Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Ɔwɛn-Aban  |  July 2014

 ASƐM A ƐDA SO | ADƐN NA NNEƐMA BƆNE TO NNIPA PA?

Nea Onyankopɔn Bɛyɛ wɔ Nneɛma Bɔne Ho

Nea Onyankopɔn Bɛyɛ wɔ Nneɛma Bɔne Ho

Bible aka nea Yehowa ne ne Ba Yesu Kristo bɛyɛ wɔ amanehunu a Satan Ɔbonsam de aba no ho. Bible ka sɛ: “Eyi nti na woyii Onyankopɔn Ba [Yesu] adi, sɛnea ɔbɛsɛe Ɔbonsam nnwuma.” (1 Yohane 3:8) Wɔbɛsɛe saa wiase a anibere, ɔtan, ne nneyɛe bɔne ahyɛ no ma yi. “Wiase yi sodifo” Satan Ɔbonsam de, Yesu ahyɛ bɔ sɛ “wobetu . . . no afi hɔ.” (Yohane 12:31) Wiase foforo a trenee te mu bɛba, na esiane sɛ Satan nni hɔ a ɔbɛhaw adwene bio nti, saa bere no asomdwoe bɛba asase yi so.2 Petro 3:13.

Nnipa a wɔayɛ wɔn adwene sɛ bɔne ara na wobedi no nso ɛ? Bible ka no pen sɛ: “Treneefo na wɔbɛtena asase so, na wɔn a asɛm nni wɔn ho na wɔbɛka so. Abɔnefo de, wobetwa wɔn afi asase so; na nkontompofo nso, wobeyi wɔn afi so.” (Mmebusɛm 2:21, 22) Wo de, susuw saa bɔhyɛ no ho hwɛ. Ɛkyerɛ sɛ nnipabɔnefo befi hɔ ama yɛn asom adwo yɛn. Afei, nkakrankakra yebenya yɛn ho atetew afi bɔne a wɔde awo yɛn no ho.Romafo 6:17, 18; 8:21.

Ɔkwan bɛn na Onyankopɔn bɛfa so ayi bɔne afi nnipa ho wɔ wiase foforo no mu? Ɔrenhyɛ nnipa mma wɔnyɛ n’apɛde te sɛ mfiri. Mmom ɔbɛkyerɛkyerɛ asoɔmmerɛfo ma wɔayɛ n’apɛde, na waboa wɔn ma wɔanya adwempa na wɔayɛ adepa.

Onyankopɔn beyi nea ɛma yehu amane nyinaa afi hɔ

Asiane a ɛto nkurɔfo no, dɛn na Onyankopɔn bɛyɛ wɔ ho? Wahyɛ bɔ sɛ, ɛrenkyɛ, n’Ahenni no bɛba abedi asase nyinaa so. Onyankopɔn apaw Yesu Kristo sɛ n’Ahenni no so hene, na wama no tumi a ɔde bɛsa yare. (Mateo 14:14) Abɔde mu nneɛma te sɛ mframa ne nea ɛtete saa nso, Yesu wɔ so tumi. (Marko 4:35-41) Enti, “asiane” ne atoyerɛnkyɛm a ɛma yehu amane no to betwa. (Ɔsɛnkafo 9:11) Sɛ Kristo bedi asase so hene a, mmusu biara mma nnipa so bio.Mmebusɛm 1:33.

Nnipa mpempem pii a wɔnkaa bi nhyɛɛ mu a wɔawuwu yayaayaw no nso ɛ? Ansa na Yesu renyan n’adamfo Lasaro aba nkwa mu bio no, ɔkae sɛ: “Mene owusɔre ne nkwa.” (Yohane 11:25) Yiw, Yesu wɔ tumi a ɔde benyan awufo aba nkwa mu bio!

Wiase a bɔne a ɛde bɔne de, ebi rento nnipa pa, wunya a anka wompɛ? Ɛnde fa si w’ani so sɛ wubesua nokware Nyankopɔn no ne n’atirimpɔw ho ade pii wɔ Bible mu. Yehowa Adansefo a wɔte wo mpɔtam ani begye sɛ wɔbɛboa wo ama woanya saa nimdeɛ no. Yɛde anigye hyɛ wo nkuran sɛ hwehwɛ Adansefo a wɔwɔ baabi a wote, anaa kyerɛw wɔn a wɔyɛɛ nhoma yi.