Nneɛma bɔne a ɛrekɔ so nnɛ wɔ asase so no kyerɛ sɛ Paradise abɛn. Bible no kae sɛ yebehu mmere a ɛyɛ hu, bere a aka kakraa bi ma Paradise aba no. Yɛte mmere a ɛte saa mu nnɛ! Nneɛma a Bible kae sɛ ɛbɛba no bi ni:

Akodi akɛse. “Na ɔman bɛsɔre atia ɔman na ahenni atia ahenni.” (Mateo 24:7) Nkɔmhyɛ yi abam. Efi 1914 reba no, wɔako wiase nyinaa ako abien ne ako nketewa pii. Nnipa ɔpepem pii awuwu wom.

Nyarewa bɛtrɛw. ‘Ɔyaredɔm bɛba mmeaemmeae.’ (Luka 21:11) So eyi abam? Yiw. Kokoram, komayare, nsamanwaw, atiridii, AIDS, ne nyarewa foforo akunkum nnipa ɔpepem pii.

Aduankɔm. Nnipa a aduan a wonya nso wɔn di wɔ wiase nyinaa. Ɔkɔm kunkum nnipa ɔpepem pii afe biara. Eyi yɛ sɛnkyerɛnne foforo a ɛkyerɛ sɛ ɛrenkyɛ na Paradise aba. Bible ka sɛ: “Aduankɔm bɛba.”—Marko 13:8.

 Asasewosow. “Na . . . asasewosow bɛba mmeaemmeae.” (Mateo 24:7) Eyi nso abam wɔ yɛn bere yi mu. Efi 1914 reba no, nnipa bɛboro ɔpepem biako awuwu wɔ asasewosow mu.

Nnebɔneyɛfo. Nnipa bɛyɛ ‘sikaniberefo’ ne “ahopɛ.” Wɔbɛyɛ “wɔn a wɔdɔ anigyede sen Nyankopɔn.” Mmofra bɛyɛ “awofo so asoɔdenfo.” (2 Timoteo 3:1-5) So wunnye ntom sɛ nnipa pii wɔ hɔ nnɛ a wɔte saa? Wommu Onyankopɔn na wɔhaw wɔn a wɔbɔ mmɔden sɛ wobesua Onyankopɔn ho ade no.

Nsɛmmɔnedi. ‘Amumɔyɛ bɛdɔɔso.’ (Mateo 24:12) Ɛda adi sɛ wubegye atom sɛ nnɛ nnipa di nsɛmmɔne pii sen mfe a atwam no. Wobetumi awia nnipa a wɔwɔ baabiara no nneɛma, asisi wɔn na wɔapira wɔn.

Eyinom nyinaa kyerɛ sɛ Onyankopɔn Ahenni abɛn. Bible ka sɛ: “Sɛ muhu sɛ saa nneɛma yi resisi a, munhu sɛ Onyankopɔn ahenni no abɛn.” (Luka 21:31) Dɛn ne Onyankopɔn Ahenni? Ɛyɛ Onyankopɔn soro nniso a ɛde Paradise bɛba asase yi so. Onyankopɔn Ahenni besi nnipa nniso horow ananmu.—Daniel 2:44.