Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Ɔwɛn-Aban  |  December 2013

 BƐN ONYANKOPƆN

“Hwɛ! Mereyɛ Nneɛma Nyinaa Foforo”

“Hwɛ! Mereyɛ Nneɛma Nyinaa Foforo”

Sɛ wo ne w’abusuafo nyinaa wɔ apɔwmuden ne nkwatenten a, anka wompɛ? Sɛ wote wiase bi a ɛyaw, amanehunu ne owu nnim mu a, anka ɛrenyɛ wo dɛ? Wubetumi anya wiase a ɛte saa mu atena; ɛnyɛ adaeso. Ɛrenkyɛ trenee wiase foforo bi bɛba, efisɛ Yehowa Nyankopɔn abɔ ne tirim sɛ ɔbɛyɛ. Nea wabɔ ne tirim sɛ ɔbɛyɛ no, ma yɛnhwɛ sɛnea wakyerɛkyerɛ mu wɔ Adiyisɛm 21:3-5.—Kenkan.

“[Onyankopɔn bɛpopa] wɔn aniwam nusu nyinaa.” (Adiyisɛm 21:4) Nusu bɛn na Onyankopɔn bɛpopa afi yɛn aniwam no? Nusu a ɔbɛpopa no, ɛnyɛ nea yɛn ani gye a ɛba no, ɛnna ɛnyɛ aniwam nsu a ɛhohoro yɛn ani so no. Mmom Onyankopɔn ahyɛ bɔ sɛ ɔbɛpopa nusu a amanehunu ne awerɛhow de ba no. Ɛnyɛ sɛ Onyankopɔn bɛkrɔkrɔ yɛn ama yɛagyae su kɛkɛ, na mmom ɔbɛpopa yɛn aniwam nusu nyinaa, kyerɛ sɛ, obeyi amanehunu ne awerɛhow a ɛma yesu no afi hɔ koraa.

“Owu nni hɔ bio.” (Adiyisɛm 21:4) Dɛn na ɛma nnipa tew nusu kyɛn ɔtamfo owu? Nnipa a wotie Yehowa asɛm no, obegye wɔn afi owu nsam. Ɔbɛyɛ no sɛn? Nea ɔbɛyɛ ara ne sɛ obeyi ade a ɛma nnipa wu no afi hɔ, kyerɛ sɛ obeyi bɔne a Adam de woo yɛn no afi hɔ. (Romafo 5:12) Yesu agyede afɔre no nti, Yehowa beyi bɔne afi nnipa asoɔmmerɛfo ho. * Afei ɔtamfo a otwa to a ɔne owu no, “obetu no agu.” (1 Korintofo 15:26) Ɛno akyi no, nnipa anokwafo bɛtena ase apɔwmuden mu sɛnea Onyankopɔn hyehyɛe no.

“Yaw nso nni hɔ bio.” (Adiyisɛm 21:4) Ɛyaw bɛn na ebefi hɔ? Bɔne ne sintɔ nti nnipa mpempem pii di yaw. Ɛyaw no bi yɛ adwenem de, ebi nso yɛ ɔhonam mu. Sɛ yaw no te sɛn oo, ɛte sɛn oo, ne nyinaa befi hɔ.

Ɛrenkyɛ, asetena a nusu, owu, ne yaw nnim bɛba. Nanso ebia wubebisa sɛ, ‘Ɛhe na saa asetena no bɛba? Onyankopɔn bɔhyɛ no bɛba mu wɔ ɔsoro anaa?’ Dabi. Ma yɛnhwɛ nea enti a yɛreka saa. Nea edi kan no, ansa na wɔde saa bɔhyɛ no reto gua no, wɔkae sɛ “Onyankopɔn ntamadan wɔ adesamma mu,” na adesamma nso, asase so na wɔwɔ. (Adiyisɛm 21:3) Nea ɛto so abien, nkɔmhyɛ no ka sɛ “owu nni hɔ bio,” enti ɛbɛyɛ wiase a bere bi na owu wom nanso ebefi hɔ. Owu mmaa ɔsoro da; asase so ha na yɛne no atena akyɛ. Enti Onyankopɔn bɔhyɛ a ɛfa asetena pa ho no, asase so ha yi ara na ɛbɛba.

Amanehunu ne awerɛhow ma nnipa tew nusu waawaa, nanso Onyankopɔn bɛpopa ne nyinaa

Yehowa bɔhyɛ a ɛfa wiase foforo ho no, ɔpɛ sɛ yenya mu gyidi. Bere a ɔkaa nhyira a ɛbɛba no wiei ara pɛ na ɔde taa akyi sɛ: “Hwɛ! mereyɛ nneɛma nyinaa foforo.” Afei ɔde toaa so sɛ: “Kyerɛw, efisɛ nsɛm yi wom, na ɛyɛ nokware.” (Adiyisɛm 21:5) Onyankopɔn bɔhyɛ no kyerɛ sɛ wɔn a wɔsom no yiye no benya ne nhyira a ɛyɛ anigye no. Nea ɛbɛyɛ a wo ne w’adɔfo benya mu kyɛfa no, adɛn nti na wunsua ho ade pii?

^ nky. 5 Sɛ wopɛ sɛ wusua Kristo agyede afɔre no ho nsɛm pii a, hwɛ nhoma a wɔato din Dɛn na Bible Kyerɛkyerɛ Ankasa? no ti 5. Yehowa Adansefo na wotintimii.