Yeremia 6:1-30

  • Ɛrenkyɛ wɔbɛto Yerusalem ho akoban (1-9)

  • Yehowa bo afuw Yerusalem (10-21)

    • Wɔka sɛ “Asomdwoe!” Nanso asomdwoe biara nni hɔ (14)

  • Ɔman bi befi atifi fam abɛtow ahyɛ wɔn so ateetee wɔn (22-26)

  • Yeremia bɛsɔ dade ahwɛ (27-30)

6  O Benyamin mma, mompɛ baabi nhintaw, munguan mfi Yerusalem. Mommɔ abɛn+ no wɔ Tekoa;+Monsɔ ogya mfa nyɛ ahyɛnsode wɔ Bet-Hakerem! Efisɛ mmusu bi fi atifi fam reba, ɔsɛe kɛse bi.+   Sion babea te sɛ ɔbea hoɔfɛfo a wogyigye no so.+   Nguanhwɛfo ne wɔn nguankuw bɛba. Wobesisi wɔn ntamadan atwa ne ho ahyia,+Na obiara bɛma ne nguan adidi.+   “Munsiesie mo ho* ne no nkɔko! Monsɔre mma yɛnkɔtow nhyɛ no so awia ketee!” “Asɛm ato yɛn! Efisɛ ade resa,Na anwummere sunsuma reyɛ tenten!”   “Monsɔre mma yɛnkɔtow nhyɛ no so anadwo,Na yɛnsɛe n’aban a ɛyɛ den no.”+   Na nea asafo Yehowa aka ni: “Muntwitwa nnua na monto Yerusalem ho akoban.*+ Ɛyɛ kurow a ɛsɛ sɛ etua ne bɔne so ka;Nhyɛso nko ara na ɛwɔ ne mu.+   Sɛnea abura ma nsu a ɛwom yɛ nwini no,Saa ara na ɔma ne bɔne yɛ nwini. Wɔte sɛ basabasayɛ ne ɔsɛe rekɔ so wɔ ne mu;+Ɔyare ne ɔhaw na ɛwɔ m’anim daa.   O Yerusalem, hwɛ yiye, anyɛ saa a, wo ho bɛyɛ me abofono ama matwe me ho* afi wo ho;+Mɛma woayɛ amamfo, asaase a obiara nte so.”+   Nea asafo Yehowa aka ni: “Wɔbɛsesaw Israelfo a aka no akɔ korakora, sɛnea wɔtetew bobe a aka wɔ ne dua so no. Ma wo nsa nni akɔneaba sɛ obi a ɔretetew bobe afi bobe dua so.” 10  “Henanom na menkasa nkyerɛ wɔn na memmɔ wɔn kɔkɔ? Henanom na wobetie? Hwɛ! Wɔasisiw wɔn aso* sɛnea ɛbɛyɛ a ɛrente asɛm.+ Hwɛ! Yehowa asɛm yɛ wɔn ahĩ;+Wonni ho anigye biara. 11  Ɛno nti Yehowa abufuw ahyɛ me ma.Makura mu abrɛ.”+ “Hwie gu abofra a ɔnam abɔnten so,+Ne mmerante a wɔaboa wɔn ano so. Wɔbɛkyere wɔn nyinaa, ɔbarima ne ne yere,Nkwakoraa ne nkwakoraa posoposo.*+ 12  Wɔn afi bɛyɛ nkurɔfo dea;Wɔn nsaase ne wɔn yerenom nso bɛyɛ nkurɔfo dea.+ Na mɛteɛ me nsa wɔ asaase no sofo so,” Yehowa asɛm ni. 13  “Efisɛ efi akumaa so kosi ɔkɛse so, obiara pɛ mfaso bɔne;+Efi odiyifo so kosi ɔsɔfo so, wɔn nyinaa bu nkurɔfo fa so.+ 14  Wɔsa me man akuru biarabiara,* na wɔka sɛ,‘Asomdwoe wɔ hɔ! Asomdwoe wɔ hɔ!’ Nanso asomdwoe biara nni hɔ.+ 15  Akyiwade a wɔayɛ no, ɛyɛ wɔn aniwu anaa? Ɛnyɛ wɔn aniwu koraa! Wɔn ani mmu wɔn dwɛ!* Ɛno nti, wɔbɛhwehwe ase wɔ wɔn a wɔahwehwe ase mu.