Sɛ ɛnyɛ Onyankopɔn na ɔma yehu amane a, ɛnde ɔkɔm kɛse, ohia buburoo, akodi a ɛyɛ hu, yare a emu yɛ den, ne atoyerɛnkyɛm no nyinaa fi he? Onyankopɔn Asɛm Bible ma yehu nneɛma mmiɛnsa a ɛma nnipa hu amane. Ɛno na edidi so yi:

  1. Pɛsɛmenkominya, Anibere, Ne Ɔtan. “Onipa di onipa so ma ewie no bɔne.” (Ɔsɛnkafo 8:9) Mpɛn pii no, ɛyɛ nnipa a wɔtɔ sin, wɔyɛ pɛsɛmenkominya, anaa wɔn tirim yɛ den na wɔma afoforo hu amane.

  2. Asiane Tumi Si. Nnipa taa hu amane “efisɛ asiane to wɔn nyinaa bere a wɔnhwɛ kwan.” (Ɔsɛnkafo 9:11) Wei kyerɛ sɛ yɛnam a asɛm tumi to yɛn, yebetumi anya akwanhyia, obi betumi de n’asiane abesian yɛn anaa afoforo betumi ayɛ ade a wɔn ani nna.

  3. Ɔbɔnefo No Na Odi Wiase Yi So. Ade titiriw pa ara a ɛma nnipa hu amane no, Bible ma yehu no pefee. Ɛka sɛ: “Wiase nyinaa da ɔbɔnefo no tumi mu.” (1 Yohane 5:19) Saa “ɔbɔnefo no” ne Satan Ɔbonsam. Ɔyɛ honhom abɔde a ɔwɔ tumi, na na ɔyɛ Onyankopɔn bɔfo nanso “wannyina nokware no mu.” (Yohane 8:44) Abɔfo foforo kɔkaa Satan ho ma wɔyɛɛ Onyankopɔn so asoɔden sɛnea ɛbɛyɛ a wobedi wɔn ankasa akɔnnɔ akyi. Wei ma wɔbɛyɛɛ ahonhommɔne. (Genesis 6:1-5) Efi bere a Satan ne n’abɔfo bɔne no yɛɛ asoɔden no, wɔanya tumi kɛse wɔ wiase no so, na wɔama ɔhaw ahyɛ wiase no mu mã. Yɛn bere yi so pa ara na yehu wei kɛse. Seesei, Ɔbonsam bo afuw denneennen na “ɔredaadaa asase sofo nyinaa.” Wei akɔfa amanehunu pii aba asase so. (Adiyisɛm 12:9, 12) Anokwa, Satan yɛ sodifo a ne tirim yɛ den. Sɛ ohu sɛ nnipa rehu amane a, n’ani gye. Satan na ɔma nkurɔfo hu amane, na ɛnyɛ Onyankopɔn.

SUSUW HO HWƐ: Otirimɔdenfo a adwemmɔne ahyɛ no mã nkutoo na ɔbɛma nnipa a wɔn ho nni asɛm ahu amane. Nanso Bible ka sɛ: “Onyankopɔn ne dɔ.” (1 Yohane 4:8) Esiane sɛ Onyankopɔn yɛ ɔdɔ nti, “ɛmpare nokware Nyankopɔn sɛ ɔbɛyɛ bɔne, ne ade nyinaa so Tumfoɔ sɛ ɔbɛyɛ nea ɛnteɛ!”—Hiob 34:10.

Nanso ɛnyɛ dɛn ara a wubebisa sɛ, ‘Enti Onyankopɔn bɛma Satan kwan ma wadi nnipa so wɔ atirimɔden kwan so akosi da bɛn?’ Sɛnea yɛabehu no, Onyankopɔn kyi awudisɛm, na sɛ yehu amane a ɛma odi yaw kɛse. Afei nso, n’Asɛm hyɛ yɛn nkuran sɛ: “Montow mo dadwen nyinaa ngu no so, efisɛ odwen mo ho.” (1 Petro 5:7) Onyankopɔn dɔ yɛn, na ɔwɔ tumi a ɔde beyi amanehunu ne atɛnkyea nyinaa afi hɔ. Asɛm a edi hɔ no bɛkyerɛkyerɛ saa asɛm yi mu. *

^ nky. 7 Nea enti a Onyankopɔn ama kwan ma amanehunu rekɔ so no, wopɛ ho nsɛm pii a, hwɛ Dɛn na Yebetumi Asua Afi Bible Mu? nhoma no ti 11. Yehowa Adansefo na wɔyɛe. Wubetumi nso atwe bi wɔ www.jw.org/tw a wuntua hwee.