Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

“Momfa Mo Ho Nsie Onyankopɔn Dɔ Mu”

 NKEKAHO

Bere Bɛn na Ɔbea Kata Ne Ti, na Dɛn Ntia?

Bere Bɛn na Ɔbea Kata Ne Ti, na Dɛn Ntia?

Bere bɛn na ɛsɛ sɛ Kristoni bea kata ne ti wɔ ne som mu, na dɛn ntia? Momma yɛnhwɛ nea honhom kaa ɔsomafo Paulo ma ɔkae wɔ asɛm yi ho. Wama yɛn akwankyerɛ a yehia na yɛatumi asi gyinae pa a ɛhyɛ Onyankopɔn anuonyam. (1 Korintofo 11:3-16) Paulo ma yehu nneɛma mmiɛnsa a ɛsɛ sɛ yesusuw ho: (1) dekode a ɔbea no reyɛ nti a ɛsɛ sɛ ɔkata ne ti, (2) beae a ɛsɛ sɛ ɔkata ne ti, ne (3) atirimpɔw nti a ɛsɛ sɛ ɔde afotusɛm yi di dwuma.

Dekode a ɔreyɛ. Paulo kaa nneɛma mmienu ho asɛm: mpaebɔ ne nkɔmhyɛ. (Nkyekyɛm 4, 5) Mpaebɔ yɛ ɔsom mu ade a yɛnam so ne Yehowa di nkitaho. Ɛnnɛ, yebetumi aka sɛ nkɔmhyɛ yɛ Bible nkyerɛkyerɛ biara a Kristoni somfo yɛ. So na Paulo kyerɛ sɛ bere biara a ɔbea bɛbɔ mpae anaa ɔde Bible mu nokware bɛkyerɛkyerɛ no ɛsɛ sɛ ɔkata ne ti? Dabi. Beae a ɔbea no wɔ a ɔrebɔ mpae anaa ɔrekyerɛkyerɛ no na ɛbɛkyerɛ nea ɛsɛ sɛ ɔyɛ.

Beae a ɔwɔ. Asɛm a Paulo kae no kyerɛ mmeae mmienu bi—abusua ne asafo no mu. Ɔka sɛ: “Ɔbea nso ti ne ɔbarima; . . . ɔbea biara a ɔbɔ mpae anaa ɔhyɛ nkɔm na ɔnkata ne ti no hyɛ ne ti aniwu.” (Nkyekyɛm 3,  5) Abusua no mu no, okunu  no na Yehowa apaw no sɛ ɔbea no ti. Sɛ ɔbea no ammu ne kunu no tumidi na ɔyɛ biribi a Yehowa de ahyɛ ɔbarima no nsa a, na ɔrehyɛ ne kunu no aniwu. Sɛ nhwɛso no, sɛ ɛho behia sɛ ɔbea no ne obi yɛ Bible adesua bere a ne kunu wɔ hɔ a, ɛsɛ sɛ ɔkata ne ti de kyerɛ sɛ obu ne kunu tumidi. Sɛ ne kunu no abɔ asu oo, ɔmmɔɔ asu oo, ɛsɛ sɛ ɔkata ne ti efisɛ ɔbarima no ne abusua ti. * Sɛ ɛho behia sɛ ɔbea no bɔ mpae bere a ne ba abarimaa a wabɔ asu wɔ hɔ a, ɛsɛ sɛ ɔkata ne ti, ɛnyɛ sɛ ne ba no ne abusua no ti, na mmom esiane tumi a wɔde ama mmarima a wɔabɔ asu wɔ Kristofo asafo no mu nti.

Afei Paulo ka asafo no nso ho asɛm sɛ: “Sɛ obi po amanne yi gye foforo tom a, yɛn de yenni foforo biara, Onyankopɔn asafo horow no nso saa ara.” (Nkyekyɛm 16) Kristofo asafo no mu no, wɔde tiyɛ no ama mmarima a wɔabɔ asu. (1 Timoteo 2:11-14; Hebrifo 13:17) Mmarima nkutoo na wɔpaw wɔn sɛ mpanyimfo ne asomfo, na eyinom na Onyankopɔn de ahyɛ wɔn nsa sɛ wɔnhwɛ ne nguan so. (Asomafo Nnwuma 20:28) Nanso bere ne bere mu no, ebehia sɛ Kristoni bea di dwuma bi a anka ɔbarima a wabɔ asu na ɛsɛ sɛ odi. Sɛ nhwɛso no, sɛ ɔbarima a wabɔ asu a ɔfata biara nni hɔ a, ebehia sɛ ɔbea hwɛ asɛnka nhyiam so. Anaasɛ obetumi ne obi ayɛ Bible adesua a wɔayɛ ho nhyehyɛe dedaw bere a ɔbarima a wabɔ asu wɔ hɔ. * Esiane sɛ dwumadi a ɛte saa ka Kristofo asafo no nhyehyɛe ho nti, ɛsɛ sɛ ɔbea no kata ne ti de kyerɛ sɛ ɔredi dwuma a wɔde ahyɛ ɔbarima nsa.

