Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Ɔwɛn-Aban  |  March 2015

Bible Nsɛmmisa Ho Mmuae

Bible Nsɛmmisa Ho Mmuae

Adɛn nti na ɛsɛ sɛ yɛkae Yesu wuo no?

Yesu wuo no ama nnipa anya dɛn ho anidaso?Yesaia 25:8; 33:24

Yesu wuo no yɛ ade a ɛho hia paa wɔ nnipa abakɔsɛm mu. Nea enti a ɛte saa ne sɛ, ama nnipa asan anya daa nkwa ho anidaso. Onyankopɔn ammɔ nnipa sɛ wɔnyɛ bɔne, wɔnyare, na wɔnwu. (Genesis 1:31) Nanso onipa a ɔdi kan a ɔne Adam no de bɔne baa wiase. Yesu de ne nkwa too hɔ de gyee yɛn fii bɔne ne owuo mu.Kenkan Mateo 20:28; Romafoɔ 6:23.

Onyankopɔn somaa ne Ba baa asase so ma ɔbɛwu maa yɛn de kyerɛɛ sɛ ɔwɔ ɔdɔ soronko ma yɛn. (1 Yohane 4:9, 10) Yesu ka kyerɛɛ n’akyidifo sɛ wɔmfa paanoo ne bobesa nyɛ afahyɛ korokorowa bi mfa nkae ne wuo no. Afe biara sɛ yɛdi saa afahyɛ no a, ɛkyerɛ sɛ yɛn ani sɔ ɔdɔ a Onyankopɔn ne Yesu ada no adi akyerɛ yɛn no.Kenkan Luka 22:19, 20.

Hwannom na wɔfata sɛ wɔdi paanoo no na wɔnom bobesa no bi?

Bere a edi kan a Yesu ka kyerɛɛ n’asuafo no sɛ wɔnkae ne wuo no, ɔsan kaa apam, anaa nhyehyɛe bi ho asɛm. (Mateo 26:26-28) Ɛmaa wɔn ne nnipa kakraa bi nyaa hokwan sɛ wɔbɛkɔ akɔka Yesu ho wɔ soro na wɔayɛ ahemfo ne asɔfo. Ɛwom sɛ nnipa mpempem pii na wɔkae Yesu wuo no deɛ, nanso wɔn mu kakraa bi a wɔka apam no ho no na wɔdi paanoo no na wɔnom bobesa no bi.Kenkan Adiyisɛm 5:10.

Bɛyɛ mfe 2,000 ni a Yehowa fii ase yii nnipa a wɔbɛkɔ akɔdi hene wɔ soro no. (Luka 12:32) Wode wɔn toto nnipa dodow a wɔbɛtena asase so daa no ho a, wɔsua koraa.Kenkan Adiyisɛm 7:4, 9, 17.