Leviticus 19:1-37

  • Mmara ahorow a ɛbɛma wɔayɛ kronkron (1-37)

    • Ɔkwampa a wɔbɛfa so atwa wɔn nnɔbae (9, 10)

    • Dwen nea n’aso asiw ne nea n’ani afura ho (14)

    • Nsɛe wo yɔnko din (16)

    • Nnya obiara ho menasepɔw (18)

    • Nkonyaayi ne ahonhonsɛm yɛ akyiwade (26, 31)

    • Obiara nni ho kwan sɛ ɔyeyɛ ahyɛnsode wɔ ne honam ani (28)

    • Nya obu ma nkwakoraa ne mmerewa (32)

    • Sɛnea ɛsɛ sɛ wɔne ahɔho tena (33, 34)

19  Yehowa toaa so ka kyerɛɛ Mose sɛ:  “Ka kyerɛ Israel asafo nyinaa sɛ, ‘Monyɛ kronkron, efisɛ me Yehowa mo Nyankopɔn, meyɛ kronkron.+  “‘Obiara nnya obu* mma ne maame ne ne papa,+ na munni me home nna.+ Mene Yehowa mo Nyankopɔn.  Munnni anyamehunu akyi,+ na monnyɛ dade ahoni biara.+ Mene Yehowa mo Nyankopɔn.  “‘Sɛ morebɔ asomdwoe afɔre ama Yehowa a,+ monyɛ no sɛnea ɛbɛsɔ n’ani.+  Sɛ mobɔ afɔre a, munni no saa da no ara anaa n’adekyee. Sɛ ebi ka ma edi nnansa a, momfa ogya nhyew.+  Sɛ edi nnansa na obi di a, ɛyɛ atantanne. Nhyira biara nnim.  Nea obedi no, wayɛ bɔne, na obenya ne bɔne so akatua, efisɛ wagu Yehowa nneɛma kronkron ho fĩ. Ɛsɛ sɛ wokum no.*  “‘Sɛ moretwa mo asaase so nnɔbae a, munntwa nea ɛwɔ afuw no anoano no nyinaa, na monnsesaw nea aka ase no.+ 10  Na wutwa wo bobefuw* mu aba nso a, ɛnsɛ sɛ wosesaw aba a aka ase anaa nea agugu fam no. Gyaw ma ahiafo*+ ne ahɔho a wɔabɛsoɛ mo mu no. Mene Yehowa mo Nyankopɔn. 11  “‘Mommmɔ korɔn,+ monnnaadaa obiara,+ na munntwa mo yɔnko nkontompo. 12  Mommfa me din nnka atoro ntam+ na moangu mo Nyankopɔn din ho fĩ. Mene Yehowa. 13  Nsisi wo yɔnko,+ na mmɔ nkurɔfo apoo.+ Mfa ɔpaani akatua nto wo ho mma ade nkye so.+ 14  “‘Nnome obi a n’aso asiw,* na mfa biribi nsi onifuraefo kwan mu.+ Suro wo Nyankopɔn.+ Mene Yehowa. 15  “‘Monhwɛ na moammu atɛnkyea. Sɛ moredi ohiani asɛm a, monnhwɛ ne hia ho nnkogyina n’afã, na moredi ɔdefo asɛm nso a, monnhwɛ ne sika ho nnkogyina n’afã.+ Mummu atɛntrenee mma mo yɔnko. 16  “‘Nkyinkyin nsɛe wo yɔnko din.+ Na mfa wo yɔnko nkwa* nto asiane mu.*+ Mene Yehowa. 17  “‘Nnya wo nua ho tan wɔ wo komam.+ Nea ɛte biara wo ne wo yɔnko no nkasa,+ na woansoa ne bɔne no bi. 18  “‘Obi yɛ biribi tia wo a, ntua no so ka,+ na nnya wo nkurɔfo ho menasepɔw. Dɔ wo yɔnko sɛ wo ho.+ Mene Yehowa. 19  “‘Munni m’ahyɛde yi so: Mommma mo afieboa a ɛsono wɔn mu biara mmforo wɔn ho. Munnnua aba abien a ɛsono emu biara wɔ afuw baako mu,+ na monnhyɛ ataade a wɔde nhama ahorow abien afra anwene.