Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Ɔwɛn-Aban  |  April 2013

 BƐN ONYANKOPƆN

“Monkɔ so Mmisa, na Wɔde Bɛma Mo”

“Monkɔ so Mmisa, na Wɔde Bɛma Mo”

“Awurade, kyerɛ yɛn sɛnea wɔbɔ mpae.” (Luka 11:1) Ɛyɛ asuafo no biako na ɔde saa abisade no too Yesu anim. Bere a Yesu rema mmuae no, ɔmaa mfatoho abien bi de kyerɛɛ sɛnea yɛbɛbɔ mpae ama Onyankopɔn atie. Ɛyɛ a wudwen ho sɛ Onyankopɔn tie wo mpaebɔ anaa? Ɛnde mmuae a Yesu de mae no, w’ani begye ho.—Kenkan Luka 11:5-13.

Mfatoho a edi kan no fa onii a ɔrebɔ mpae no ho. (Luka 11:5-8) Yesu kae sɛ ɔbarima bi nyaa ɔhɔho anadwo paa, nanso na onni aduan biara a ɔde bɛma no. Ɔbarima no de, na asɛm no hia no paa. Ná ade asa de, nanso ɔkɔɔ n’adamfo bi fie kɔka kyerɛɛ no sɛ ɔmfɛm no paanoo. Ahyɛase no, na n’adamfo no mpɛ sɛ ɔsɔre, efisɛ na ɔne ne yere ne ne mma ada. Nanso ɔbarima no de fɛre nyinaa too nkyɛn kɔɔ so srɛɛ no ara kosii sɛ afei de n’adamfo no sɔre de nea ɔrehwehwɛ no maa no. *

Mpaebɔ ho ade bɛn na mfatoho yi ma yehu? Yesu reka akyerɛ yɛn sɛ ɛnsɛ sɛ yɛpa abaw; ɛsɛ sɛ yɛkɔ so bisa, yɛkɔ so hwehwɛ, na yɛkɔ so bom. (Luka 11:9, 10) Adɛn ntia? Wugye di sɛ Yesu asɛm no kyerɛ sɛ Onyankopɔn nyɛɛ n’adwene sɛ ɔbɛboa yɛn, enti sɛ yɛbɔ mpae a na yɛrebɔ pon mu teetee no anaa? Dabi. Nea na Yesu reka ne sɛ, Onyankopɔn nte sɛ damfo a na ɔmpɛ sɛ ɔboa n’adamfo no; mmom Onyankopɔn ayɛ krado sɛ, wɔn a wɔde gyidi bɔ mpae no, ɔbɛyɛ wɔn abisade ama wɔn. Sɛ yɛampa abaw a, ɛno na ɛkyerɛ sɛ yɛwɔ gyidi. Yɛkɔ so bisa a, ɛkyerɛ sɛ nea yɛrebisa no hia yɛn ampa, na yɛwɔ gyidi paa sɛ ɛyɛ Onyankopɔn pɛ nko ara a, obetumi ayɛ ama yɛn.—Marko 11:24; 1 Yohane 5:14.

Mfatoho a ɛto so abien no fa “mpaebɔ Tiefo,” Yehowa ho. (Dwom 65:2) Yesu bisae sɛ: “Mo mu hena koraa na ɔyɛ agya a sɛ ne ba bisa no apataa a, ɔde ɔwɔ bɛhyɛ ne nsam na ɔremma no apataa? Anaasɛ sɛ obisa kesua nso a, ɔde akekantwɛre bɛhyɛ ne nsam?” Mmuae no de, obiara nim; agya pa biara nni hɔ a ɔde adebɔne bɛma ne mma. Afei Yesu kyerɛkyerɛɛ mfatoho no mu sɛ: Sɛ agyanom a bɔne wɔ wɔn ho de “akyɛde pa ma” wɔn mma a, “hwɛ mpɛn dodow ara a Agya a ɔwɔ soro no de honhom kronkron” a ɛyɛ akyɛde kɛse paa no, bɛma ne mma a wɔwɔ asase so! *Luka 11:11-13; Mateo 7:11.

Onyankopɔn ayɛ krado sɛ, wɔn a wɔde gyidi bɔ mpae no, ɔbɛyɛ wɔn abisade ama wɔn

Dɛn na saa mfatoho no kyerɛ yɛn wɔ “mpaebɔ Tiefo,” Yehowa ho? Yesu pɛ sɛ yehu Yehowa sɛ Agya a odwen ne mma ho, na ne ho pere no sɛ ɔbɛyɛ wɔn abisade ama wɔn. Enti, Yehowa asomfo betumi akɔ n’anim bere biara a wɔpɛ de wɔn komam abisade akɔto n’anim. Afei nso esiane sɛ wonim sɛ ɔpɛ wɔn yiye nti, mmuae biara a wobenya afi ne hɔ no, sɛ ɛnyɛ nea wɔhwɛ kwan mpo a, wogye tom ntɛm. *

April Bible akenkan

Luka 7-21

^ nky. 4 Mfatoho a Yesu yɛe no yɛ amanne a na ɛwɔ hɔ paa saa bere no. Ahɔhoyɛ yɛ biribi a na Yudafo mfa nni agoru koraa. Da biara, na abusua biara tõ paanoo a ɛbɛso wɔn di, enti sɛ ɛsa a, nea ɛbɛba ara ne sɛ ɔbɛkɔ akɔsrɛ bi. Afei nso abusua a ahia wɔn no, na wɔn nyinaa da fam wɔ dan biako mu.

^ nky. 6 Sɛ Yesu ne nkurɔfo resusuw nsɛm ho a, na ɔtaa yɛ ntotoho ka sɛ “hwɛ mpɛn dodow ara a.” Ɔbenfo bi kyerɛkyerɛɛ mu sɛ: “Nea saa ntotoho no kyerɛ ne sɛ, ‘Sɛ asɛm a edi kan no yɛ nokware a, ɛnde nea wɔka ho asɛm akyiri yi no koraa de, ɛkyɛn.’”

^ nky. 7 Sɛ wopɛ sɛ wuhu mpaebɔ ne nea ɛbɛma Onyankopɔn atie wo mpaebɔ ho nsɛm pii a, hwɛ nhoma a wɔato din Dɛn na Bible Kyerɛkyerɛ Ankasa? no ti 17. Yehowa Adansefo na wotintimii.