Yakobo Nhoma No 5:1-20

  • Kɔkɔbɔ a ɛkɔ ma adefo (1-6)

  • Onyankopɔn hyira wɔn a wɔde animia gyina mu (7-11)

  • Ma wo “yiw” nyɛ yiw (12)

  • Mpae a wɔde gyidi bɔ no, ɛyɛ adwuma yiye (13-18)

  • Boa ɔbɔnefo ma ɔnsakra (19, 20)

5  Afei mo adefo, muntie; ahohia a ɛreba mo so nti, munsu na mommɔ bena.+  Mo ahonyade aporɔw, na mmoawa awe mo ntaade.+  Mo sika kɔkɔɔ ne mo dwetɛ awe nkannare asɛe, na nkannare no bɛyɛ adanse atia mo na adi mo nam. Nea moakora so no bɛyɛ sɛ ogya wɔ awiei mmere no mu.+  Hwɛ! Adwumayɛfo a wotwaa mo afuw mu nnɔbae no, wɔn akatua a mode akame wɔn no reteɛm, na atwafo no sufrɛ adu asafo Yehowa* asom.+  Moanya asetena pa wɔ asaase so na moadi ɔhonam akɔnnɔ akyi. Moadidi ama mo koma adɔ srade te sɛ mmoa a wɔrekokum wɔn.+  Moabu ɔtreneeni fɔ; moakum no. Ɔne* mo renni asi anaa?  Enti anuanom, munnya abotare nkosi sɛ Awurade mmae+ no befi ase. Hwɛ! Okuafo kɔ so ara twɛn asaase so aba a ɛsom bo no, na onya ho abotare kosi sɛ obenya osu a edi kan ne osu a etwa to.+  Mo nso munnya abotare;+ monhyɛ mo koma den, efisɛ Awurade mmae no abɛn.+  Anuanom, mma obiara nnnwiinwii* nntia ne yɔnko na wɔammu mo atɛn.+ Hwɛ! Ɔtemmufo no gyina pon ano. 10  Anuanom, momma adiyifo a wɔkasae wɔ Yehowa* din mu+ no amanehunu+ ne wɔn abotare+ nyɛ nhwɛso mma mo. 11  Hwɛ! Wɔn a wɔamia wɔn ani agyina mu no, yɛka sɛ: “Wɔwɔ anigye.”*+ Moate Hiob animia+ ho asɛm na moahu nea Yehowa* ma efii mu bae;+ moabehu sɛ Yehowa* wɔ ayamhyehye* ne mmɔborɔhunu.+ 12  Nanso, me nuanom, nea ɛsen ne nyinaa no, monnka ɔsoro anaa asaase ntam anaa ntam foforo biara. Mmom momma mo “Yiw” nyɛ yiw, na mo “Daabi” nyɛ daabi,+ na wɔammu mo atɛn. 13  Mo mu bi rehu amane anaa? Ma ɔnkɔ so mmɔ mpae.+ Obi wɔ anigye mu? Ma ɔnto ayeyi nnwom.+ 14  Mo mu bi yare anaa? Ma ɔmfrɛ asafo no mu mpanyimfo+ na wɔmmɔ mpae mma no, na wɔnsra no ngo+ wɔ Yehowa* din mu. 15  Na mpae a wɔde gyidi bɔ no bɛma nea ɔnte apɔw* no ho ayɛ no den, na Yehowa* bɛma no so. Sɛ wayɛ bɔne bi nso a, wɔde bɛkyɛ no. 16  Enti mompae mu nka mo bɔne+ nkyerɛ mo ho, na mommɔ mpae mma mo ho na moanya ayaresa. Ɔtreneeni nkotosrɛ wɔ* tumi kɛse.+ 17  Ná Elia yɛ onipa a ɔwɔ atenka te sɛ yɛn ara, nanso ɔyeree ne ho bɔɔ mpae sɛ mma osu nntɔ; na ampa ara, osu antɔ asaase no so mfe abiɛsa ne abosome asia.+ 18  Afei ɔsan bɔɔ mpae, na osu tɔ fii soro, na asaase sow n’aba.+ 19  Me nuanom, sɛ mo mu bi man fi nokware no ho na sɛ obi gye no si yiye a, 20  munhu sɛ obiara a ɔtwe ɔbɔnefo fi ne kwammɔne so+ no begye no* afi owu mu na wakata bɔne pii so.+

Ase Hɔ Nsɛm

Ebetumi nso akyerɛ, “Onyankopɔn ne.”
Anaa “nnsi apini.” Nt., “nngu ahome.”
Anaa “yebu wɔn sɛ wɔahyira wɔn.”
Anaa “tema.”
Ebetumi nso akyerɛ, “nea wabrɛ.”
Nt., “nkotosrɛ, sɛ ɛreyɛ adwuma a, ɛwɔ.”
Anaa “ne kra.”