Yeremia 50:1-46

  • Nkɔmhyɛ a etia Babilon (1-46)

    • Munguan mfi Babilon (8)

    • Wɔbɛsan de Israel aba (17-19)

    • Babilon nsu bɛyow (38)

    • Obiara rentena Babilon (39, 40)

50  Asɛm a Yehowa nam odiyifo Yeremia so ka faa Babilon ho+ ne nea ɔka faa Kaldeafo asaase ho ni:   “Monka wɔ amanaman no mu, na mommɔ no dawuru. Momma ahyɛnsode* so na mommɔ no dawuru. Mommfa hwee nnsie! Monka sɛ, ‘Wɔadi Babilon so nkonim.+ Wɔagu Bel anim ase.+ Ehu aka Merodak. Wɔagu n’ahoni anim ase. Ehu aka n’abosom fĩ* no.’   Efisɛ ɔman bi fi atifi fam aba no so.+ Ama n’asaase adan biribi a ɛyɛ hu;Obiara nte hɔ. Nnipa ne mmoa nyinaa aguan;Wɔn nyinaa kɔ.”  “Saa nna no ne saa bere no,” Yehowa asɛm ni, “Israelfo ne Yudafo bɛbom aba.+ Wɔde osũ na ɛbɛnantew aba.+ Na wɔbɛbom ahwehwɛ Yehowa wɔn Nyankopɔn no.+  Wobebisa baabi a Sion kwan wɔ, na wɔde wɔn ani bɛkyerɛ hɔ+ aka sɛ, ‘Mommra mma yɛmfa yɛn ho nkɔbata Yehowa ho na yɛne no nyɛ daa apam a obiara werɛ remfi.’+  Me man adan nguan a wɔayera.+ Wɔn ankasa ahwɛfo ama wɔafom kwan.+ Wɔde wɔn nenam mmepɔw so; wofi bepɔw so a, na wɔkɔ koko so. Wɔn werɛ afi wɔn homebea.  Wɔn a wohu wɔn nyinaa kyere wɔn we,+ na wɔn atamfo ka sɛ, ‘Yenni fɔ, efisɛ Yehowa na wɔayɛ no bɔne; wɔayɛ bɔne atia Yehowa a ɔyɛ trenee tenabea ne wɔn agyanom anidaso no.’”   “Munguan mfi Babilon,Mumfi Kaldeafo asaase so nkɔ,+Na monyɛ sɛ adwennini* a wodi nguan anim.   Hwɛ, merema aman akɛse aba Babilon so,Aman bebree a wofi atifi fam asaase so.+ Wɔbɛhyehyɛ wɔn ho aba na wɔne no abɛko,*Na ɛhɔ na wobefi adi no so nkonim. Wɔn agyan te sɛ ɔsabarima de,Na ekunkum nkurɔfo mma;+Wɔnsan wɔn akyi, gye sɛ wɔawie wɔn adwuma. 10  Kaldea bɛdan nneɛma a nkurɔfo nya fi ɔko mu.*+ Wɔn a wɔfom ne nneɛma nyinaa bɛmee paa,”+ Yehowa asɛm ni. 11  “Efisɛ mudii ahurusi,+ na mo ani gyeiBere a morefom m’ankasa m’agyapade no.+ Mokɔɔ so de mo nan dwiridwiriw fam te sɛ nantwi* a ɔde ne nan dwiridwiriw sare,Na mokɔɔ so sui sɛ apɔnkɔnini. 12  Wɔagu mo maame anim ase.+ Nea ɔwoo mo no nsa asi fam. Hwɛ! Ɔno ne ɔman a mfaso nni so koraa wɔ amanaman mu,Ɔyɛ sare a nsu nni so ne anwea pradadaa.+ 13  Yehowa abufuw nti, obiara rentena mu;+Ɛbɛsɛe pasaa.+ Obiara a obetwam wɔ Babilon bɛtɛɛ n’anom ahwɛ,Na obedi ne ho fɛw,* mmusu a ɛbɛba no so no nyinaa nti.+ 14  Monhyehyɛ mo ho nkɔ Babilon so wɔ afã nyinaa,Mo a mukuntun agyan mu* nyinaa. Montow agyan nkɔ no so, munnnyaw agyan no baako mpo,+Efisɛ Yehowa na wayɛ no bɔne.+ 15  Monteɛm denneennen ngu no so wɔ afã nyinaa. Ɔde ne ho ama* efisɛ wadi nkogu. N’adum abubu, n’afasu adwiriw agu.+Efisɛ ɛyɛ Yehowa na ɔretua no ka.+ Muntua no so ka. Nea ɔde ayɛ nkurɔfo no, saa ara na momfa nyɛ no.