Kɔ emu nsɛm afã hɔ

Kɔ emu nsɛm afã hɔ

Yehowa Adansefo

Yi kasa a wopɛ Twi

 ASƐM A ƐDA SO | AHONHONSƐM—HENA NA ƆHYƐ AKYI?

Ahonhonsɛm—W’ani Gye Ho?

Ahonhonsɛm—W’ani Gye Ho?

“Nneɛma resesa, nnipa a wɔnom nnipa mogya, nnipa a wɔdan mpataku, ne nsamanfo bere retwam—nea ɛreba so ne sɛ bere a ebinom renya bayi no, na wɔretu ebinom nso deɛ.”—The Wall Street Journal.

SEESEI wohwɛ nhoma, sini ne video game ahorow mu a, nea wuhu ara ne mpanyimfo ne nkwadaa a wodi abayisɛm. Wubehu abaayewa fɛfɛɛfɛ bi nanso na odi abayisɛm, anaa nipa kamakama bi nso na ɔnom nnipa mogya. Adɛn nti na nkurɔfo atu adi akyi saa? *

Ɔbenfo bi a ɔde Claude Fischer kaa sɛ, “Nnansa yi nnipa a wogye di sɛ saman wɔ hɔ no adɔɔso. Amerika sei, bere bi a atwam no wubisa nnipa du a, baako pɛ na ɔbɛka sɛ ogye saman di. Nanso seesei deɛ, wubisa nnipa mmiɛnsa biara a, wɔn mu baako bɛka sɛ ogye saman di. Wokɔ Amerika kobisa mpanyimfo dodow bi sɛ ebia wɔakɔ asumanfo nkyɛn pɛn, wogye di sɛ saman wɔ hɔ, anaa wogye di sɛ ahonhommɔne tumi gye obi fie bɔ so a, ebia dodow bi bɛka sɛ aane. Nanso wubisa mmerante ne mmabaa a, anhwɛ a dodow a wɔbɛka sɛ aane no yɛ mpanyimfo no mmɔho.”

Enti nnansa yi sɛ nkurɔfo resan ka no denneennen sɛ ahonhommɔne tumi kɔhyɛ nnipa mu a, wodi ka. Ɔbarima bi a ɔde Michael Calia kyerɛwee sɛ, “Tete no, na nnipa a wɔnom mogya, nnipa a wɔdan mpataku, ne nsamanfo ho nsɛm abu so. Ɛno ka ho bi na nnɛ abayisɛm asan ayi ne ti ama abegye ntini wɔ anigyede mu no.”—The Wall Street Journal.

Amanneɛbɔ kyerɛ sɛ, “wiase nyinaa, nnipa bɛyɛ ɔha biara mu 25 kosi 50 gye di sɛ saman wɔ hɔ, na wɔka saman ho asɛm paa wɔ nhoma dodow no ara mu.” Abenfo Christopher Bader ne Carson Mencken yɛɛ nhwehwɛmu bi wɔ Amerika. “Wɔkyerɛe sɛ Amerikafo ɔha biara mu 70 kosi 80 deɛ, wogye ahonhonsɛm bi di, na wɔnte ho kasa koraa.”

Obi betumi de ne ho ahyehyɛ ahonhonsɛm anaa asumansɛm mu na waka sɛ ɔde regyigye n’ani kɛkɛ?

^ nky. 4 Ahonhonsɛm: Ɛyɛ biribi a “wontumi mfa nyansahu anaa abɔde mu mmara nkyerɛkyerɛ mu.”—Merriam-Webster’s Learner’s Dictionary.