Rut 1:1-22

  • Elimelek abusua tu kɔɔ Moab (1, 2)

  • Naomi, Orpa, ne Rut bɛyɛɛ akunafo (3-6)

  • Rut bataa Naomi ne Naomi Nyankopɔn ho (7-17)

  • Naomi ne Rut san kɔɔ Betlehem (18-22)

1  Atemmufo no bere so no,*+ ɔkɔm baa asaase no so, na ɔbarima bi ne ne yere ne wɔn mma mmarima baanu tu fii Betlehem+ a ɛwɔ Yuda kɔyɛɛ ahɔho wɔ Moab+ asaase so.  Ɔbarima no din de Elimelek,* ne yere din de Naomi,* na ne mma baanu no din de Malon* ne Kilion.* Ná wɔyɛ Efratafo a wofi Betlehem a ɛwɔ Yuda. Bere a wokoduu Moab asaase so no, wɔtenaa hɔ.  Bere bi akyi no, Naomi kunu Elimelek wui, na ɛkaa ɔne ne mma baanu no.  Akyiri yi, ne mma no waree Moabfo mmea. Ɔbaako din de Orpa, ɛnna ɔbaako nso de Rut,+ na wɔtenaa hɔ bɛyɛ mfe du.  Afei ne mma baanu no, Malon ne Kilion nso wuwui. Enti ɔbea no kunu ne ne mma baanu no nyinaa wu gyaw no.  Bere a ɔwɔ Moab asaase so no, ɔtee sɛ Yehowa asan abɛhwɛ ne nkurɔfo ama wɔn aduan, enti ɔne ne nsenom siim sɛ wɔrefi Moab asaase so asan akɔ.  Otu fii baabi a na ɔne ne nsenom baanu no te no. Bere a wɔnam kwan so resan akɔ Yuda asaase so no,  Naomi ka kyerɛɛ ne nsenom baanu no sɛ: “Monsan, obiara nkɔ ne maame fie. Yehowa nna ɔdɔ a enni huammɔ adi nkyerɛ mo,+ sɛnea mo nso moada no adi akyerɛ mmarima a wɔawu no na moada no adi akyerɛ me no.  Yehowa mma munnya ahotɔ* wɔ mo kununom fie.”+ Afei ofifew wɔn ano, na wɔn nyinaa sui denneennen. 10  Ɛnna wɔka kyerɛɛ no sɛ: “Daabi, yɛne wo bɛkɔ wo nkurɔfo nkyɛn.” 11  Naomi nso kae sɛ: “Me mma, monsan. Dɛn nti na mopɛ sɛ mo ne me kɔ? Metumi asan awo mma ama moaware wɔn anaa?+ 12  Me mma, monsan. Monkɔ, na manyin dodo sɛ mɛware bio. Sɛ meka sɛ metumi anya kunu anadwo yi awo mma mpo a, 13  mubetumi atwɛn ama wɔanyinyin? Mubetumi atwɛn wɔn a morenware? Daabi, me mma. Mo asɛm yɛ me awerɛhow paa, efisɛ Yehowa ne me anni no yiye.”+ 14  Ɔkaa saa no, wɔsan sui denneennen, na Orpa few n’ase ano ne no dii nkra. Rut de, wansan; ɔbataa ne ho. 15  Enti Naomi ka kyerɛɛ no sɛ: “Hwɛ! Orpa asan kɔ ne nkurɔfo ne n’anyame nkyɛn. San na wo ne no nkɔ.” 16  Nanso Rut ka kyerɛɛ no sɛ: “Nhyɛ me sɛ minnyaw wo hɔ nsan nkɔ. Baabi a wobɛkɔ no, ɛhɔ na mɛkɔ, baabi a wobɛda no, ɛhɔ na mɛda. Wo man bɛyɛ me man, na wo Nyankopɔn ayɛ me Nyankopɔn.+ 17  Baabi a wubewu no, ɛhɔ ara na mewu, na ɛhɔ ara nso na wobesie me. Gye owu na ɛbɛtetew me ne wo ntam, anyɛ saa a Yehowa ntua me ka na ɔnsan mfa bi nka ho.” 18  Bere a Naomi hui sɛ Rut asi ne bo sɛ ɔne no bɛkɔ no, wanhyɛ no bio. 19  Enti wɔn baanu no toaa so koduu Betlehem.+ Bere a woduu Betlehem pɛ, kurom hɔfo nyinaa puw bɛhwɛɛ wɔn, na mmea no bisae sɛ: “Naomi ni?” 20  Ɛnna ɔka kyerɛɛ mmea no sɛ: “Mommfrɛ me Naomi.* Momfrɛ me Mara,* efisɛ ade nyinaa so Tumfo no ne me adi no nwenweenwene.+ 21  Mekɔɔ no ma, nanso Yehowa ama maba no nsapan. Dɛn nti na mofrɛ me Naomi, bere a Yehowa abrɛ me ase, na ade nyinaa so Tumfo no ama awie me bɔne yi?”+ 22  Saa na ɛyɛe a Naomi ne n’ase Rut a ɔyɛ Moabni no san fii Moab asaase so bae.+ Bere a woduu Betlehem no, na wɔafi ase retwa baali.*+

Ase Hɔ Nsɛm

Anaa “Bere a na atemmufo no hwɛ ma atɛntrenee kɔ so no.”
Ɛkyerɛ, “Me Nyankopɔn Ne Hene.”
Ɛkyerɛ, “Anika.”
Efi Hebri asɛmfua bi mu. Ebetumi akyerɛ, “nofoonofoo; ɔyareyare.”
Ɛkyerɛ, “Ne Nna Reba Awiei.”
Nt., “homebea.”
Ɛkyerɛ, “Anika.”
Ɛkyerɛ, “Nwenenwene.”
Ɛyɛ afifide bi a ɛte sɛ ɛmo.