+ 16  Muntwa ogufo mfi Babilon,Na muntwa nea okura kantankrankyi* wɔ twabere mu no mfi hɔ.+ Atirimɔden sekan no nti, obiara bɛsan akɔ ne nkurɔfo nkyɛn,Na obiara beguan akɔ n’asaase so.+ 17  “Israelfo yɛ nguan a wɔahwete.+ Agyata abɔ wɔn apansam.+ Nea edi kan, Asiria hene tetew wɔn mu;+ ɛnna Babilon hene Nebukadnesar* nso bobɔɔ wɔn nnompe mu.+ 18  Enti nea asafo Yehowa, Israel Nyankopɔn no aka ni: ‘Hwɛ, Babilon hene ne n’asaase nyinaa, mɛyɛ wɔn ade, sɛnea meyɛɛ Asiria hene ade no.+ 19  Na mɛsan de Israel aba n’adidibea,+ na obedidi wɔ Karmel ne Basan.+ Na obedidi* amee wɔ Efraim+ ne Gilead+ mmepɔw so.’” 20  “Saa nna no ne saa bere no,” Yehowa asɛm ni,“Wɔbɛhwehwɛ Israel mmaratoNanso wɔrenhu,Na Yuda bɔne nso, wɔrenhu,Efisɛ wɔn a mɛma wɔaka no, mede wɔn bɔne bɛkyɛ wɔn.”+ 21  “Foro kɔtow hyɛ Merataim asaase no so, na kɔ Pekodfo so.+ Ma wonkunkum wɔn nyinaa, na wɔnsɛe wɔn pasaa,” Yehowa asɛm ni, “Yɛ nea maka akyerɛ wo no nyinaa. 22  Ɔko nnyigyei wɔ asaase no so,Ɛyɛ amanehunu* kɛse. 23  Hamma* a ebubu asaase so aman nyinaa no, hwɛ sɛnea wɔatwa ato fam na wɔabubu no!+ Hwɛ sɛnea Babilon adan biribi a ɛyɛ hu wɔ amanaman no mu!+ 24  O Babilon, masum wo afiri ama ayi wo,Nanso woanhu. Wɔahu wo, na wɔakyere wo,+Efisɛ Yehowa na woko tiaa no. 25  Yehowa abue n’adekoradan,Na wayi n’abufuhyew akode apue.+ Efisɛ Awurade Tumfo, asafo Yehowa wɔ adwuma bi yɛWɔ Kaldeafo asaase so. 26  Mumfi akyirikyiri mmra no so.+ Mummue adan a ɔkora n’aduan wom no.+ Mommoaboa n’ano nsum hɔ te sɛ awi.* Monsɛe no pasaa.+ Mommma onipa biara nnka mmma no. 27  Munkunkum n’anantwinini nkumaa nyinaa.+Momma wonsian nkɔ mma wonkunkum wɔn. Asɛm ato wɔn, efisɛ wɔn bere aso;Wɔn akontaabu da no aso! 28  Wɔte wɔn a wɔreguan no nne,Wɔn a wɔreguan afi Babilon asaase so no.Wɔrekɔka wɔ Sion sɛ Yehowa yɛn Nyankopɔn no retua bɔne so ka,Ɔretua bɔne so ka ama n’asɔrefi.+ 29  Momfrɛfrɛ agyantofo nkɔ Babilon so,Wɔn a wokuntun agyan mu* nyinaa.+ Muntwa ne ho nhyia; mommma obiara nnguan. Muntua no ka sɛnea ne nnwuma te.+ Nea ɔde ayɛ nkurɔfo no, saa ara na momfa nyɛ no.+ Efisɛ wayɛ ahantan wɔ Yehowa so,Wayɛ ahantan wɔ Israel Kronkronni no so.+ 30  Enti ne mmerante bɛtotɔ wɔ ne mmɔnten so,+Na n’asraafo nyinaa bɛsɛe* saa da no,” asafo Yehowa asɛm ni. 31  “O wo a wummu hwee,+ hwɛ! me ne wo anya,”+ Awurade Tumfo, asafo Yehowa asɛm ni,“Efisɛ wo da bɛba, ɛda a mɛma woabu akontaa no. 32  O wo a wummu hwee, wubehintiw na woahwe ase,Na worennya obiara mma wo so.+ Mede ogya bɛto wo nkurow mu,Na ɛbɛhyew biribiara a atwa wo ho ahyia.” 33  Nea asafo Yehowa aka ni: “Wɔhyɛ Israelfo ne Yudafo so,Na wɔn a wɔakyere wɔn kɔ no ayere wɔn.+ Wɔmpɛ sɛ wogyaa wɔn ma wɔkɔ.