+ 20  “‘Sɛ ɔbarima bi ne afenaa a wɔde no rema ɔbarima foforo da, na sɛ wɔntɔɔ ɔbea no mfii nkoasom mu anaa onnya nnee ne ho a, ɛsɛ sɛ wonya ho asotwe. Nanso ɛnsɛ sɛ wokum wɔn, efisɛ ɔbea no nnya nnee ne ho. 21  Ɔbarima no mfa odwennini mmrɛ Yehowa wɔ ahyiae ntamadan no kwan ano mma wɔmfa mmɔ afodi afɔre.+ 22  Ɔsɔfo no de odwennini no bɛbɔ afodi afɔre wɔ Yehowa anim de apata ne bɔne, na wɔde ne bɔne no bɛkyɛ no. 23  “‘Sɛ mudu asaase no so na mudua dua biara a mubedi so aba a, ɛsɛ sɛ mubu dua no sɛ ɛso aba ho ntew, na wɔabara.* Ebesi hɔ mfe abiɛsa sɛ dua a wɔabara.* Ɛnsɛ sɛ mudi bi. 24  Nanso afe a ɛto so anan no, dua no so aba nyinaa bɛyɛ kronkron, na ɛbɛyɛ bere a mubedi ahurusi wɔ Yehowa anim.+ 25  Afei edu afe a ɛto so anum no a, mubetumi adi n’aba no bi, na mode aka nnɔbae a mutwa no ho. Mene Yehowa mo Nyankopɔn. 26  “‘Munnni biribiara a mogya da so wom.+ “‘Monnkɔ abisa, na munnni nkonyaayi akyi.+ 27  “‘Munnyi* mo asontɔrem nwi, na munntwitwa mo abogyesɛ ano nnsɛe no.+ 28  “‘Munntwitwa mo ho akam mmma obi* a wawu,+ na monnyeyɛ ahyɛnsode* wɔ mo honam ani. Mene Yehowa. 29  “‘Mma wo babea nnnan tuutuuni+ nngu n’anim ase, na amma asaase no ammɔ aguaman, na ɔbrabɔne anhyɛ so ma.+ 30  “‘Munni me home nna,+ na munni me tenabea kronkron no ni.* Mene Yehowa. 31  “‘Monnkɔ akɔmfo anaa asumanfo nkyɛn+ na mo ho angu fĩ. Mene Yehowa mo Nyankopɔn. 32  “‘Sɔre fa nidi ma nea wafuw dwen,+ di akwakoraa ni,+ na suro wo Nyankopɔn.+ Mene Yehowa. 33  “‘Sɛ ɔhɔho bɛsoɛ mo asaase so a, monntan n’ani.+ 34  Mummu ɔhɔho a wabɛsoɛ mo mu no sɛ kuromanni,+ na monnɔ no sɛ mo ho, efisɛ mo nso na moyɛ ahɔho wɔ Egypt asaase so.+ Mene Yehowa mo Nyankopɔn. 35  “‘Sɛ moresusuw biribi oo, morekari oo, morehyɛ oo, mommma nnaadaa mmma mu.+ 36  Sɛ mode nsenia,* nkaribo, anaa susukuruwa* resusuw ade a, momfa nea ɛyɛ pɛpɛɛpɛ nsusuw.+ Mene Yehowa mo Nyankopɔn a ɔde mo fi Egypt asaase so bae no. 37  Enti munni m’ahyɛde ne m’atemmusɛm nyinaa so, na monyɛ nea maka nyinaa.+ Mene Yehowa.’”

Ase Hɔ Nsɛm

Nt., “osuro.”
Anaa “Wobetwa saa ɔkra no afi ne man mu.”
Anaa “bobeturo.”
Anaa “mmɔborɔwafo.”
Anaa “Mfrɛ mmusu mma obi a n’aso asiw so.”
Nt., “mogya.”
Ebetumi nso akyerɛ, “Sɛ wuhu sɛ wo yɔnko nkwa da asiane mu a, nyi w’ani nto nkyɛn.”
Anaa “te sɛ obi a wontwaa ne dua.”
Nt., “wontwaa no twetia.”
Anaa “Munntwitwa.”
Anaa “ɔkra.” Hebri asɛmfua ne′phesh a ɛwɔ ha no kyerɛ obi a wawu.
Anaa “tatuu.”
Nt., “munsuro me tenabea kronkron.”
Ade a wɔde susuw biribi mu duru.
Nt., “efa ne hin susude.” Hwɛ Nkh. B14.