Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Ɔwɛn-Aban  |  No. 2 2016

 ASƐM A ƐDA SO | DƐN NTI NA YESU HUU AMANE NA OWUI?

Asɛm Yi Sii Ampa?

Asɛm Yi Sii Ampa?

Afe 33 osutɔbere mu na wokum Nasareni Yesu. Wotwaa atoro too no so sɛ ɔyɛ ɔmammɔfo, wɔkaa no mpire, na wɔbɔɔ no asɛndua mu. Yesu wuu owu yawyaw. Nanso, Onyankopɔn nyanee no, na adaduanan akyi no, ɔkɔɔ soro.

Nea wɔde yɛɛ Yesu yi, yebehu ho asɛm wɔ Nsɛmpa nnan no mu. Nsɛmpa nnan no wɔ Kristofo Hela Kyerɛwnsɛm a wɔtaa frɛ no Apam Foforo no mu. Enti saa nsɛm no sii ampa? Asɛmmisa yi ho hia paa, efisɛ sɛ saa nsɛm no ansi a, anka Kristofo gyidi yɛ kwa. Afei nso, anka anidaso a nnipa wɔ sɛ wobenya daa nkwa wɔ Paradise no nso bɛyɛ anidaso hunu. (1 Korintofo 15:14) Nanso, sɛ esii ampa a, yebetumi aka sɛ daakye papa bi wɔ hɔ ma adesamma a wo nso woka ho. Ɛnde yemmisa sɛ, nsɛm a ɛwɔ Nsɛmpa no mu no yɛ anansesɛm, anaa nokwasɛm?

NEA NOKWASƐM NO MA YEHU

Nsɛmpa no mu nsɛm nyɛ bɔsrɛmka, na mmom ɛyɛ nea esii ankasa a akyerɛwfo no tɔɔ wɔn bo ase kyerɛwee no pɛpɛɛpɛ. Nkurow a ɛka ho asɛm no, ɛwɔ hɔ ankasa, na ɛnnɛ obi betumi akɔhwɛ hɔ. Abakɔsɛm akyerɛwfo di adanse sɛ, nnipa a Nsɛmpa no ka wɔn ho asɛm no tenaa ase ampa.Luka 3:1, 2, 23.

 Abakɔsɛm akyerɛwfo a wɔtenaa ase wɔ Yesu bere so ne ne wu akyi no kaa Yesu ho asɛm. * Sɛnea na Romafo kum obi a wɔabu no kumfɔ no, saa ara na Nsɛmpa no kyerɛ sɛ wokum Yesu. Afei nso, Nsɛmpa no kaa biribiara a esii no pɛpɛɛpɛ. Anyɛ kata-so-muamua-so biara—nea Yesu asuafo yɛe a enye mpo no, ɛkae. (Mateo 26:56; Luka 22:24-26; Yohane 18:10, 11) Wei nyinaa di adanse sɛ nea Nsɛmpa no akyerɛwfo ka faa Yesu ho no yɛ nokware turodoo.

YESU WUSƆRE NSO Ɛ?

Nnipa pii gye di sɛ Yesu tenaa ase na owui, nanso ne wusɔre no de, ebinom nnye nni. Bere a Yesu asomafo no mpo tee sɛ Yesu asɔre afi awufo mu no, mfiase no wɔannye anni. (Luka 24:11) Nanso, bere a Yesu yii ne ho adi kyerɛɛ asomafo ne asuafo afoforo mpɛn pii no, wogye dii. Bere bi mpo de, nnipa bɛboro 500 de wɔn aniwa ankasa huu no.1 Korintofo 15:6.

Asuafo no de wɔn nkwa too asiane mu kaa Yesu wusɔre no ho asɛm akokoduru so. Wɔn a wokum Yesu mpo, asuafo no kaa ne wusɔre ho asɛm kyerɛɛ wɔn. (Asomafo Nnwuma 4:1-3, 10, 19, 20; 5:27-32) Sɛ wɔannyan Yesu a, wohwɛ a anka asuafo pii benya akokoduru a ɛte saa de aka asɛm no? Anokwa, Yesu wusɔre no na ɛmaa Kristosom gyee din tete no, na ɛno ara nso na ama Kristosom agye din nnɛ.

Biribiara a Nsɛmpa no ka fa Yesu wu ne ne wusɔre ho no ma yehu sɛ Yesu wu ne ne wusɔre no yɛ nokware turodoo. Sɛ wotɔ wo bo ase kenkan Nsɛmpa no a, wubehu sɛ nsɛm a ɛwom no nyinaa sisii ampa. Nanso sɛ wuhu nea enti a saa nsɛm no nyinaa sisii a, ɛbɛhyɛ wo den paa. Asɛm a edi hɔ no bɛkyerɛkyerɛ mu.

^ nky. 7 Tacitus a wɔwoo no bɛyɛ afe 55 mu no kyerɛwee sɛ: “Edin [Kristofo] no fi Kristo mu, na Tiberio nniso mu na yɛn amrado Pontio Pilato kum no.” Wɔn a wɔkaa Yesu ho asɛm nso ne Suetonius (wɔwoo no afe 69); Yudafo abakɔsɛm kyerɛwfo Josephus (wɔwoo no afe 37 anaa afe 38); ne Pliny Akumaa, Bitinia amrado (wɔwoo no afe 61 anaa afe 62).