Germany

Wɔ afe 2012 mu no, Germany asɛnnibea kunini biako buu atɛn sɛ obi ntumi nnyae ɔman asɔre na ɔnkɔ so ara mmu ne ho sɛ ɔyɛ saa asɔre no muni. Wobetumi abara Katolekfo a wɔagyae asɔrekɔ ma enti wontua asɔre tow biara, nanso wɔda so ara kura wɔn gyidi mu no sɛ mma wɔnkɔ adidi, wɔnkɔ bɔneka, wɔremma wɔn dibea wɔ asɔre no mu, na sɛ wowu nso mpo a, asɔre no rensie wɔn.

Wiase

Wiase som ahorow mu nhwehwɛmu a wɔyɛe daa no adi sɛ nnipa a “wonni ɔsom biara mu” nanso wogye di sɛ Onyankopɔn wɔ hɔ no dodow boro ɔpepepem biako ne kakra. Sɛ wɔde wɔn toto Kristofo a wɔn dodow si ɔpepepem 2.2 no ho, ne Nkramofo a wɔn dodow si ɔpepepem 1.6 no ho a, wɔn na wɔto so abiɛsa. Hindusom na ɛtoo so anan, na wɔn dodow si ɔpepepem biako.

Japan

Japan nyansahufo akyerɛ sɛ “nkamfo a wɔde ma obi no tumi kanyan amemene” no, na ɛma onipa no “ani gye.” Ɛkame ayɛ sɛ nhwehwɛmu no si nokwasɛm a ɛyɛ sɛ nkamfo yɛ ɔkwampa a wɔfa so kanyan nnipa ma wotu mpɔn no so dua.

Bolivia

Wɔ afe 2012 mu no, Boliviafo kan nnipa dodow a wɔwɔ ɔman no mu. Nea ɛbɛyɛ na wɔahu wɔn dodow ankasa no, wɔmaa Boliviafo nyinaa tenaa fie saa da no. Bio nso, wɔhyɛe sɛ ɛnsɛ sɛ obiara tu ne kar, wɔtotoo ɔman no ahye nyinaa mu, na wɔbaraa asanom.

Italy

Nhwehwɛmu bi a wɔyɛe mu no, awofo a wɔwɔ Italy kae sɛ sɛ wɔkyem pɛpɛɛpɛ a, simma 15 na wɔne wɔn mma de di agoru da biara. Nhoma bi ka sɛ, “Sɛ woyi awofo 5 biara si hɔ a, wɔn mu 1 pɛ na osusuw sɛ agoru a ɔne ne ba bedi no ma abofra no sua biribi.” (La Repubblica) Andrea Angiolino a ɔyɛ agodi ho ɔbenfo no ka sɛ, agoru a awofo ne wɔn mma di no boa mmofra no ma wosua sɛnea wosusuw nneɛma ho na “wodi akwankyerɛ so.”