Daniel 1:1-21

  • Babilonfo betwaa Yerusalem ho hyiae (1, 2)

  • Wɔmaa mmabun a wɔyɛ adehye no ntetee soronko (3-5)

  • Wɔsɔɔ Hebrifo baanan bi hwɛe sɛ wobedi nokware anaa (6-21)

1  Yuda hene Yehoiakim+ ahenni afe a ɛto so abiɛsa mu no, Babilon hene Nebukadnesar baa Yerusalem, na ɔbɛkaa Yerusalemfo hyɛɛ kurow no mu.+  Bere bi akyi no, Yehowa de Yuda hene Yehoiakim hyɛɛ ne nsa,+ na ɔde nokware Nyankopɔn no fi* nneɛma no bi nso hyɛɛ ne nsa, na ɔde kɔɔ ne nyame fi* wɔ Sinar* asaase so.+ Ɔde nneɛma no koguu ne nyame adekoradan mu.+  Na ɔhene no ka kyerɛɛ n’ahemfi panyin Aspenas sɛ ɔmfa Israelfo* no bi mmra, ahemfo asefo ne adehye nyinaa bi.+  Ná ɛsɛ sɛ wɔyɛ mmabun* a dɛm biara nni wɔn ho, mmabun a wɔn ho yɛ fɛ a wɔwɔ nyansa, nimdeɛ, ne nhumu,+ a wobetumi asom wɔ ahemfi hɔ. Ɔhene kae sɛ ɔnkyerɛ wɔn Kaldeafo nkyerɛwee ne wɔn kasa.  Afei nso, ɔhene kae sɛ wɔmma wɔn ɔhene nnuan ne ne nsã a ɔnom no bi da biara. Ɔkae sɛ wɔntete wɔn* mfe abiɛsa, na sɛ mfe abiɛsa no so a, wɔabɛsom ɔhene.  Ná wɔn mu bi fi Yuda abusuakuw* no mu. Wɔn ne: Daniel,*+ Hanania,* Misael,* ne Asaria.*+  Na ahemfi panyin no totoo wɔn din;* ɔtoo Daniel din Beltesasar,+ ɔtoo Hanania din Sadrak, ɔtoo Misael din Mesak, na ɔtoo Asaria din Abednego.+  Daniel sii pi wɔ ne komam sɛ ɔremfa ɔhene nnuan anaa ne nsã a ɔnom no ngu ne ho fĩ. Enti ɔsrɛɛ ahemfi panyin no sɛ, ɔmpene so mma no na wamfa saa nneɛma no angu ne ho fĩ.  Na nokware Nyankopɔn no maa ahemfi panyin no yɛɛ Daniel adom,* na ohuu no mmɔbɔ.+ 10  Nanso ahemfi panyin no ka kyerɛɛ Daniel sɛ: “Misuro me wura ɔhene a wakyerɛ aduan ne nsã a wɔmfa mma mo no. Sɛ ohu sɛ moafonfɔn sen mo atipɛnfo mmabun* a aka no a, mɛyɛ dɛn? Mobɛma madi fɔ* wɔ ɔhene anim.” 11  Ɛnna Daniel ka kyerɛɛ ɔpanyin a ahemfi panyin no de no asi Daniel, Hanania, Misael, ne Asaria so no sɛ: 12  “Yɛpa wo kyɛw, sɔ wo nkoa hwɛ nna du, na ma wɔmma yɛn nhabamma* nni na wɔmma yɛn nsu nnom; 13  ɛno akyi no, hwɛ yɛn na hwɛ mmabun* a wodi ɔhene nnuan no, na sɛnea wubehu no no, wo ne wo nkoa nni no saa.” 14  Enti ɔpenee nea wɔkae no so, na ɔsɔɔ wɔn hwɛe nna du. 15  Bere a nna du no soe no, na wɔn ho ayɛ fɛ, na na wɔwɔ ahoɔden* sen mmabun* a na wodi ɔhene nnuan no nyinaa. 16  Enti daa, na ɔpanyin a ɔhwɛ wɔn no yi ɔhene nnuan ne nsã a wɔde ma wɔn no fi hɔ, na na ɔma wɔn nhabamma.* 17  Na nokware Nyankopɔn no maa mmabun* baanan yi nyaa nkyerɛwee* ne nyansa nyinaa mu nimdeɛ ne nhumu; na ɔmaa Daniel nyaa anisoadehu ne adae nyinaa mu ntease.+ 18  Bere a ɔhene kae sɛ wɔmfa wɔn mmra no soe,+ na ahemfi panyin no de wɔn baa Nebukadnesar anim. 19  Bere a ɔhene ne wɔn kasae no, nnipa no nyinaa mu no, wanhu obiara a ɔte sɛ Daniel, Hanania, Misael, ne Asaria;+ na wɔtenaa hɔ som ɔhene no. 20  Asɛm a ehia nyansa ne nhumu biara a ɔhene bisaa wɔn no, ohui sɛ wɔn nyansa ne wɔn nhumu boro akɔmfo ne nkonyaayifo+ a wɔwɔ n’ahenni nyinaa mu no nyinaa de so mpɛn du. 21  Na Daniel tenaa hɔ koduu Ɔhene Kores+ afe a edi kan mu.

Ase Hɔ Nsɛm

Anaa “asɔrefi.”
Anaa “asɔrefi.”
Kyerɛ sɛ, Babilonia.
Nt., “Israel mma.”
Nt., “mmofra.”
Ebetumi nso akyerɛ, “wɔnyɛn wɔn.”
Nt., “mma.”
Ɛkyerɛ, “Onyankopɔn Ne Me Temmufo.”
Ɛkyerɛ, “Yehowa Adom Ada Adi.”
Ebetumi akyerɛ “Hena Na Ɔte Sɛ Onyankopɔn?”
Ɛkyerɛ, “Yehowa Aboa.”
Kyerɛ sɛ, Babilonfo din.
Anaa “nokware Nyankopɔn no maa ahemfi panyin no daa ayamye adi kyerɛɛ Daniel.”
Nt., “mmofra.”
Nt., “me ti adi fɔ.”
Anaa “atosode.”
Nt., “mmofra.”
Nt., “wɔn honam ayɛ sɔɔsɔɔ.”
Nt., “mmofra.”
Anaa “atosode.”
Nt., “mmofra.”
Anaa “nhoma.”