Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Nyan!  |  January 2013

 NSASE NE NNIPA

Cameroon Nsrahwɛ

Cameroon Nsrahwɛ

ƐBƐYƐ sɛ Bakafo a wɔsan frɛ wɔn Nkwatia na wodii kan bɛtenaa Cameroon. Ɛno akyi no, Portuguesefo baa hɔ wɔ afe 1500 mu hɔ. Mfe pii akyi no, Fulanifo a wɔyɛ Nkramofo bɛko dii Cameroon atifi fam so nkonim. Ɛnnɛ, nnipa a wɔte Cameroon no mu ɔha mu nkyem 40 kyerɛ sɛ wɔyɛ Kristofo, ɔha mu nkyem 20 yɛ Nkramofo, na ɔha mu nkyem 40 a wɔaka no nso yɛ Afrika som ahorow mufo.

Yehowa Adansefo atintim Bible ho nhoma wɔ Bassa kasa a wɔka wɔ Cameroon no mu

Nnipa a wɔtete Cameroon nkuraa ase no titiriw pɛ ahɔhoyɛ. Wokyia ahɔho ma wɔn akwaaba wɔ wɔn afie mu, na wɔma wɔn nsu ne aduan. Sɛ woamma ofiewura no ansom wo hɔho a, obu no sɛ woayaw no. Sɛ woma ɔsom wo hɔho a, ɛkyerɛ sɛ woadi no ni.

Ɔkwan a wɔfa so fi nkɔmmɔbɔ ase ne sɛ wubekyia abusua no mufo na woabisa sɛnea wɔn ho te. Ɛyɛ wɔn amammerɛ mpo sɛ wubebisa sɛnea wɔn mmoa ho te! Joseph a ofi Cameroon ka sɛ: “Sɛ ɔhɔho bi refi ofie bi mu akɔ a, ɛnsɛ sɛ wɔka kɛkɛ sɛ ‘nantew  yiye.’ Mpɛn pii no, ɛsɛ sɛ ofiewura no kogya no kwan na ɔkɔ so ne no bɔ nkɔmmɔ. Afei sɛ odu baabi a, ɔka kyerɛ ne hɔho no sɛ ɔnantew yiye na ɔsan n’akyi kɔ fie. Sɛ wanyɛ ɔhɔho bi saa a, ɔbɛte nka sɛ wannye no fɛw so.”

Ɔkorow nyɛ na wɔ Sanaga Asubɔnten no so. Wotumi de ntama a wobenya biara yɛ mframatama

Ɛtɔ bere bi a nnamfo to nsa didi, na mmere bi wɔ hɔ mpo a, wɔde wɔn nsa na edidi. Wɔ Cameroon no, amammerɛ yi kyerɛ sɛ biakoyɛ paa wɔ wɔn ntam. Nokwarem no, ɛtɔ da bi a, wɔde eyi ka nnipa a biribi nti wɔn adamfofa resɛe no bom. Wɔ ɔkwan bi so no, wɔde aduan a nnamfo no bom di no kyerɛ sɛ, “Seesei asomdwoe wɔ yɛn ntam.”

Wɔakyekyɛ Yehowa Adansefo a wɔn na wotintim nsɛmma nhoma yi mu ayɛ wɔn asafo bɛboro 300 wɔ Cameroon. Wɔyɛ Bible adesua bɛyɛ 65,000 wɔ saa ɔman no mu