Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Nyan!  |  April 2013

 NSASE NE NNIPA

Indonesia Nsrahwɛ

Indonesia Nsrahwɛ

NSUPƆW ahorow bɛyɛ sɛ 17,000 na ɛwɔ Indonesia. Wonim ɛhɔfo no sɛ wɔpɛ nnipa paa, wɔwɔ abotare,wobu ade, na wɔpɛ ahɔhoyɛ.

Indonesiafo pɛ ɛmo ne forɔe, na wɔpɛ nnuaba nso paa. Wɔ mmeae bi no, sɛ mmusua redidi a, wɔtena kɛtɛ so na wɔde wɔn nsa tĩ ɛmo no de bɔ forɔe a wɔayɛ no mu. Indonesiafo pii ka sɛ saa kwan a wɔfa so didi no ma aduan yɛ dɛ.

Durian aduaba a ɛte sɛ diibɔl no yɛ dɛ, na ɛmfa ho sɛ ɛbɔn no, nnipa pii ani gye ho

Indonesiafo ani gye mfoniniyɛ, asaw, ne nnwom ho. Wɔtaa de anklong na ɛbɔ dwom. Wɔde mpampuro durubɛn a wɔahyehyɛ wɔ dua so na ɛyɛ anklong sanku yi. Wɔahyehyɛ durubɛn no ma sɛ wɔwosow a, ɛma nnyigyei pɔtẽẽ bi. Sɛ wɔpɛ sɛ wɔbɔ dwom bi a, ɛsɛ sɛ nnwontofo dodow bi kabom na wɔn mu biara wosow ne de wɔ bere a ɛfata mu.

Akaatia yɛ asoroboa a ɔso sen mmoa a wɔda nnua so nyinaa—wɔnyɛ na wɔ Sumatra ne Borneo kwaebirentuw no mu. Nea wanyin paa no mu duru betumi adu bɛyɛ kilogram 90.7, na sɛ wɔtwe wɔn nsam a, ne tenten bɛyɛ mita 2.4

Ɛde besi afeha 15 Y.B. no, na Hindusom, ne afei Buddhasom, na agye Indonesiafo ti. Ebeduu afeha 16 mu no, Nkramosom nso benyaa wɔn so nkɛntɛnso. Saa afeha no ara mu na Europafo a wɔkɔhwehwɛɛ nnuhuam wɔ hɔ no de Kristosom kɔɔ hɔ.

 Efi afe 1931 reba no, Yehowa Adansefo ayɛ wɔn Bible nkyerɛkyerɛ adwuma a wɔyɛ wɔ wiase nyinaa no wɔ Indonesia. Seesei, Yehowa Adansefo bɛboro 22,000 na wɔwɔ Indonesia. Wɔrebɔ mmɔden sɛ wɔbɛka asɛm no bi akyerɛ wɔn a wɔyɛ mum nso wɔ hɔ. Nnansa yi, nnipa bɛboro 500 na wɔkɔɔ mum kasa nhyiam bi a Yehowa Adansefo yɛe wɔ hɔ de kaee Yesu Kristo wu no.

Wotintim Nyan! wɔ kasa ahorow 98 mu, na Indonesia kasa (a wɔsan frɛ no Bahasa Indonesia) nso ka ho