Wokenkan Bible a, wubehu sɛ atumfoɔ bi hyɛɛ ahiafo so. Ebi ne nea ɛtoo Nabot no. * Bɛyɛ mfe 3,000 ni no, na Ahab na ɔyɛ Israelfo hene, na ɔmaa ne yere Yesebel kum Nabot ne Nabot mmabarima. Okum wɔn sɛnea ɛbɛyɛ a ɔhene no bɛfa Nabot bobeturo. (1 Ahene 21:1-16; 2 Ahene 9:26) Adɛn nti na Onyankopɔn hwɛ maa saa asisisɛm yi kɔɔ so?

‘Onyankopɔn ntumi nni atoro.’Tito 1:2

Momma yɛnhwɛ ade titiriw biako bi: Onyankopɔn ntumi nni atoro. (Tito 1:2) Onyankopɔn a onni atoro de, ɛfa nhyɛso ho sɛn? Nea ɛte ne sɛ, mfiase pɛɛ na Onyankopɔn bɔɔ nnipa kɔkɔ sɛ wɔyɛ ne so asoɔden a, ɛde nsunsuanso bɔne bɛba, kyerɛ sɛ, wobewu. Onyankopɔn nni atoro, enti ampa-ne-ampa ara bere a nnipa yɛɛ asoɔden wɔ Eden turom no, ɛkɔfaa owu bɛsɛn amansan kɔn mu. Onipa a odii kan wui ne Habel; ne nua Kain na okum no, na ɛno yɛ nhyɛso a na ɛreba wiase no ho nhwɛso.Genesis 2:16, 17; 4:8.

Efi saa bere no, nea akɔ so wɔ nnipa asetena mu no, Onyankopɔn Asɛm aka ho asɛm sɛ: “Onipa di onipa so ma ewie no bɔne.” (Ɔsɛnkafo 8:9) Saa asɛm no aba mu anaa? Yehowa ka kyerɛɛ ne man Israel sɛ ahemfo a wobedi wɔn so no bɛhyɛ wɔn so ama wɔasu afrɛ Nyankopɔn. (1 Samuel 8:11-18) Ɔhene Solomon nyansafo no mpo gyigyee tow akɛse akɛse fii ne nkurɔfo hɔ. (1 Ahene 11:43; 12:3, 4) Ahemfo a na wɔn tirim yɛ den te sɛ Ahab koraa de, sɛnea wɔhyɛɛ wɔn nkurɔfo so no, na ɛkyɛn. Wo de hwɛ o, sɛ Onyankopɔn sii nhyɛso yi nyinaa kwan a, wunnye nni sɛ anka ɛbɛma wayɛ ɔtorofo?

“Onipa di onipa so ma ewie no bɔne.”Ɔsɛnkafo 8:9

Ma ɛntena w’adwene mu nso sɛ, Satan aka sɛ nea yebenya afi Onyankopɔn nkyɛn nti na yɛsom no. (Hiob 1:9, 10; 2:4) Enti sɛ Onyankopɔn ka sɛ ɔrempene mma obiara nni n’asomfo so a, wunhu sɛ ɛbɛma Satan asɛm no ayɛ nokware? Afei nso Onyankopɔn ka sɛ ɔremma kwan mma wɔnhyɛ onipa biara so ɛ? Wunhu sɛ anka ɔbɛyɛ ɔtorofo paa? Sɛ Onyankopɔn twitwa gye yɛn biribiara mu a, anka nnipa bebree adwene bɛyɛ wɔn sɛ yebetumi akwati no ama asi yɛn yiye. Nanso Onyankopɔn Asɛm ma yehu sɛ ɛnte saa koraa, efisɛ sɛ nnipa kwati Onyankopɔn di wɔn ho so a, ɛrensi wɔn yiye. (Yeremia 10:23) Onyankopɔn Ahenni nko ara na ebetumi ayi atɛnkyea afi hɔ, enti ɛno na ɛsɛ sɛ yɛhwɛ kwan.

Enti nea yɛaka yi kyerɛ sɛ sɛ nnipa hyɛ ne yɔnko so a, empusuw Onyankopɔn anaa? Ɛnyɛ saa na ɛkyerɛ. Ma yɛnhwɛ nneɛma abien bi a ɔyɛ wɔ ho: Nea edi kan, ɛba nhyɛso a, ɔnyɛ katasomuamuaso. Wohwɛ Nabot ho pɔw bɔne a Yesebel bɔe no a, Onyankopɔn Asɛm amfa ho biribiara ansie. Afei nso Bible kyerɛkyerɛ mu sɛ, saa nneyɛe bɔne no nyinaa, sodifo bi a ɔwɔ tumi ɛnna wayɛ ne ho ohintaduakyi redi saa dwuma no. (Yohane 14:30; 2 Korintofo 11:14) Bible ma yehu sɛ ɔno ne Satan Ɔbonsam. Enti Onyankopɔn boa yɛn ma yɛkwati amumɔyɛ, efisɛ ɔmfa amumɔyɛ ne nhyɛso ho biribiara nsie yɛn. Afei nso wama yɛahu ne kɔfabae. Onyankopɔn ayɛ saa na ama asi yɛn yiye daakye.

Nea ɛto so abien, Onyankopɔn ma yenya anidaso sɛ nhyɛso befi hɔ. Ahab, Yesebel ne afoforo a wɔhyɛɛ nkurɔfo so no, Onyankopɔn anyɛ katasomuamuaso wɔ ho, na mmom obuu wɔn atɛn twee wɔn aso. Eyi ma yɛn awerɛhyem sɛ, ɛbɔ a wahyɛ sɛ ɔbɛsɛe abɔnefo no, nea ɛbɛyɛ biara ɛbɛba mu. (Dwom 52:1-5) Bio nso, nneɛma bɔne a amumɔyɛsɛm akɔfa abɛto wɔn a wɔdɔ Onyankopɔn so no, wahyɛ bɔ sɛ obesiesie ne nyinaa. * Enti daakye, ɔnokwafo Nabot ne ne mmabarima nyinaa bɛtena paradise asase so, na saa bere no onipa biara rensisi ne yɔnko.Dwom 37:34.

^ nky. 3 Hwɛ Ɔwɛn-Aban yi mu asɛm a wɔato din “Suasua Wɔn Gyidi” no.

^ nky. 8 Hwɛ nhoma a wɔato din Dɛn na Bible Kyerɛkyerɛ Ankasa? no ti 11. Yehowa Adansefo na wotintimii.