afiase. Bere a Yesu te sɛ wɔakyere Yohane no, ɔne n’asuafo no fi Yudea kɔ Galilea. Yohane 3:22–4:3; Asomafo no Nnwuma 19:4; Mateo 28:19, 2 Korintofo 11:2; Marko 1:14; 6:17–20.

▪ Asu a wɔbɔ wɔ Yesu akwankyerɛ ase ansa na ne wusɔre no reba no kyerɛ dɛn? Na ne wusɔre akyi de no nso ɛ?

▪ Ɔkwan bɛn so na Yohane kyerɛ sɛ ɛho nhia sɛ n’asuafo no nwiinwii?

▪ Dɛn nti na wɔde Yohane to afiase?