Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Me Nhoma a Ɛka Bible Mu Nsɛm

Adesua 102: Yesu Te Ase

Adesua 102: Yesu Te Ase

WUNIM nnipa ko a ɔbea no ne mmarima baanu no yɛ? Ɔbea no yɛ Maria Magdalene, a ɔyɛ Yesu adamfowa. Na mmarima a wɔhyehyɛ ntade fitaa no yɛ abɔfo. Ɔdan ketewa a Maria rehwɛ mu no ne baabi a wosiee Yesu bere a owui no. Wɔfrɛ no ɔboda. Nanso afei amũ no nni hɔ! Hena na ɔbɛfae? Ma yɛnhwɛ.

Abɔfo ne Maria Magdalene rekasa

Yesu wu akyi no, asɔfo no ka kyerɛɛ Pilato sɛ: ‘Yesu te ase no ɔkae sɛ ɔbɛsan asɔre nnansa akyi. Enti ma wɔnkɔwɛn ɔdamoa no. Na n’asuafo no ankowia ne funu no na wɔanka sɛ wasɔre!’ Pilato kae sɛ wɔnsoma asraafo mma wɔnkɔwɛn ɔdamoa no.

Nanso Yesu wu akyi da a ɛto so abiɛsa anɔpa tutuutu no Yehowa bɔfo bae mpofirim. Opirew ɔbo no fii ɔda no ano. Ehu kaa asraafo no araa ma na wontumi nka wɔn ho. Akyiri yi bere a wɔhwɛɛ ɔda no mu no na amũ no nni hɔ! Asraafo no binom kɔka kyerɛɛ asɔfo no. Wunim nea asɔfo bɔne no yɛe? Wɔmaa asraafo no sika sɛ wonni atoro. Wɔkae sɛ: ‘Monka sɛ n’asuafo no baa anadwo, bere a na yɛadeda, na wobewiaa amũ no.’

Saa bere no mu no, mmea bi a na wɔyɛ Yesu nnamfowa kɔɔ ɔda no so. Hwɛ wɔn ho dwiriw a edwiriw wɔn sɛ wohui sɛ ɔda no ano da hɔ a hwee nni mu! Mpofirim ara abɔfo baanu a wɔn ntade hyerɛn puei. Wobisae sɛ: ‘Dɛn nti na morehwehwɛ Yesu wɔ ha? Wɔanyan no. Monka mo ho nkɔka nkyerɛ n’asuafo no.’ Hwɛ mmirika ara a mmea no tui! Nanso ɔbarima bi ma wogyinae. Wunim nipa ko? Ɛyɛ Yesu! Ɔkae sɛ: ‘Monkɔka nkyerɛ m’asuafo.’

Bere a mmea no ka kyerɛɛ asuafo no sɛ Yesu asɔre na wɔahu no no, na asuafo no ntumi nnye nni. Petro ne Yohane tuu mmirika kɔɔ ɔda no so sɛ wɔn ankasa rekɔhwɛ, na na hwee nni ɔda no mu! Bere a Petro ne Yohane fii hɔ no, Maria Magdalene kaa akyi. Saa bere no na ɔhwɛɛ ɔda no mu huu abɔfo baanu no.

Wunim nea ɛbaa Yesu amũ no so? Onyankopɔn ma ɛyerae. Ɛnyɛ ɔhonam nipadua a Yesu de wui no na Onyankopɔn de nyan no. Ɔmaa Yesu honhom nipadua foforo te sɛ abɔfo a wɔwɔ soro no. Nanso sɛnea ɛbɛyɛ na Yesu asuafo no ahu sɛ ɔte ase no, ɔfaa nipadua a nnipa betumi ahu, sɛnea yebesua ho ade no.

Mateo 27:62-66; 28:1-15; Luka 24:1-12; Yohane 20:1-12.



Nsɛmmisa

  • Hena ne ɔbea a ɔwɔ mfonini no mu no, henanom ne mmarima baanu no, na hefa na wɔwɔ no?
  • Adɛn nti na Pilato ka kyerɛɛ asɔfo no sɛ wɔnsoma asraafo ma wɔnkɔwɛn Yesu damoa no?
  • Yesu wu akyi no, dɛn na ɔbɔfo bi yɛe ne nnansa so anɔpatutuutu, nanso dɛn na asɔfo no yɛe?
  • Adɛn nti na mmea bi a wɔkɔɔ ɔda no so no ho dwiriw wɔn?
  • Dɛn na ɛmaa Petro ne Yohane tuu mmirika kɔɔ Yesu ɔda no so, na dɛn na wohui?
  • Dɛn na ɛbaa Yesu amũ no so, nanso dɛn na ɔyɛe de kyerɛɛ asuafo no sɛ ɔte ase?

Nsɛmmisa foforo

  • Kenkan Mateo 27:62-66 ne 28:1-15.

    Bere a Yesu nyanee no, dɛn na asɔfo mpanyin, Farisifo, ne mpanyimfo no yɛe a ɛkyerɛ sɛ wɔayɛ bɔne atia honhom kronkron no? (Mat. 12:24, 31, 32; 28:11-15)

  • Kenkan Luka 24:1-12.

    Ɔkwan bɛn so na asɛm a ɛfa Yesu wusɔre no ho no kyerɛ sɛ Yehowa bu mmea sɛ adansefo anokwafo? (Luka 24:4, 9, 10; Mat. 28:1-7)

  • Kenkan Yohane 20:1-12.

    Ɔkwan bɛn so na Yohane 20:8, 9 boa ma yehu sɛ boasetɔ ho hia bere a yɛnte Bible nkɔmhyɛ bi mmamu ase nwie no? (Mmeb. 4:18; Mat. 17:22, 23; Luka 24:5-8; Yoh. 16:12)

SUA PII

YESU NE ƐKWAN NO, NOKORƐ NO NE NKWA

Yesu Yii Ne Ho Adi Kyerɛɛ Nnipa Pii

Dɛn na Yesu yɛe a ɛmaa n’asuafo no huu sɛ ampa wanyane?

ƆWƐN-ABAN

Yesu Wuo ne Ne Wusɔreɛ—Nea Ɛbɛtumi Ayɛ Ama Wo

Kyerɛw nsɛm nsia a ɛma yɛhunu sɛnea onipa baako wuo bɛtumi ama nnipa pii anya nkwa.