Hiob 1:1-22

  • Ná Hiob ho nni asɛm, na na ɔwɔ agyapade (1-5)

  • Satan kae sɛ ɛnyɛ adwempa na Hiob de som Onyankopɔn (6-12)

  • Hiob agyapade sɛee, na ne mma wuwui (13-19)

  • Hiob ammɔ Onyankopɔn sobo (20-22)

1  Ɔbarima bi tenaa Us asaase so a wɔfrɛ no Hiob.*+ Ná ɔyɛ onipa a ɔteɛ* a n’abrabɔ di mu,+ osuro Onyankopɔn, na ɔtwe ne ho fi bɔne ho.+  Ɔwoo mma mmarima baason ne mma mmea baasa.  Ná ne nyɛmmoa yɛ nguan 7,000, yoma 3,000, anantwi 1,000,* mfurum* 500, ne nkoa bebree paa. Enti ɔbɛyɛɛ onipa titiriw sen nnipa a ɛwɔ Apuei fam nyinaa.  Ná ne mma mmarima no biara tow pon wɔ ɔno ara ne fi; obiara wɔ ne da. Sɛ da no du hɔ a, wɔfrɛ wɔn nua mmea baasa no ma wɔne wɔn bedidi nom.  Sɛ wɔn nyinaa tow pon na ɛkɔ besi a, Hiob soma ma wɔkɔfrɛ wɔn ba sɛ ɔrebɛtew* wɔn ho. Ná Hiob sɔre anɔpatutuutu bɔ ɔhyew afɔre+ ma wɔn mu biara, efisɛ ɔkae sɛ: “Ebia na me mma no ayɛ bɔne, na wɔadome Onyankopɔn wɔ wɔn koma mu.” Saa na na Hiob yɛ daa.+  Ɛbae sɛ da bi, nokware Nyankopɔn mma*+ no begyinagyinaa Yehowa anim,+ na Satan+ nso fraa wɔn mu bae bi.+  Ɛnna Yehowa bisaa Satan sɛ: “Ɛhe na wufi reba?” Satan buaa Yehowa sɛ: “Mifi asaase so akyinkyinakyinkyin ne ɛso anantenantew na mereba.”+  Ɛnna Yehowa bisaa Satan sɛ: “Woadwen m’akoa Hiob ho* anaa? Obiara nte sɛ ɔno wɔ asaase so. Ɔyɛ onipa a ɔteɛ* a n’abrabɔ di mu,+ osuro Onyankopɔn, na ɔtwe ne ho fi bɔne ho.”  Ɛnna Satan buaa Yehowa sɛ: “Wugye di sɛ Hiob suro Onyankopɔn kwa?+ 10  Ɛnyɛ wo na woabɔ ɔno ne ne fi ne nea ɔwɔ nyinaa ho ban ahyia?+ Woahyira ne nsa ano adwuma so,+ na ne nyɛmmoa nso, wɔn ase atrɛw asaase so. 11  Wopɛ a, teɛ wo nsa ka nea ɔwɔ nyinaa, na hwɛ sɛ ɔrennyina w’anim nnome wo anaa.” 12  Ɛnna Yehowa ka kyerɛɛ Satan sɛ: “Hwɛ! Nea ɔwɔ biara hyɛ wo nsa. Ɔno ankasa de, mfa wo nsa nka no!” Enti Satan fii Yehowa anim kɔe.+ 13  Ɛbae sɛ da bi, na Hiob mma mmarima ne ne mma mmea no redidi, na na wɔrenom nsã wɔ wɔn nua panyin no fi.+ 14  Ɛnna obi baa Hiob nkyɛn bɛkae sɛ: “Bere a anantwi no refuntum asaase no a mfurum no redidi wɔ wɔn nkyɛn no, 15  Sabafo bɛtow hyɛɛ wɔn so faa wɔn kɔe, na asomfo no nso, wɔde sekan kunkum wɔn. Me nko ara na matumi aguan afi mu aba sɛ merebɛka akyerɛ wo.” 16  Bere a ogu so rekasa no, obi foforo bae bɛkae sɛ: “Onyankopɔn gya* fi soro abɛtɔ nguan no mu ahyew wɔne asomfo no nyinaa! Me nko ara na matumi aguan afi mu aba sɛ merebɛka akyerɛ wo.” 17  Bere a ɔno nso gu so rekasa no, obi foforo nso bae bɛkae sɛ: “Kaldeafo+ akyɛ wɔn mu akuw abiɛsa abɛtow ahyɛ yoma no so afa wɔn kɔ, na asomfo no nso, wɔde sekan akunkum wɔn. Me nko ara na matumi aguan afi mu aba sɛ merebɛka akyerɛ wo.” 18  Bere a ɔno nso gu so rekasa no, obi foforo nso san bae bɛkae sɛ: “Ná wo mma mmarima ne wo mma mmea no redidi, na na wɔrenom nsã wɔ wɔn nua panyin no fi. 19  Prɛko pɛ, mframa kɛse bi bɔ fii sare so bɛbɔɔ ofi no ntwea anan no, na edwiriw guu wo mma no so kunkum wɔn. Me nko ara na matumi aguan afi mu aba sɛ merebɛka akyerɛ wo.” 20  Ɛnna Hiob sɔree, na osuan n’ataade mu, na otwitwaa ne ti nwi. Afei ɔbɔɔ ne mu ase, na ɔde n’anim butuw fam, 21  na ɔkae sɛ: “Adagyaw* na mede fi me maame yam bae,Na adagyaw na mɛsan de akɔ.+ Yehowa na ɔde mae,+ Yehowa na wagye. Ayeyi nka Yehowa din daa.” 22  Eyi nyinaa mu no, Hiob anyɛ bɔne, na wammɔ Onyankopɔn sobo sɛ wayɛ ade bɔne.*

Ase Hɔ Nsɛm

Ebetumi akyerɛ, “Nea Wɔtan No.”
Anaa “onipa a ne ho nni asɛm.”
Nt., “anantwi mpamho 500.”
Nt., “mfurum abere.”
Anaa “ɔrebedwira.”
Ɛyɛ Hebri kasakoa a ɛkyerɛ Onyankopɔn abɔfo.
Nt., “Wode wo koma asi m’akoa Hiob so.”
Anaa “onipa a ne ho nni asɛm.”
Ebetumi nso akyerɛ, “Anyinam.”
Anaa “Kwaterekwa.”
Anaa “wanka sɛ Onyankopɔn ayɛ biribi a enye.”