Numeri 12:1-16

  • Miriam ne Aaron sɔre tiaa Mose (1-3)

    • Mose dwo sen onipa biara (3)

  • Yehowa gyinaa Mose akyi (4-8)

  • Kwata yɛɛ Miriam (9-16)

12  Mose waree Kusni bea,+ na Kusni bea no nti, Miriam ne Aaron fii ase kasa tiaa Mose.  Wɔkae sɛ: “Adɛn, Mose nko ara na Yehowa nam no so kasa? Yɛn de, ɔmfa yɛn so nkasa bi anaa?”+ Ne nyinaa, na Yehowa retie.+  Ná Mose yɛ ɔbarima a odwo sen nnipa a wɔwɔ asaase so nyinaa.*+  Prɛko pɛ na Yehowa ka kyerɛɛ Mose ne Aaron ne Miriam sɛ: “Mumpue, mo baasa nyinaa, monkɔ ahyiae ntamadan no ho.” Enti wɔn baasa pue kɔe.  Na Yehowa faa omununkum dum no mu sian begyinaa ntamadan no ano,+ na ɔfrɛɛ Aaron ne Miriam. Na wɔn baanu kɔe.  Ɛnna ɔkae sɛ: “Mepa mo kyɛw, muntie me. Sɛ Yehowa diyifo bi wɔ mo mu a, anisoadehu mu na meyi me ho adi akyerɛ no,+ na ɔdae mu na mɛkasa akyerɛ no.+  Nanso ɛnyɛ saa na meyɛ m’akoa Mose! Mede me fi nyinaa ahyɛ ne nsa.*+  Me ne no kasa anim ne anim*+ ma ɔte biribiara ase; menkasa nkyerɛ no akasabebu mu.* Na Yehowa yi ne ho adi kyerɛ no. Enti adɛn na moansuro sɛ mobɛkasa atia m’akoa Mose?”  Enti Yehowa bo fuw wɔn denneennen, na ogyaw wɔn hɔ kɔe. 10  Afei omununkum no fii ntamadan no so, na hwɛ! Miriam na kwata ayɛ no fitaa sɛ sukyerɛmma yi.+ Ɛnna Aaron twaa n’ani hwɛɛ Miriam, na ohui sɛ kwata ayɛ no.+ 11  Ɛhɔ ara na Aaron ka kyerɛɛ Mose sɛ: “Me wura, mepa wo kyɛw! Mma wɔmfa bɔne yi ho asotwe mma yɛn so. Yɛadi nkwaseasɛm! 12  Mepa wo kyɛw, mma ɔnnkɔ so nnyɛ sɛ obi a ofi ne maame yafunu mu bae no na wawu ama ne fã asɛe!” 13  Ɛnna Mose fii ase su frɛɛ Yehowa sɛ: “O Onyankopɔn, mepa wo kyɛw, sa no yare! Mepa wo kyɛw!”+ 14  Ɛnna Yehowa ka kyerɛɛ Mose sɛ: “Sɛ ne papa na ɔtew ntasu guu n’anim a, anka n’anim rengu ase nnanson anaa? Ma wonyi no mfi asoɛe hɔ nkɔ asoɛe no akyi+ nnanson, na ɛno akyi no, mubetumi ama wɔasan de no aba hɔ.” 15  Enti woyii Miriam kɔɔ asoɛe no akyi nnanson,+ na nkurɔfo no antu amfi asoɛe hɔ kosii sɛ wɔde Miriam san baa hɔ. 16  Ɛno akyi no, ɔman no tu fii Haserot,+ na wofii ase kyekyee wɔn asoɛe wɔ Paran sare so.+

Ase Hɔ Nsɛm

Anaa “ɔbrɛ ne ho ase paa sen onipa biara wɔ asaase so.”
Nt., “Me fi nyinaa, wakyerɛ sɛ ɔyɛ ɔnokwafo.”
Nt., “ano ne ano.”
Anaa “mento aborɔme nkyerɛ no.”