Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Nyan!  |  December 2013

  BIBLE NO ADWENE

Yesu

Yesu

Yesu Yɛ Onyankopɔn?

“Onipa biara nni hɔ a wahu Onyankopɔn pɛn.”—Yohane 1:18.

NEA NKURƆFO KA

Nnipa pii gye di sɛ Yesu nyɛ Onyankopɔn. Ne nyinaa akyi no, afoforo twe adwene si Bible kyerɛwsɛm ahorow bi so ka sɛ Yesu ne Onyankopɔn yɛ pɛ.

NEA BIBLE KA

Bible no nka Yesu ho asɛm sɛ ɔyɛ Ade Nyinaa so Tumfoɔ Nyankopɔn anaa ɔne Onyankopɔn yɛ pɛ. Mmom no, ɛkyerɛkyerɛ pefee sɛ Yesu ba fam sen Onyankopɔn. Sɛ nhwɛso no, Yesu ankasa kae wɔ Bible mu sɛ: “Agya no yɛ kɛse sen me.” (Yohane 14:28) Bible ka nso sɛ: “Onipa biara nni hɔ a wahu Onyankopɔn pɛn.” (Yohane 1:18) Yesu rentumi nyɛ Onyankopɔn efisɛ nokwarem no, nnipa pii huu Yesu.

Yesu akyidifo a wodi kan no anka sɛ ɔyɛ Onyankopɔn. Sɛ nhwɛso no, Asɛmpa kyerɛwfo Yohane kae wɔ ne kyerɛwtohɔ no mu sɛ: “Wɔakyerɛw eyinom ato hɔ na moagye adi sɛ Yesu ne Kristo, Onyankopɔn Ba no.”Yohane 20:31. *

 Wɔwoo Yesu bere bɛn?

‘Saa bere no, na nguanhwɛfo rewɛn wɔn nguan anadwo wɔ wuram.’Luka 2:8.

NEA NKURƆFO KA

Ebinom di Buronya December 25—wosusuw sɛ saa da no na wɔwoo Yesu. Afoforo di Yesu awoda wɔ January mfiase pɛɛ.

NEA BIBLE KA

Bible no nka da a wɔde woo Yesu. Nanso, ɛka sɛ bere a wɔwoo Yesu no, ‘na nguanhwɛfo bi rewɛn wɔn nguan anadwo wɔ wuram.’ (Luka 2:8) Ɛrentumi mma sɛ saa nguanhwɛfo no bɛwɛn wɔn nguan anadwo wɔ December ne January mu. Dɛn ntia?

Awɔw a ano yɛ den tumi si wɔ beae a wɔwoo Yesu no wɔ December ne January mu. Bible ka sɛ edu saa bere no wɔ afe no mu a, ‘osu a ɛtɔ no ma nnipa ho popo.’ (Esra 10:9, 13; Yeremia 36:22) Ɛrentumi mma sɛ ‘nguanhwɛfo bɛwɛn wɔn nguan anadwo wɔ wuram’ saa bere no.

Yesu wu akyi no, ɔsan baa nkwa mu bio ampa?

“Onyankopɔn nyan no [Yesu] fii awufo mu.”—Asomafo Nnwuma 3:15.

NEA NKURƆFO KA

Nnipa binom gye di sɛ obiara, a Yesu ka ho, nni hɔ a sɛ owu a, obetumi asan aba nkwa mu.

NEA BIBLE KA

Yesu kyerɛɛ n’asuafo no sɛ ‘obehu amane pii na wɔakum no, na da a ɛto so abiɛsa no wɔanyan no.’ (Mateo 16:21) Bible no bɔ amanneɛ sɛ wɔ Yesu wu ne ne wusɔre akyi no, oyii ne ho adi kyerɛɛ nnipa bɛboro 500. (1 Korintofo 15:6) Wɔn a wohuu no no gye dii koraa sɛ wɔanyan no afi owu mu ampa. Na wɔayɛ krado sɛ wobewu ama saa gyidi no!Asomafo Nnwuma 7:51-60; 12:1, 2.

NEA ENTI A ƐHO HIA

Bible kyerɛkyerɛ sɛ Yesu wu ne ne wusɔre no bue hokwan ma adesamma nyinaa ma wonya Bible bɔhyɛ a ɛfa Paradise asase so ho no so mfaso. (Dwom 37:11, 29; Adiyisɛm 21:3, 4) Yɛwɔ anidaso sɛ yɛbɛtena ase daa anigye mu wɔ Paradise asase so esiane ɔdɔ a Yesu ne n’Agya, Ade Nyinaa so Tumfoɔ, Yehowa Nyankopɔn, ada no adi akyerɛ yɛn nti.Yohane 3:16; Romafo 6:23.

^ nky. 7 Bible nkyerɛkyerɛ sɛ Onyankopɔn wɔ yere ankasa a ɔne no wɔ mma. Mmom no, ɛfrɛ Yesu sɛ “Onyankopɔn Ba” efisɛ Onyankopɔn bɔɔ no tẽẽ, na ɔwɔ n’Agya su ahorow no bi.