BERE biara a wubetwam afa wo fipamfo bi fie no, wotow wo nsa kyia no. Nnansa yi de, woahyɛ no nsow sɛ sɛ wo ne w’abusua retwam a, ɔhwɛ mo paa. Ɛda bi a wukyiaa no wiei no, ofii ase ne wo kasae. Ɔkae sɛ: “Ma mimmisa wo asɛm bi. Dɛn na ɛma moyɛ soronko saa?” Wo nso wubisaa no sɛ, “Dɛn na woreka ho asɛm yi?” Ɔkae sɛ, “Minim sɛ moyɛ Yehowa Adansefo, anaa meboa? Moda nsow koraa. Monte sɛ asɔre ahorow a aka no​—munni nnapɔnna, na momfa mo ho nhyehyɛ amanyɔsɛm ne akodi mu. Mo mu biara nnom sigaret. Na mihu sɛ mo mmusua nso bɔ ɔbra pa. Dɛn koraa na ɛma moyɛ soronko saa?”

Wunim sɛ nea enti a yɛyɛ soronko koraa ne sɛ: Onyankopɔn Ahenni na edi yɛn so, na Yesu a ɔne yɛn Hene no gu so retew yɛn ho. Ɔreboa yɛn sɛnea ɛbɛyɛ a yebedi n’anammɔn akyi, na ama yɛayɛ soronko wɔ wiase bɔne yi mu. Wɔ saa ɔfã yi mu no, yebehu sɛnea Mesia Ahenni no akɔ so atew Onyankopɔn nkurɔfo ho wɔ honhom fam, abrabɔ fam, ne n’ahyehyɛde no mu​—na ne nyinaa hyɛ Yehowa anuonyam.