Wobɛtumi aka sɛ obi yɛ w’adamfo paa bere a wonnim ne din? Entumi nyɛ yie saa. Bulgariani baa bi a wɔfrɛ no Irina kaa sɛ, “Obiara nni hɔ a ɔbɛtumi aka sɛ Onyankopɔn yɛ n’adamfo bere a ɔnnim ne din.” Asɛm a ɛdi wei anim no maa yɛhuu sɛ Onyankopɔn pɛ sɛ ɔfa wo adamfoɔ. Enti ɔnam Bible no so aka akyerɛ wo sɛ: “Mene Yehowa; me din ne no.”Yesaia 42:8.

Onyankopɔn abɔ ne din akyerɛ wo wɔ Bible mu. Ɔse: “Mene Yehowa; me din ne no.”Yesaia 42:8

Wohwɛ a ɛho hia Yehowa sɛ yɛbɛhu ne din na yɛabɔ? Wo deɛ hwɛ o, tete Hebri Twerɛnsɛm mu no, wɔde Hebri ntwerɛdeɛ nnan a wɔfrɛ no Tetragrammaton na ɛgyinaa hɔ maa Onyankopɔn din. Epue bɛyɛ 7,000, na ɛno ne din a ɛdɔɔso paa wɔ Bible mu. Enti nea ɛkyerɛ ara ne sɛ, Yehowa pɛ sɛ yɛhu ne din na yɛbɔ. *

Ansa na nnipa mmienu bɛtumi afa adamfoɔ no, obiara hu ne yɔnko din. Enti wonim Onyankopɔn din?

Nanso ebia ebinom adwene bɛyɛ wɔn sɛ, adeɛ nyinaa so Tumfoɔ Nyankopɔn deɛ ɔyɛ kronkron, enti ɛnkyerɛ obuo sɛ wobɛbɔ ne din. Ampa, ɛnyɛ papa sɛ wobɛbɔ w’adamfo paa din basabasa, na saa ara nso na ɛnsɛ sɛ yɛbɔ Onyankopɔn din basabasa. Nea Yehowa pɛ ne sɛ wɔn a wɔdɔ no nyinaa bɛyi ne din ayɛ na wɔabɔ akyerɛ afoforɔ. (Dwom 69:30, 31; 96:2, 8) Kae sɛ Yesu kyerɛɛ n’akyidifoɔ sɛ wɔmmɔ mpaeɛ sɛ: “Yɛn Agya a wowɔ soro, wo din ho nte.” Yɛn nso yɛbɛtumi abɔ Onyankopɔn din akyerɛ nkurɔfoɔ de ate ne din ho. Sɛ yɛyɛ saa a, ɛbɛma yɛatumi afa no adamfoɔ.Mateo 6:9.

Bible ma yɛhu sɛ “wɔn a . . . wɔdwene [Onyankopɔn] din ho” anaa ne din ho hia wɔn no, Onyankopɔn ani wɔ wɔn so. (Malaki 3:16) Sɛ obi yɛ saa a, Yehowa hyɛ bɔ sɛ: “Mɛbɔ ne ho ban, ɛfiri sɛ ɔnim me din. Ɔbɛfrɛ me, na me nso mɛgye ne so. Mɛgyina n’akyi ahohia da.” (Dwom 91:14, 15) Enti sɛ yɛpɛ sɛ yɛne Yehowa fa adamfoɔ a, ɛho hia paa sɛ yɛhu ne din na yɛbɔ.

^ nky. 4 Onyankopɔn din no pue mpɛn pii wɔ Hebri Twerɛnsɛm anaa nea nkurɔfoɔ frɛ no Apam Dada no mu. Nanso, awerɛhosɛm ne sɛ, sɛ wofa Bible pii a, worenhu Onyankopɔn din no wom, efisɛ wɔn a wɔkyerɛɛ ase no de “Awurade” anaa “Onyankopɔn” ahyɛ Yehowa din anan. Sɛ wopɛ wei ho nsɛm pii a, hwɛ nhoma a wɔato din Dɛn na Bible Kyerɛkyerɛ Ankasa? no nkratafa 195-197. Yehowa Adansefoɔ na wɔtintimii.