Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Ɔwɛn-Aban  |  July 2013

Abrabɔ Pa—Dɛn na Wo Som Yɛ Wɔ Ho?

Abrabɔ Pa—Dɛn na Wo Som Yɛ Wɔ Ho?

Sylvia hwɛ ayarefo. N’asɛm ne sɛ: “Nnipa a me ne wɔn kɔɔ sukuu no, na wɔn mu pii bu wɔn ho nyamesomfo. Nanso yɛreyɛ sɔhwɛ a, na wowia mu, na na wɔnom nnubɔne nso. Wɔamfa nyamesom ammɔ wɔn bra biako koraa.”

Ɔbarima bi a wɔfrɛ no Lionel nso kae sɛ: “M’adwumamfo no bi tumi patuw yare. Nyamesom ayɛ sɛ agyapade bi a wɔmfa nyɛ hwee; ɛte sɛ biribi a wɔde dua asen de asiesie dan mu kɛkɛ.”

Nnipa pii fam no, wɔmfa nyamesom nyɛ hwee wɔ wɔn abrabɔ mu. Ɛnnɛ, ebinom de “nyamesom pa adura wɔn anim” nanso “wɔmfa tumi a ɛwom no nyɛ adwuma.” (2 Timoteo 3:5) Wɔn asɔre mpanyimfo mmɔ bra a asɔremma no betumi asuasua; asɔfo no nso nkyerɛkyerɛ wɔn nkurɔfo mma wɔmfa Bible afotu mmɔ wɔn bra. Enti ɛnyɛ nwonwa sɛ ebinom anya adwene sɛ nea yɛbɛyɛ yɛn ho biara mfa Onyankopɔn ho.

DƐN NA BIBLE NO KYERƐKYERƐ?

Bible ma yehu sɛ Onyankopɔn wɔ atenka, na sɛnea yɛbɔ yɛn bra no hia no paa. Bere a tete Israelfo tew atua tiaa Onyankopɔn no, “wɔhow ne werɛ wɔ kwayow no so.” (Dwom 78:40) Nanso sɛ obi fi ne koma nyinaa mu sesa n’akwammɔne a, ‘anigye pii ba ɔsoro.’ (Luka 15:7) Sɛ obi hu Onyankopɔn suban pa no yiye a, ɛma onya ɔdɔ kɛse ma yɛn soro Agya no, na ɛno ka no ma ɔdɔ nea Onyankopɔn dɔ, na okyi nea Onyankopɔn kyi.—Amos 5:15.

SƐN NA YEHOWA ADANSEFO DE YƐ ADWUMA?

Atesɛm krataa bi wɔ Salt Lake City, Utah, U.S.A., wɔfrɛ no Deseret News. Asɛm a ɛkae ne sɛ, Yehowa Adansefo “hyɛ mmusua den na wɔboa ma yenya ɔmanfo a wodi nokware na wɔnyɛ anihafo.” Krataa no ka kaa ho sɛ: “Ɔsom no mufo mfa abrabɔ pa nni agoru koraa. Wogye di sɛ sigaretnom, nsawe, nnubɔne nom, kyakyatow, nna mu ɔbrasɛe ne mmarima a wɔne mmarima da yɛ nneɛma bi a ɛsɛe nnipa ne Onyankopɔn ntam.”

Ɛyɛ a nyamesom mpanyimfo boa wɔn nkurɔfo ma wɔde Onyankopɔn asɛm bɔ wɔn bra anaa?

Sɛ Adansefo no sua Onyankopɔn suban ho ade a, mfaso bɛn na wonya fi so? Sylvia a yɛaka n’anom asɛm dedaw no kae sɛ: “Wobu nkurɔfo fa so daa wɔ ayaresa adwuma no mu. Sɛ woanhwɛ a, wubehu ara ne sɛ woreyɛ bi. Minim sɛnea Yehowa * bu saa nneɛma no, enti ɛboa me ma meyɛ ade pa. Mewɔ anigye ne akomatɔyam.” Sylvia gye tom paa sɛ ne gyidi a ɔde bɔ ne bra no ama n’abrabɔ ayɛ papa.

^ nky. 9 Bible ma yehu sɛ Yehowa yɛ Onyankopɔn din.