Nanso, ɔsom ho dwumadi ahorow pii wɔ hɔ a ɛho renhia sɛ ɔbea kata ne ti. Sɛ nhwɛso no, ɛho nhia sɛ ɔkata ne ti bere a ɔrema mmuae wɔ Kristofo nhyiam ase, bere a ɔne ne kunu anaa ɔbarima foforo a wabɔ asu reyɛ afie afie asɛnka adwuma, anaa bere a ɔne ne mma a wɔmmɔɔ  asu resua ade anaa wɔrebɔ mpae. Nsɛmmisa foforo betumi asɔre wɔ asɛm yi ho, enti sɛ onuawa bi adwenem nteɛ no wɔ asɛm bi ho a, obetumi ayɛ ho nhwehwɛmu. * Nanso sɛ n’adwenem nteɛ no na sɛ n’ahonim kyerɛ no sɛ ɔnkata ne ti a, mfomso biara nni ho sɛnea mfonini yi kyerɛ no.

Atirimpɔw. Nkyekyɛm 10 no mu no, yehu nneɛma mmienu bi nti a ɛsɛ sɛ Kristoni bea kata ne ti: “Ɛsɛ sɛ ɔbea nya tumi ho sɛnkyerɛnne wɔ ne ti so, abɔfo no nti.” Nea edi kan no, hyɛ asɛm “tumi ho sɛnkyerɛnne” no nsow. Sɛ ɔbea kata ne ti a, ɛyɛ ɔkwan a ɔde kyerɛ sɛ obu tumi a Yehowa de ahyɛ asafo no mu mmarima a wɔabɔ asu no nsa no. Enti ɔyɛ saa de kyerɛ sɛ ɔdɔ Yehowa Nyankopɔn na odi no nokware. Yehu atirimpɔw a ɛto so mmienu wɔ asɛm yi mu: “Abɔfo no nti.” Sɛ ɔbea kata ne ti a, ɔkwan bɛn so na ɛka honhom abɔde a wɔkorɔn no?

Abɔfo ani gye ho sɛ wobehu sɛ Yehowa asomfo kyerɛ obu ma ne tumidi wɔ n’ahyehyɛde no mu baabiara, ɔsoro ne asase so. Afei nso abɔfo no sua biribi fi adesamma a wɔnyɛ pɛ hɔ wɔ asɛm yi mu. Wonim sɛ ɛsɛ sɛ wɔn nso brɛ wɔn ho ase hyɛ Yehowa nhyehyɛe ase; eyi yɛ ade a abɔfo pii antumi anni mu nokware wɔ tete mmere no mu. (Yuda 6) Afei abɔfo no behu Kristoni bea a ne ho akokwaw, ɔwɔ nimdeɛ, na n’adwenem abue sen ɔbarima a wabɔ asu wɔ asafo no mu, nanso ɔbrɛ ne ho ase ma ɔbarima no tumidi. Ebetumi aba mpo sɛ ɔbea yi yɛ Kristoni a wɔasra no a akyiri yi ɔbɛka wɔn a Kristo ne wɔn bedi ade no ho. Akyiri yi ɔbea a ɔte saa no benya  dibea a ɛkorɔn sen nea abɔfo no wɔ na ɔne Kristo adi ade wɔ soro. Eyi yɛ nhwɛso fɛfɛ ankasa a abɔfo no hu nnɛ! Hwɛ hokwan fɛfɛ a anuanom mmea nyinaa wɔ sɛ wofi nokwaredi mu yɛ osetie na wɔbrɛ wɔn ho ase wɔ abɔfo anokwafo ɔpepem huhaa no anim!

^ nky. 3 Ɛnyɛ ne kwan so sɛ Kristoni bea bɛbɔ mpae ma apue afi n’ano bere a ne kunu a ɔyɛ gyidini wɔ hɔ, gye sɛ tebea bi asi; ebia na ɔyare bi abɔ ne kunu no ma ontumi nkasa.

^ nky. 1 Onuawa ne ɔdawurubɔfo barima a ɔmmɔɔ asu a ɔnyɛ ne kunu kɔyɛ Bible adesua a, enhia sɛ ɔkata ne ti so.

^ nky. 2 Sɛ wopɛ sɛ wuhu eyi ho nsɛm pii a, yɛsrɛ wo hwɛ Ɔwɛn-Aban, February 15, 2015, kratafa 29; Ɔwɛn-Aban, July 15, 2002, kratafa 26-27, ne February 15, 1977, Borɔfo Ɔwɛn-Aban kratafa 125-128.