Kɔ emu nsɛm afã hɔ

Kɔ emu nsɛm afã hɔ

Yehowa Adansefo

Yi kasa a wopɛ Twi

 BIBLE NO ADWENE

Nna a Edi Aware Anim

Nna a Edi Aware Anim

So ɔbarima ne ɔbea nna a edi aware anim yɛ bɔne?

“Eyi ne nea Onyankopɔn pɛ, . . . sɛ mobɛtwe mo ho afi aguamammɔ ho.”1 Tesalonikafo 4:3.

NEA NKURƆFO KA

Wɔ aman bi so no, wɔpene ɔbarima ne ɔbea nna a edi aware anim so. Wɔ mmeae bi no, wobu no sɛ ɛfata sɛ nnipa a wɔn ani afi a wɔnwaree de wɔn ho bɛhyɛ nna mu nneyɛe ahorow bi mu.

NEA BIBLE KA

Bible de asɛmfua “aguamammɔ” gyina hɔ ma nna mu nneyɛe ahorow bi a nnipa a wɔnyɛ awarefo de wɔn ho hyem mu. Onyankopɔn hwehwɛ sɛ n’asomfo ‘bɛtwe wɔn ho afi aguamammɔ ho.’ (1 Tesalonikafo 4:3) Sɛnea awaresɛe, ahonhonsɛmdi, asabow, abosonsom, awudi, ne korɔnbɔ yɛ bɔne a anibere wom no, saa ara nso na aguamammɔ nso yɛ bɔne a anibere wom.1 Korintofo 6:9, 10; Adiyisɛm 21:8.

NEA ENTI A ƐHO HIA

Ade biako ne sɛ, Bible bɔ kɔkɔbɔ sɛ “Onyankopɔn bebu aguamammɔfo atɛn.” (Hebrifo 13:4) Nea ehia paa no, sɛ yedi Onyankopɔn mmara a ɛfa nna ho no so a, ɛkyerɛ sɛ yɛdɔ Yehowa Nyankopɔn. (1 Yohane 5:3) Ɔno nso hyira wɔn a wodi n’ahyɛde so no nyinaa.Yesaia 48:18.

 So ɛmfata sɛ nnipa a wɔnwaree de wɔn ho bɛhyɛ nna mu nneyɛe biara mu?

“Aguamammɔ ne afideyɛ biara anaa adifudepɛ de, mommma wɔmmmɔ so mpo wɔ mo mu.”Efesofo 5:3.

NEA NKURƆFO KA

Nnipa pii gye di sɛ, nna mu nkitahodi akyi no, sɛ nnipa baanu a wɔnwaree de wɔn ho hyɛ nna mu nneyɛe biara mu a, ɛnyɛ bɔne.

NEA BIBLE KA

Bible reka nna mu nneyɛe a ɛmfata ho asɛm no, ɛnyɛ aguamammɔ nkutoo ho asɛm na ɛkae, mmom ɛkaa “afideyɛ” ne “ahohwibra” nso ho asɛm. (2 Korintofo 12:21) Nokwarem no, nna mu nneyɛe ahorow pii wɔ hɔ a, sɛ wɔn a wɔnyɛ awarefo de wɔn ho hyem na sɛ wɔannya nna mu nkitahodi mpo a, Onyankopɔn ani nnye ho.

Nea Bible ka fa ɔbea ne ɔbarima nna ho ne sɛ, ɔbarima ne ɔbea a wɔaware nkutoo na ɛsɛ sɛ wɔde wɔn ho hyɛ nna mu nneyɛe ahorow mu. Bible no kasa tia “nna ho akɔnnɔ bɔne.” (1 Tesalonikafo 4:5) Ɛno kyerɛ dɛn? Susuw nhwɛso a ebetumi afa ɔbarima anaa ɔbea ho yi ho hwɛ: Ebia ɔbea bi bɛyɛ n’adwene sɛ ɔne ne mpena renna. Nanso, ɔne no yɛ nna mu nneyɛe ahorow. Saa a wɔyɛ no kyerɛ sɛ wɔanya biribi a ɛnyɛ wɔn de ho akɔnnɔ bɔne. Enti yebetumi aka sɛ, wɔde wɔn ho ahyɛ “nna ho akɔnnɔ bɔne” mu. Bible kasa tia nna ho nneyɛe a ɛte saa.Efesofo 5:3-5.

Wobɛyɛ dɛn atwe wo ho afi nna mu nneyɛe bɔne ho?

“Munguan aguamammɔ.”1 Korintofo 6:18.

NEA ENTI A ƐHO HIA

Bible kyerɛ sɛ wɔn a wɔde wɔn ho hyɛ ɔbarima ne ɔbea nna a edi aware anim mu no betumi asɛe wɔne Onyankopɔn ntam adamfofa.Kolosefo 3:5, 6.

NEA BIBLE KA

Bible tu nkurɔfo fo sɛ ‘wonguan aguamammɔ.’ (1 Korintofo 6:18) Eyi kyerɛ sɛ ɛsɛ sɛ obi twe ne ho fi ade biara a ebetumi atwetwe no ma ɔde ne ho akɔhyɛ nna mu nneyɛe bɔne mu no ho. (Mmebusɛm 22:3) Sɛ nhwɛso no, sɛ obi betumi akura abrabɔ pa mu a, ɛho hia sɛ ɔtwe ne ho fi nnipa a wɔmfa Onyankopɔn nnyinasosɛm a ɛfa nna ho no nyɛ adwuma no ho. Bible bɔ kɔkɔ sɛ: “Nea ɔne anyansafo nantew no bɛyɛ onyansafo, na nea ɔne nkwasea bɔ no, ebewie no bɔne.”Mmebusɛm 13:20.

Aguamansɛm a yebedwinnwen ho nso betumi ama yɛde yɛn ho ahyɛ nna mu nneyɛe bɔne mu. (Romafo 8:5, 6) Enti, nyansa wom sɛ yɛbɛtwe yɛn ho afi nnwom, video, nhoma, ne biribiara a ɛbɛtwe yɛn adwene akɔ nna so anaa ɛhyɛ nna ho nneyɛe a Onyankopɔn ani nnye ho ho nkuran ho.Dwom 101:3.