Genesis 48:1-22

  • Yakob hyiraa Yosef mma baanu (1-12)

  • Efraim nyaa nhyira pii (13-22)

48  Bere bi akyi no, wɔka kyerɛɛ Yosef sɛ: “Hwɛ, wo papa ayɛ mmerɛw.” Ɔtee saa no, ɔfaa Manase ne Efraim, ne mma baanu no, ne wɔn kɔɔ hɔ.+  Ɛnna wɔka kyerɛɛ Yakob sɛ: “Wo ba Yosef aba wo nkyɛn.” Enti Israel miaa n’ani sɔre tenaa ne mpa so.  Na Yakob ka kyerɛɛ Yosef sɛ: “Ade nyinaa so Tumfo Nyankopɔn yii ne ho adi kyerɛɛ me wɔ Lus wɔ Kaanan asaase so, na ohyiraa me.+  Na ɔka kyerɛɛ me sɛ, ‘Mɛma w’ase atrɛw ayɛ bebree, na mɛma woabɛyɛ aman asafodɔm.+ Mede asaase yi bɛma w’asefo* a wobedi w’akyi aba, na ayɛ wɔn agyapade daa.’+  Hwɛ, wo mma baanu a wowoo wɔn wɔ Egypt ansa na mereba wo nkyɛn wɔ Egypt ha no yɛ me dea.+ Efraim ne Manase bɛyɛ m’ankasa me mma te sɛ Ruben ne Simeon.+  Na mma a wubenya wɔ wɔn akyi no na wɔbɛyɛ wo dea. Na agyapade a wɔn nuanom baanu no din da so no, ɛno bi na wobenya.+  Me de, bere a mifi Padan reba no, Rahel wu too me so+ wɔ Kaanan asaase so. Ná baabi a yɛadu no ne Efrat+ ntam twe kakra, enti misiee no Efrat anaasɛ Betlehem+ kwan so.”  Afei Israel huu Yosef mma no, na obisae sɛ: “Henanom ni?”  Yosef buaa ne papa sɛ: “Mma a Onyankopɔn ama manya wɔ ha ni.”+ Ɛnna ɔkae sɛ: “Mesrɛ wo, fa wɔn brɛ me na minhyira wɔn.”+ 10  Onyin nti, na Israel ani so ayɛ no wusiwusi, na na onhu ade yiye. Enti ɔde wɔn bɛn no na ofew wɔn ano bam wɔn. 11  Israel ka kyerɛɛ Yosef sɛ: “Mansusuw da sɛ mehu w’anim bio,+ nanso hwɛ sɛ Onyankopɔn ama mahu w’asefo* mpo aka wo ho.” 12  Afei Yosef yii wɔn fii Israel anim,* na ɔbɔɔ ne mu ase de n’anim butuw fam. 13  Ɛnna Yosef de ne nsa nifa soo Efraim+ mu gyinaa Israel benkum, na ɔde ne nsa benkum soo Manase+ mu gyinaa Israel nifa, na ɔmaa wɔn baanu bɛn no. 14  Nanso Israel de ne nsa nifa too Efraim a ɔyɛ akumaa no mmom ti so, na ɔde ne nsa benkum too Manase ti so. Manase na na ɔyɛ panyin,+ nanso ɔhyɛɛ da na ɔyɛɛ no saa. 15  Ɛnna ohyiraa Yosef kae sɛ:+ “Nokware Nyankopɔn no a m’agyanom Abraham ne Isak nantew n’anim,+ Nokware Nyankopɔn no a wahwɛ me so me nkwa nna nyinaa abesi nnɛ;+ 16  Nea ɔnam ne bɔfo so yii me fii m’ahohia nyinaa mu no,+ ɔno na onhyira mmofra yi.+ Ma wɔmfa me din ne m’agyanom Abraham ne Isak din nto wɔn so, Na ma wɔnnɔre nyɛ bebree wɔ asaase so.”+ 17  Bere a Yosef hui sɛ ne papa de ne nsa nifa ato Efraim ti so no, n’ani annye ho, enti ɔyɛe sɛ ɔreyi ne papa nsa afi Efraim ti so de ato Manase ti so. 18  Yosef ka kyerɛɛ ne papa sɛ: “Papa, nyɛ no saa, efisɛ oyi ne ɔpanyin.+ Fa wo nsa nifa to ɔno mmom ti so.” 19  Nanso ne papa antie, na ɔkae sɛ: “Minim saa, me ba, minim saa. Ɔno nso bɛyɛ ɔman, na ɔbɛyɛ kɛse. Nanso ne nua kumaa no bɛyɛ kɛse asen no,+ na n’asefo* bɛyɛ sɛ aman pii.”+ 20  Enti saa da no, ɔtoaa so hyiraa wɔn+ sɛ: “Ma Israelfo mfa wo din nhyira wɔn ho nka sɛ, ‘Onyankopɔn nyɛ wo sɛ Efraim ne Manase.’” Enti sɛ ohyira wɔn biara a, ɔde Efraim di Manase anim. 21  Afei Israel ka kyerɛɛ Yosef sɛ: “Hwɛ, merebewu,+ nanso Onyankopɔn bɛka mo ho daa, na ɔde mo bɛsan akɔ mo agyanom asaase so.+ 22  Na asaase a mede me sekan ne m’agyan gye fii Amorifo hɔ no, mede baako bɛka wo de ho ma ayɛ kɛse asen wo nuanom de.”

Ase Hɔ Nsɛm

Nt., “w’aba.”
Nt., “w’aba.”
Nt., “Israel nkotodwe ho.”
Nt., “n’aba.”