Ester 4:1-17

  • Mordekai dii awerɛhow (1-5)

  • Mordekai ka kyerɛɛ Ester sɛ ɔnkɔsrɛ mma wɔn (6-17)

4  Bere a Mordekai+ tee nea asi nyinaa no,+ osuan n’ataade mu, na ofuraa awerɛhow ntama* de nsõ guu ne ho. Afei opue kogyinaa kurow no mfinimfini, na osui paa; osui yayaayaw.  Ɔkɔe koduu ɔhene no pon ano, nanso wantra, efisɛ na ɛnsɛ sɛ obiara de awerɛhow ntama wura ɔhene pon no mu.  Na ɔmantam biara+ a wɔtee ɔhene asɛm ne ne mmara no wɔ hɔ no, Yudafo a ɛwɔ hɔ no dii awerɛhow paa, wɔyɛɛ akɔnkyen,*+ na wosu teɛteɛɛm. Wɔn mu pii dedaa awerɛhow ntama* so ne nsõ mu.+  Bere a Ester mmaawa ne n’asomfo* no bɛka kyerɛɛ no no, asɛm no haw ɔhemmaa paa. Ɛnna ɔsoma ma wɔde ntaade kɔmaa Mordekai sɛ ɔnhyɛ na onyi awerɛhow ntama* no, nanso wannye.  Ɛnna Ester frɛɛ Hatak, ɔhene asomfo* no baako a ɔhene ayi no sɛ ɔnsom no no, na ɔka kyerɛɛ no sɛ onkobisa Mordekai nea enti a ɔreyɛ saa ne nea asi.  Enti Hatak kɔɔ Mordekai nkyɛn wɔ kurow no abɔnten so wɔ ɔhene pon no anim.  Na Mordekai kaa nea ato no nyinaa kyerɛɛ no, na sika dodow+ a Haman ahyɛ bɔ sɛ obetua agu ɔhene foto mu sɛ wɔmfa nsɛe Yudafo no nso, ɔka kyerɛɛ no.+  Afei nso, mmara a wɔkyerɛwee wɔ krataa so a wɔhyɛe wɔ Susan*+ sɛ wɔnhyew wɔn ase no, ɔde bi maa no. Ɔkae sɛ ɔmfa nkyerɛ Ester, na ɔnkyerɛkyerɛ mu nkyerɛ no, na ɔnka nkyerɛ no sɛ+ ɔnkɔ ɔhene anim nkɔsrɛ no sɛ onhu wɔn mmɔbɔ, na ɔmpa kyɛw mma ne manfo.  Afei Hatak san bae, na ɔbɛkaa nea Mordekai kae no kyerɛɛ Ester. 10  Ɛnna Ester somaa Hatak sɛ ɔnkɔka nkyerɛ Mordekai+ sɛ: 11  “Ɔhene nkoa ne nnipa a ɛwɔ ɔhene no amantam mu nim sɛ, sɛ ɔhene mfrɛɛ wo na wokɔ n’anim wɔ ahemfi hɔ+ a, ɔbarima oo, ɔbea oo, mmara baako pɛ na ɛwɔ hɔ: Wobekum wo; sɛ wubenya wo ti adidi mu a, gye sɛ ɔhene de ne sika kɔkɔɔ poma kyerɛ wo so ansa.+ Nanso nnafua 30 ni, ɔhene mfrɛɛ me sɛ memmra ne nkyɛn.” 12  Bere a wɔkɔkaa Ester asɛm no kyerɛɛ Mordekai no, 13  ɔde mmuae kɔmaa Ester sɛ: “Mma w’adwene nnyɛ wo sɛ wote ahemfi nti nea ɛbɛba Yudafo a aka nyinaa so no, ebi rentumi nka wo. 14  Sɛ woanka ho hwee saa bere yi a, Yudafo benya ogye ne mmoa afi baabi foforo,+ na wo ne wo papa fifo de, mubewuwu. Na hena na onim, ebia eyi* nti na woabɛyɛ ɔdehye yi.”+ 15  Ɛnna Ester soma kɔka kyerɛɛ Mordekai sɛ: 16  “Kɔ na kɔboaboa Yudafo a wɔwɔ Susan* nyinaa ano, na monyɛ akɔnkyen+ mma me. Munnnidi na monnnom nnansa,+ awia ne anadwo. Me nso me ne me mmaawa bɛyɛ akɔnkyen. Mmara mma kwan sɛ mekɔ ɔhene anim, nanso mɛkɔ; miwu a, na mawu.” 17  Enti Mordekai siim kɔe, na ɔkɔyɛɛ nea Ester kae sɛ ɔnyɛ nyinaa.

Ase Hɔ Nsɛm

Anaa “atweaatam.” Hwɛ Nkyerɛkyerɛmu afã hɔ.
Anaa “wodii mmuada.”
Anaa “atweaatam.” Hwɛ Nkyerɛkyerɛmu afã hɔ.
Anaa “n’asomfo a wɔasa wɔn.”
Anaa “atweaatam.” Hwɛ Nkyerɛkyerɛmu afã hɔ.
Anaa “asomfo a wɔasa wɔn.”
Anaa “Susa.”
Anaa “amanehunu bere sɛɛ.”
Anaa “Susa.”