+ Na ɛda a mɛba abɛtwe wɔn aso no, wobehintihintiw,” Yehowa na waka. 16  Nea Yehowa aka ni: “Munkogyina nkwanta so na monhwɛ. Mummisa tete akwantempɔn no ho asɛm,Mummisa baabi a ɔkwan pa no wɔ, na momfa so,+Na mo ho nnwo mo.”* Nanso wɔkae sɛ: “Yɛremfa so.”+ 17  “Mede awɛmfo sisii mo so,+ na wɔkae sɛ,‘Muntie abɛn no nnyigyei no!’”+ Nanso wɔkae sɛ: “Yɛrentie.”+ 18  “Ɛno nti, O amanaman, muntie! O asafo, munhuNea ɛbɛto wɔn. 19  O asaase, yɛ aso! Mede amanehunu reba ɔman yi so;+Ɛyɛ wɔn adwemmɔne so aba na wɔretwa,Efisɛ wɔantie me nsɛm,Na wɔpoo me mmara.”* 20  “Sɛ mode ɛhyɛ* fi Saba ba a, ɛfa me ho bɛn?Na mode sibiri huamhuam* fi akyirikyiri asaase so ba a, dɛn na ɛbɛyɛ ama me? Mempɛ mo hyew afɔre,Na mo afɔre nso nsɔ m’ani.”+ 21  Enti nea Yehowa aka ni: “Mede hintidua bɛto ɔman yi anim,Na ɛbɛma wɔahintiw,Agyanom ne mma nyinaa,Ofipamfo ne ne yɔnko,Na wɔn nyinaa bɛsɛe.”+ 22  Nea Yehowa aka ni: “Hwɛ! Ɔman bi fi atifi asaase so reba,Wɔbɛkanyan ɔman kɛse bi afi asaase ano akyirikyiri aba.+ 23  Wɔde agyan ne peaw na ɛbɛba. Wɔn tirim yɛ den, na wɔrenhu obiara mmɔbɔ. Wɔn nne begyigye te sɛ ɛpo,Na wɔtete apɔnkɔ so.+ Wɔbɛboaboa wɔn ho ano aba wo so te sɛ ɔsabarima, O Sion babea.” 24  Yɛate ho asɛm. Yɛn nsam agow;+Yɛn ho yeraw yɛn,Yɛte yaw te sɛ ɔbea a ɔrewo.+ 25  Mpue nkɔ afuw mu,Na nkɔnantew ɔkwan so,Efisɛ ɔtamfo no wɔ sekan;Ehu atwa wo ho ahyia. 26  O me man babea,Fura awerɛhow ntama,*+ na munumunum wɔ nsõ mu. Di awerɛhow te sɛ obi a ɔresu teɛteɛm di ne ba baako pɛ wu ho awerɛhow,+Efisɛ prɛko pɛ na ɔsɛefo no bɛba yɛn so.+ 27  “Mede wo* asi hɔ sɛ obi a ɔsɔ dade hwɛ wɔ me man mu,Obi a ɔhwehwɛ nneɛma mu yiye;Fa w’ani to fam hwɛ wɔn yiye, na hwehwɛ wɔn akwan mu. 28  Wɔn nyinaa aso yɛ den dodo;+Wɔnenam sɛe nkurɔfo din.+ Wɔte sɛ kɔbere ne dade;Wɔn nyinaa asɛe. 29  Afa* no ahyew. Sumpii* na wonya fi wɔn gya mu. Wɔyere wɔn ho nan no kwa,+Na wonyii abɔnefo mfii wɔn mu.+ 30  Nkurɔfo bɛfrɛ wɔn sɛ dwetɛ a wɔapo,Efisɛ Yehowa apo wɔn.”+

Ase Hɔ Nsɛm

Nt., “Montew mo ho.”
Esiw anaa ɔfasu a wogyina so ko anaa wɔde bɔ kurow ho ban.
Anaa “me kra atwe ne ho.”
Nt., “Wontwaa wɔn aso twetia.”
Nt., “Wɔn a wɔadi nna amee.”
Anaa “Wɔnteɛ wɔn ho nsa me man akuru yiye.”
Anaa “Wonnim fɛre baako sɛɛ!”
Anaa “mo kra ho nnwo no.”
Anaa “m’akwankyerɛ.”
Hwɛ Nkyerɛkyerɛmu afã hɔ.
Ɛyɛ afifide bi a ɛyɛ huam. Nanso obiara nhyɛ da nnim afifide pɔtee a ɛyɛ.
Anaa “atweaatam.” Hwɛ Nkyerɛkyerɛmu afã hɔ.
Kyerɛ sɛ, Yeremia.
Ade a ɔtomfo de fita ogya mu ma ɛsɔ kɔɔ.
Ɛyɛ dade bi a emu yɛ duru.