Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Nyan!  |  December 2013

  NSASE NE NNIPA

Brazil Nsrahwɛ

Brazil Nsrahwɛ

Aduan dɛdɛ a wɔfrɛ no feijoada no yɛ Brazilfo aduan a wɔpɛ paa

Akyenkyena

MFIASE no na abɔmmɔfo ne akuafo na wɔte Brazil. Portugal abɔrehufo na wɔde Roma Katolek som kɔɔ hɔ, na akyiri yi wosisii asɔredan ahorow—ebi wɔ hɔ a, nnua a wɔasen adi mu adwini fɛfɛɛfɛ de sika kɔkɔɔ adura ho na wɔde asiesie mu.

Efi afeha a ɛto so 16 besi afeha a ɛto so 19 mu hɔ no, wɔde po so hyɛn faa nkoa bɛyɛ ɔpepem anan fii Afrika kɔɔ Brazil kɔyɛɛ kua dwuma. Wɔde wɔn som ne amammerɛ kaa wɔn ho kɔe, na wɔde frafraa Brazilfo amanne mu ma wobenyaa ɔsom ahorow te sɛ macumba ne candomblé fekuw. Sɛ wohwɛ Brazilfo nnwom, asaw, ne wɔn aduan a, wuhu sɛ wɔn mu pii nkyi fi Afrika.

Wosuaa abom a wɔpɛ paa a wɔfrɛ no feijoada, a wɔde mogyanam ne asedua yɛ, na wɔde ɛmo ne nhabamma ka ho no fii Portugalfo hɔ. Wɔ afeha a ɛto so 19 ne 20 no, atubrafo pii fi Europa (titiriw Germany, Italy, Poland, ne Spain), Japan, ne mmeae afoforo bɛkaa wɔn ho.

 Ɛnnɛ, Yehowa Adansefo bɛyɛ 750,000 na wɔwɔ Brazil. Wɔwɔ asafo ahorow bɛboro 11,000 mu. Wɔyɛ Bible adesua bɛboro 800,000. Nea ɛbɛyɛ na wɔanya baabi ahyiam asom no, wɔahyehyɛ adansi akuw 31 a wɔboa Adansefo a wɔwɔ hɔ no ma wosisi anaa wosiesie Ahenni Asa bɛyɛ 250 kosi 300 afe biara. Efi March 2000 besi saa bere yi no, wɔasisi asa a ɛte saa bɛyɛ 3,647.

SO NÁ WUNIM?

Nsu dodow a efi Amazon Asubɔnten mu ba no dɔɔso sen nea efi asubɔnten biara mu, na etumi tene kɔ akyiri bɛboro kilomita 6,275

Asubɔnten Amazon Nsuka no da kwaebirentuw a ɛso sen biara wɔ wiase no mu