Numeri 27:1-23

  • Selofehad mma mmea (1-11)

  • Woyii Yosua sɛ onsi Mose anan (12-23)

27  Na Selofehad mma mmea+ a wofi Yosef ba Manase abusuakuw mu no bae. Ná Selofehad papa ne Hefer, Hefer papa ne Gilead, Gilead papa ne Makir, Makir papa ne Manase. Selofehad mma mmea no din de Mahla, Noa, Hogla, Milka, ne Tirsa.  Wobegyinaa Mose ne ɔsɔfo Eleasar ne mpanyimfo no+ ne asafo no nyinaa anim wɔ ahyiae ntamadan no ano, na wɔkae sɛ:  “Yɛn papa wui wɔ sare no so, nanso nkurɔfo a wɔkaa wɔn ho boom sɔre tiaa Yehowa no, kyerɛ sɛ, Kora akyitaafo no,+ na ɔnka ho. Ɔno ara ne bɔne nti na owui, na na onni mma mmarima.  Adɛn nti na ɔbabarima a yɛn papa nni nti, ɛsɛ sɛ ne din yera fi n’abusua mu? Momma yɛn agyapade wɔ yɛn papa nuanom mu.”  Enti Mose de wɔn asɛm no kɔtoo Yehowa anim.+  Ɛnna Yehowa ka kyerɛɛ Mose sɛ:  “Asɛm a Selofehad mma mmea no reka no yɛ nokware. Enti sɛnea ɛte biara, ɛsɛ sɛ woma wɔn agyapade wɔ wɔn papa nuanom mu, na woma wɔn papa agyapade bedi wɔn nsam.+  Na ka kyerɛ Israelfo no sɛ, ‘Sɛ ɔbarima wu na onni ɔbabarima a, momfa n’agyapade mma ne babea.  Sɛ onni ɔbabea a, ɛnde momfa n’agyapade mma ne nua mmarima. 10  Na sɛ onni nua mmarima a, momfa n’agyapade mma ne papa nua mmarima. 11  Na sɛ ne papa nni nuabarima biara a, ɛnde momfa n’agyapade no mma ne busuani bi a ɔbɛn no paa.* Eyi bɛyɛ mmara ne atemmusɛm ama Israelfo, sɛnea Yehowa ka kyerɛɛ Mose no.’” 12  Na Yehowa ka kyerɛɛ Mose sɛ: “Foro kɔ bepɔw a ɛwɔ Abarim yi so,+ na kɔhwɛ asaase a mede bɛma Israelfo no.+ 13  Sɛ wuhu wie a, wɔde wo bɛkɔ akɔka wo nkurɔfo ho*+ sɛnea wɔyɛɛ wo nua Aaron no,+ 14  efisɛ bere a asafo no ne me hamee wɔ Sina sare so no, meka kyerɛɛ mo sɛ munni me ni wɔ asafo no anim mma wonhu sɛ meyɛ kronkron na momma wɔn nsu, nanso moyɛɛ asoɔden.+ Eyi ne Meriba nsu+ a ɛwɔ Kades+ wɔ Sina sare so+ no.” 15  Ɛnna Mose ka kyerɛɛ Yehowa sɛ: 16  “Yehowa, Onyankopɔn a woma nnipa nyinaa nkwa,* yi ɔbarima bi ma onni asafo yi anim, 17  ɔbarima a obedi wɔn anim akɔ aba, nea ɔde wɔn bepue akɔ na ɔde wɔn aba mu, na Yehowa asafo no anyɛ sɛ nguan a wonni hwɛfo.” 18  Enti Yehowa ka kyerɛɛ Mose sɛ: “Frɛ Nun ba Yosua, ɔbarima a otumi di nnipa anim* no, na fa wo nsa gu no so.+ 19  Afei fa no begyina ɔsɔfo Eleasar anim ne asafo no nyinaa anim, na yɛ no ɔkannifo wɔ wɔn anim.+ 20  Na fa wo tumi* no bi ma no,+ sɛnea ɛbɛyɛ a Israel asafo no nyinaa betie no.+ 21  Obegyina ɔsɔfo Eleasar anim, na Eleasar begyina n’ananmu de Urim* abisa Yehowa hɔ akwankyerɛ.*+ Sɛ ɔka sɛ wompue nkɔ a wɔbɛkɔ, na ɔka sɛ wɔmmra mu a wɔbɛba, ɔne Israelfo a wɔka ne ho nyinaa ne asafo no nyinaa.” 22  Enti Mose yɛɛ nea Yehowa ka kyerɛɛ no no. Na ɔfrɛɛ Yosua, na ɔde no begyinaa ɔsɔfo Eleasar anim ne asafo no nyinaa anim, 23  na ɔde ne nsa guu no so yɛɛ no ɔkannifo+ sɛnea Yehowa nam Mose so kae no.+

Ase Hɔ Nsɛm

Anaa “ne ho nipa a ɔne no fi mogya baako mu.”
Ɛyɛ kasakoa a egyina hɔ ma owu.
Nt., “woyɛ ɔhonam nyinaa ahonhom Nyankopɔn.”
Nt., “ɔbarima a honhom wɔ ne mu.”
Anaa “w’anuonyam.”
Hwɛ Nkyerɛkyerɛmu afã hɔ.
Anaa “atemmu.”