BƐYƐ mfe 800 a atwam ni no, abusuakuw bi a wɔfrɛ wɔn Maorifo fii Polynesia baabi twaa kilomita mpempem pii faa po so kɔɔ New Zealand. Baabi a wɔkɔtenae no, na ɛnte sɛ nsupɔw a wɔagyaw wɔ wɔn akyi no. Efisɛ baabi a wofi no, na ɛhɔ yɛ hyew. Nanso ɛha de, mmepɔw, asukyenee, asutare a ɛyɛ hyew, ne sukyerɛmma nko ara. Bɛyɛ mfe 500 akyi no, abusuakuw foforo bi a wofi Europe nso bɛtenaa hɔ. Ɛnnɛ, wɔn a wofi New Zealand no dodow no ara gye Anglo-Saxon ne Polynesia amammerɛ tom. Nnipa dodow a wɔwɔ New Zealand no, wɔn mu bɛyɛ ɔha mu nkyekyɛm 90 tete nkurow akɛse mu. Ɔman no ahenkurow a wɔfrɛ no Wellington no, ɛno ne ahenkurow a ɛda anafo fam paa wɔ wiase nyinaa.

Atɛkyɛ a ɛrehuru wɔ Supɔw a ɛda Atifi Fam

 Afe biara, ahɔho bɛyɛ ɔpepem mmiɛnsa kɔhwɛ New Zealand ɛmfa ho sɛ ɛyɛ ɔman a ate ne ho no. Eyi nyɛ nwonwa efisɛ mmeae ahorow a ɛyɛ fɛ paa wɔ hɔ.

Dua bi a a yɛfrɛ no Aya a n’ahaban kɔla te sɛ dwetɛ tumi nyin yɛ tenten boro anammɔn 30 (mita 10)

Ná wosusuw sɛ anomaa bi a ontumi ntu a yɛfrɛ no takahe no ase ahyew kosii sɛ wohuu bi wɔ afe 1948

Nneɛma a ɛwɔ New Zealand no, ebi ne mmoa ne afifide ahorow a ɛyɛ soronko. Sɛ yɛreka nnomaa ahorow a wontumi ntu a, ɛdɔɔso wɔ ɔman yi mu sen wiase baabiara. Afei aboa bi wɔ hɔ a ɔte sɛ ketew. Wɔfrɛ no tuatara, na otumi di mfe 100! Sɛ yɛreka mmoa a wɔma wɔn mma nufu a, nea efi hɔ ara ne bonsu, dɔlfen ne ampan ahorow bi. Dodow no ara mfi ɔman no mu.

Bɛyɛ mfe 120 ni na Yehowa Adansefo ayɛ adwuma wɔ New Zealand. Wɔde kasa bɛyɛ 19 na ɛkyerɛkyerɛ afoforo Bible no. Polynesia kasa bi te sɛ Niuean, Rarotongan, Samoan, ne Tongan ka ho.

Maorifo a wɔhyɛ wɔn kurom atade na wɔabom resa