+ 34  Nanso wɔn Gyefo no ho yɛ den.+ Asafo Yehowa ne ne din.+ Nea ɛte biara, obedi wɔn asɛm ama wɔn+Sɛnea ɛbɛyɛ a ɔbɛma asaase no ahome,+Na wama Babilonfo ho ayeraw wɔn.”+ 35  “Sekan reba Kaldeafo so,” Yehowa asɛm ni,“Ɛreba Babilonfo ne wɔn mpanyimfo ne wɔn anyansafo so.+ 36  Sekan reba wɔn a wɔka nsɛnhunu* so, na wobedi nkwaseasɛm. Sekan reba ne mmarima a wonim ko so, na wɔbɛbɔ hu.+ 37  Sekan reba wɔn apɔnkɔ ne wɔn ko nteaseɛnam so,Sekan reba firamanfiramanfo a wɔwɔ ne mu no nyinaa so,Na wɔbɛyɛ sɛ mmea.+ Sekan reba n’agyapade so, na nkurɔfo bɛfom.+ 38  Wɔn nsu bɛsɛe na ayow.+ Efisɛ ɛyɛ ahoni asaase,+Na wɔn anisoadehu a ɛyɛ hu no nti, wɔkɔ so yɛ wɔn nneɛma sɛ abɔdamfo. 39  Ɛno nti, sare so mmoa ne mmoa a wosu te sɛ kraman na ɛbɛtena hɔ,Na nsohori nso bɛtena hɔ.+ Onipa biara rentena hɔ bio da,Na obiara remfa hɔ nyɛ ne tenabea awo ntoatoaso nyinaa mu.”+ 40  “Sɛnea Onyankopɔn butuw Sodom ne Gomora+ ne ɛho nkurow no,”+ Yehowa asɛm ni, “saa ara na obiara rentena hɔ, na onipa biara rensoɛ hɔ.+ 41  “Hwɛ! Ɔman bi fi atifi fam reba.Wɔbɛma ɔman kɛse bi ne ahemfo akɛse+Afi akyirikyiri asaase so aba.+ 42  Wokurakura agyan ne peaw.+ Wɔn tirim yɛ den, na wɔrenhu obiara mmɔbɔ.+ Wɔn nnyigyei te sɛ ɛpo a ɛrebu fa so,+Bere a wɔtete wɔn apɔnkɔ so reba no. Wɔahyehyɛ wɔn ho aka abom sɛ onipa baako ne wo rebɛko, O Babilon babea.+ 43  Babilon hene ate wɔn ho amanneɛbɔ,+Na ne nsam agow.+ Ne ho yeraw no,Na ɛyaw a ɔrefa mu no te sɛ ɔbea a ɔrewo. 44  “Hwɛ! Obi bɛforo abɛtow ahyɛ adidibea a wɔabɔ ho ban no so te sɛ gyata a ofi Yordan kwaebirentuw mu, nanso mɛma wɔaguan* afi hɔ ntɛm. Na mɛma nea wɔapaw no no adi no so.+ Hena na ɔte sɛ me, na hena na ɔne me bedi asi? Oguanhwɛfo bɛn na obetumi agyina m’anim?+ 45  Enti mmarima, muntie pɔw a Yehowa abɔ wɔ Babilon ho;+ na nea wabɔ ne tirim sɛ ɔbɛyɛ Kaldeafo asaase ni: Nea ɛte biara, wɔbɛtwe nguan mma no ase akɔ. Wɔn nti, ɔbɛma wɔn tenabea asɛe pasaa.+ 46  Sɛ wodi Babilon so nkonim a, ɛho dede no bɛma asaase awosow,Na wɔbɛte nteɛteɛm wɔ amanaman no mu.”+

Ase Hɔ Nsɛm

Anaa “frankaa.”
Hebri asɛmfua a wɔde dii dwuma wɔ ha no, ebetumi aba sɛ ɛne asɛmfua “tiafi” na ɛnam, na wɔka de bu biribi animtiaa.
Anaa “mpapo.”
Anaa “abetwa ne ho mpasua.”
Anaa “asade.”
Anaa “nantwibere a onnyinii pii.”
Nt., “ɔbɛhwɛ abɔ hwirema.”
Nt., “mutiatia agyan so.”
Nt., “Wama ne nsa so.”
Ɛbɛyɛ sɛ na ɛyɛ dade bi a ɛyɛ nnam a ɛhyɛ dua ano. Ɛte sɛ kookoo sosɔw.
Nt., “Nebukadresar.” Ɛyɛ ɔkwan foforo a wɔfa so kyerɛw edin Nebukadnesar.
Anaa “ne kra bedidi.”
Anaa “ɔsɛe.”
Anaa “Asae; Abɔsobaa.”
Ebinom nso frɛ no “atoko.”
Nt., “wotiatia agyan so.”
Nt., “bɛyɛ dinn.”
Anaa “atoro adiyifo.”
Ebetumi aba sɛ ɛfa Babilonfo ho.