ODIYIFO Daniel traa ase bɛboro mfirihyia 500 ansa na wɔrewo Yesu. Nanso, Yehowa maa Daniel nsa kaa nsɛm bi a na ebetumi ama wɔakyerɛ bere a na wɔbɛsra Yesu, anaa bere a wɔbɛpaw no sɛ Mesia, anaa Kristo no. Wɔka kyerɛɛ Daniel sɛ: “Hu na tie sɛ: Efi asɛm a ɛka sɛ wɔnsan nkyekye Yerusalem nsi n’ananmu no fi so kosi obirɛmpɔn a wɔasra no so yɛ adapɛn ason, [ne] adapɛn aduosia abien.”—Daniel 9:25.

Sɛ yebehu bere a na Mesia no bɛba a, nea edi kan no, ɛsɛ sɛ yehu bere a nkɔmhyɛ a ɛkae sɛ Mesia no bɛba no fii ase nyaa mmamu. Sɛnea nkɔmhyɛ no kyerɛ no, ‘efi asɛm a ɛka sɛ wɔnsan nkyekye Yerusalem nsi n’ananmu so.’ Bere bɛn na wɔkaa “asɛm a ɛka sɛ” wɔnsan nkyekye Yerusalem no? Sɛnea Bible kyerɛwfo Nehemia kyerɛ no, wɔkae sɛ wɔnsan nto Yerusalem afasu no wɔ “ɔhene Artasasta afe a ɛto so aduonu” mu. (Nehemia 2:1, 5-8) Abakɔsɛm akyerɛwfo si so dua sɛ Artasasta ahenni no fii ase wɔ afe 475 A.Y.B. mu. Enti, n’ahenni afe a ɛto so 20 no yɛ afe 455 A.Y.B. Afei, yɛahu bere a nkɔm a Daniel hyɛ faa Mesia no ho no fii ase, ɛyɛ afe 455 A.Y.B.

Daniel kyerɛɛ bere tenten a na ebedi ansa na “obirɛmpɔn a wɔasra no,” anaa Mesia Ɔkannifo no, aba. Nkɔmhyɛ no kae sɛ ebedi ‘adapɛn ason, ne adapɛn aduosia abien’ a sɛ wɔka ne nyinaa bom a ɛyɛ adapɛn 69. Saa bere yi tenten yɛ ahe? Bible nkyerɛase pii ka sɛ adapɛn yi nyɛ adapɛn a emu biara yɛ nnanson, na mmom ɛyɛ mfepɛn. Ɛkyerɛ sɛ, dapɛn biara gyina hɔ ma mfirihyia ason. Ná tete Yudafo no nim mfepɛn, anaa mmere a na wɔkyekyɛm yɛ no mfirihyia ason mfirihyia ason no yiye. Sɛ nhwɛso no, na afe a ɛto so ason biara yɛ Homeda ma Israelfo, sɛnea na wodi Homeda ɛda a ɛto so ason biara no. (Exodus 23:10, 11) Enti, na nkɔmhyɛ kwan so adapɛn 69 no yɛ mfepɛn 69 a dapɛn biara yɛ mfirihyia 7, anaa ne nyinaa bom yɛ mfirihyia 483.

Afei, nea ɛsɛ sɛ yɛyɛ ara ne akontaa a yebebu. Sɛ yɛkan fi afe 455 A.Y.B. a, mfirihyia 483 no de yɛn ba afe 29 Y.B. Saa afe no ara mu pɛpɛɛpɛ na wɔbɔɔ Yesu asu ma ɔbɛyɛɛ Mesia no!* (Luka 3:1, 2, 21, 22) So sɛnea Bible nkɔmhyɛ yi nyaa mmamu no nyɛ nwonwa?


*  Efi afe 455 A.Y.B. besi afe 1 A.Y.B. yɛ mfirihyia 454. Efi afe 1 A.Y.B. besi afe 1 Y.B. yɛ afe biako. Na efi afe 1 Y.B. besi afe 29 Y.B. yɛ mfirihyia 28. Sɛ yɛka akontaahyɛde abiɛsa yi bom a ne nyinaa si mfirihyia 483. ‘Wotwaa’ Yesu ‘kyenee,’ kyerɛ sɛ, wokum no wɔ afe 33 Y.B. mu, wɔ mfepɛn 70 no mu. (Daniel 9:24, 26) Hwɛ Tie Daniel Nkɔmhyɛ No! ti 11, ne Insight on the Scriptures, Po 2, kratafa 899-901. Yehowa Adansefo na atintim nhoma abien no nyinaa.

“ADAPƐN ADUƆSON”
Mfirihyia 490
Adapɛn 7
(Mfirihyia 49)
Adapɛn 62
(Mfirihyia 434)

←A.Y.B. | Y.B.→

Dapɛn 1
(Mfirihyia 7)
455

“Asɛm a ɛka sɛ wɔnsan nkyekye Yerusalem”

Yerusalem amamfõ so
406

Wɔsan kyekye Yerusalem

Yerusalem a wɔsan kyekyee
29

Mesia no ba

Wɔrebɔ Yesu asu
33

‘Wotwa’ Mesia no ‘kyene’

Yesu rewu
36

“Adapɛn aduɔson” no awiei”

Roma sraani

← Hwɛ ti a wɔtwe adwene si so no