Malaki 3:1-18

  • Awurade nokwafo no bɛba abɛtew n’asɔrefi hɔ (1-5)

    • Apam no somafo no (1)

  • Wɔhyɛɛ wɔn nkuran sɛ wɔnsan mmra Yehowa nkyɛn (6-12)

    • Yehowa nsakra (6)

    • “Monsan mmra me nkyɛn, na me nso mɛsan aba mo nkyɛn” (7)

    • ‘Momfa ntotoso du du no nyinaa mmra, na Yehowa behwie nhyira agu mo so’ (10)

  • Atreneefo ne abɔnefo (13-18)

    • Wɔkyerɛw nkae nhoma bi wɔ Onyankopɔn anim (16)

    • Nsonsonoe a ɛda onipa trenee ne onipabɔnefo ntam (18)

3  “Hwɛ! Meresoma me somafo, na obedi m’anim asiesie kwan mu.*+ Na mpofirim ara na nokware Awurade a morehwehwɛ no no bɛba n’asɔrefi hɔ,+ na apam no somafo a mo ani agyina no no bɛba. Hwɛ! Sɛnea ɛte biara ɔbɛba,” asafo Yehowa asɛm ni.  “Nanso da a ɔbɛba no, hena na obetumi atintim? Na sɛ oyi ne ti a, hena na obetumi agyina? Efisɛ ɔbɛyɛ te sɛ ogya a wɔde nan dade yiyi mu fĩ, na ɔbɛyɛ sɛ samina* a wɔde horo nneɛma.+  Na ɔbɛtena ase te sɛ obi a ɔnan dwetɛ yiyi mu fĩ,+ na obeyiyi Lewifo mu fĩ. Ɔbɛtew wɔn ho te sɛ sika kɔkɔɔ ne dwetɛ, na wɔbɛba abɛyɛ nnipa a wɔde akyɛde afɔre brɛ Yehowa wɔ trenee mu.  Afei Yehowa ani begye Yuda ne Yerusalem akyɛde afɔre ho te sɛ tete mmere no, te sɛ mfe a atwam no.+  “Mɛba mo nkyɛn abebu atɛn, na mede ahoɔhare bedi adanse atia asumanfo,+ ne awaresɛefo, ne wɔn a wɔka ntam hunu,+ ne wɔn a wɔbɔ apaafo apoo,+ ne wɔn a wosisi akunafo ne nnyanka,+ na medi adanse atia wɔn a wɔmmoa ahɔho.*+ Saa nkurɔfo no nsuro me,” asafo Yehowa asɛm ni.  “Efisɛ mene Yehowa; mensakra.*+ Na mone Yakob mma; munnya nsae.  Efi mo agyanom bere so na moman fii m’ahyɛde ho, na moanni so.+ Monsan mmra me nkyɛn, na me nso mɛsan aba mo nkyɛn,”+ asafo Yehowa asɛm ni. Nanso mubisa sɛ: “Ɔkwan bɛn so na yɛnsan mmra?”  “Mohwɛ a, onipa dasani betumi abɔ Onyankopɔn korɔn? Nanso mobɔ me korɔn.” Na mubisa sɛ: “Ɛdɛn na yɛayɛ de abɔ wo korɔn?” “Mobɔ me korɔn wɔ ntotoso du du* ne afɔrebɔde mu.  Wɔadome mo,* efisɛ mobɔ me korɔn. Yiw, ɔman mu no nyinaa bɔ me korɔn. 10  Momfa ntotoso du du* no nyinaa mmra adekoradan mu,+ sɛnea ɛbɛyɛ a aduan bɛwɔ me fi.+ Mepa mo kyɛw, momfa eyi nsɔ me nhwɛ, sɛ meremmue ɔsoro mfɛnsere mma mo,+ na merenhwie nhyira ngu mo so mma emmu mo so anaa,”+ asafo Yehowa anom asɛm ni. 11  “Na metwiw ɔsɛefo* no anim ama mo, na ɔrensɛe mo asaase so aba, na aba rensa wɔ bobe a ɛwɔ mo afuw mu no so,”+ asafo Yehowa asɛm ni. 12  “Na aman nyinaa bɛka sɛ mowɔ anigye,+ efisɛ mobɛyɛ anigye asaase,” asafo Yehowa asɛm ni. 13  Yehowa se: “Moakasa atia me yayaayaw.” Na mubisa sɛ: “Ɛdɛn na yɛayɛ a ɛkyerɛ sɛ yɛakasa atia wo?”+ 14  “Moka sɛ, ‘Mfaso biara nni so sɛ yɛbɛsom Onyankopɔn.+ Bere a yɛnantewee mmɔbɔmmɔbɔ wɔ asafo Yehowa anim na yedii n’ahyɛde so yi, mfaso bɛn na yɛanya? 15  Efi saa bere yi rekɔ yi, yɛbɛka sɛ ahantanfo na wɔn ani gye. Afei nso, wɔn a wodi bɔne no na esi wɔn yiye.+ Wosi wɔn bo sɔ Onyankopɔn hwɛ, nanso wɔfa wɔn ho di.’” 16  Saa bere no, wɔn a wosuro Yehowa no ne wɔn ho kasae; obiara ne ne yɔnko kasae, na Yehowa yɛɛ aso, na otiee nea wɔkae no. Na wɔkyerɛw nkae nhoma bi wɔ n’anim.+ Ɛfa wɔn a wosuro Yehowa ne wɔn a wodwinnwen ne din ho* no ho.+ 17  Asafo Yehowa asɛm ni: “Ɛda a mede wɔn bɛyɛ agyapade titiriw*+ no, wɔbɛyɛ me dea.+ Na me yam bɛhyehye me ama wɔn, sɛnea agya yam hyehye no ma ne babarima a ɔsom no no.+ 18  Afei mobɛsan ahu nsonsonoe a ɛda onipa trenee ne onipabɔnefo ntam,+ ne nea ɔsom Onyankopɔn ne nea ɔnsom no no ntam.”

Ase Hɔ Nsɛm

Anaa “obedi m’anim apae kwan.”
Anaa “gyakisi.”
Anaa “wɔn a wotiatia ahɔho fahodi so.”
Anaa “mensakrae.”
Anaa “taet.”
Ebetumi nso akyerɛ, “Nnome na mode dome me.”
Anaa “taet.”
Ɛbɛyɛ sɛ ɛyɛ ntummoa a wɔsɛe ade.
Anaa “wosusuw ne din ho.” Ebetumi nso akyerɛ, “wɔn a ne din som bo ma wɔn.”
Anaa “agyapade a ɛda me koma so.”