Yohane Kyerɛwtohɔ 2:1-25

  • Kana ayeforohyia; nsu dan nsã (1-12)

  • Yesu tew asɔrefi hɔ (13-22)

  • Yesu nim nea ɛwɔ onipa mu (23-25)

2  Da a ɛto so abiɛsa no, ayeforohyia apontow bi kɔɔ so wɔ Kana a ɛwɔ Galilea, na na Yesu maame wɔ hɔ bi.  Yesu ne n’asuafo no nso, wɔtoo nsa frɛɛ wɔn baa ayeforohyia apontow no ase.  Bere a nsã* no sae no, Yesu maame ka kyerɛɛ no sɛ: “Wonni nsã.”*  Na Yesu ka kyerɛɛ no sɛ: “Ɔbea, ɛno nso de, ɛfa me ne wo ho dɛn?* Me bere nnya nsoe.”  Ɛnna ne maame ka kyerɛɛ asomfo no sɛ: “Nea ɔbɛka akyerɛ mo biara, monyɛ.”  Saa bere no, na nsuhina asia a wɔde abo ayɛ sisi hɔ sɛnea Yudafo ahodwira ho mmara te+ no, na na emu biara betumi afa susuhina* abien anaa abiɛsa.  Yesu ka kyerɛɛ wɔn sɛ: “Momfa nsu ngu nhina no mu mma ɛnyɛ ma.” Na wɔde nsu guguu mu maa ne nyinaa yeyɛɛ ma tɛnn.*  Na ɔka kyerɛɛ wɔn sɛ: “Afei monsaw bi, na momfa nkɔma nea ɔhwɛ apontow no so no.” Enti wɔde kɔe.  Ɛnna nea ɔhwɛ apontow no so no kaa nsu a adan nsã* no bi hwɛe. Ná onnim baabi a efi (nanso asomfo a wɔsaw nsu no de, na wonim). Enti nea ɔhwɛ apontow no so no frɛɛ ayeforokunu no, 10  na ɔka kyerɛɛ no sɛ: “Obiara de nsã* pa na ebesisi hɔ kan, na sɛ nkurɔfo bobow a, afei na ɔde nea enye no aba. Wo de, wode nsã* pa no asie abesi sesɛɛ.” 11  Yesu yɛɛ eyi wɔ Kana wɔ Galilea. Ɛno ne sɛnkyerɛnne a edi kan a ɔyɛe, na ɔmaa n’anuonyam daa adi,+ na n’asuafo no gyee no dii. 12  Eyi akyi no, ɔne ne maame ne ne nuanom+ ne n’asuafo no kɔɔ Kapernaum,+ nanso wɔantena hɔ ankyɛ.* 13  Saa bere no, na Yudafo Twam+ no abɛn, na Yesu foro kɔɔ Yerusalem. 14  Na ohui sɛ ebinom tete asɔrefi hɔ a wɔretɔn anantwi ne nguan ne mmorɔnoma,+ ɛnna ebinom nso resesa sika. 15  Enti ɔfaa nhama, na ɔde yɛɛ abaa* pam wɔn a wɔde nguan ne anantwi aba asɔrefi hɔ no nyinaa fii hɔ, na ohwiee wɔn a wɔsesa sika no sika gui, na ɔkaa wɔn apon butubutuwii.+ 16  Na ɔka kyerɛɛ wɔn a wɔtɔn mmorɔnoma no sɛ: “Momfa eyinom mfi ha nkɔ! Munnyae sɛ mode m’Agya fi ayɛ aguadi fi!”*+ 17  Ɛnna n’asuafo no kaee sɛ, wɔakyerɛw sɛ: “Wo fi ho mmɔdenbɔ bɛmene me.”+ 18  Na Yudafo no bisaa no sɛ: “Sɛnkyerɛnne bɛn na wubetumi ayɛ de akyerɛ sɛ wowɔ tumi+ sɛ woyɛ eyinom?” 19  Yesu buaa wɔn sɛ: “Munnwiriw asɔrefi yi ngu, na mede nnansa bɛma so asi hɔ.”*+ 20  Ɛnna Yudafo no kae sɛ: “Asɔrefi a wɔde mfe 46 sii no, wode nnansa bɛma so asi hɔ?” 21  Nanso ɔno de, bere a ɔkaa asɔrefi no, ne nipadua ho asɛm na na ɔreka.+ 22  Bere a ɔsɔre fii awufo mu no, n’asuafo no kaee sɛ na ɔtaa ka saa,+ na wogyee kyerɛwnsɛm no ne nsɛm a Yesu kae no dii. 23  Na bere a ɔwɔ Twam Afahyɛ no ase wɔ Yerusalem no, nnipa pii huu nsɛnkyerɛnne a ɔyɛe no, na wogyee ne din dii. 24  Nanso Yesu de, wamfa ne werɛ anhyɛ wɔn mu, efisɛ na onim wɔn nyinaa. 25  Afei nso, na enhia no sɛ obiara di onipa ho adanse, efisɛ na onim nea ɛwɔ onipa mu.+

Ase Hɔ Nsɛm

Anaa “bobesa.”
Anaa “bobesa.”
Nt., “Ɔbea, dɛn na me ne wo wɔ yɛ?” Ɛyɛ kasakoa bi a ɛkyerɛ sɛ obi mpene biribi so. Asɛmfua “ɔbea” a Yesu de yɛɛ adwuma no nkyerɛ sɛ ommu ade.
Ɛbɛyɛ sɛ na susuhina a wɔreka ho asɛm wɔ ha yi ne bat susuhina. Bat baako yɛ lita 22 (gal. 5.81). Hwɛ Nkh. B14.
Anaa “tɔtɔɔtɔ.”
Anaa “bobesa.”
Anaa “bobesa.”
Anaa “bobesa.”
Anaa “wɔanni nna bebree wɔ hɔ.”
Anaa “mpire.”
Anaa “gua so.”
Anaa “besi.”