Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Me Nhoma a Ɛka Bible Mu Nsɛm

Adesua 103: Ɔkɔɔ Ɔdan a Wɔatom Mu

Adesua 103: Ɔkɔɔ Ɔdan a Wɔatom Mu

BERE a Petro ne Yohane fii ɔda a wosiee Yesu wɔ mu no so no, ɛkaa Maria nkutoo wɔ hɔ. Ofii ase sui. Afei ɔbɔɔ ne mu ase hwɛɛ mu, sɛnea yehui wɔ mfonini biako no mu no. Ohuu abɔfo baanu wom! Wobisaa no sɛ: ‘Dɛn nti na woresũ?’

Maria buae sɛ: ‘Wɔafa me Wura, na minnim faako a wɔde no akɔto.’ Afei Maria dan ne ho, na ohuu ɔbarima bi. Obisaa no sɛ: ‘Hena na wohwehwɛ no?’

Maria susuwii sɛ ɔbarima no ne turom hɔ hwɛfo no, na ebia ɔno na wayi Yesu amũ no afi hɔ. Enti ɔka kyerɛɛ no sɛ: ‘Sɛ woafa no afi ha a, kyerɛ me baabi a wode no akɔto.’ Nanso na ɔbarima no yɛ Yesu. Na wafa nipadua a Maria ntumi nhu no. Nanso bere a ɔbɔɔ Maria din frɛɛ no no, ohui sɛ ɛyɛ Yesu. Enti otuu mmirika kɔka kyerɛɛ asuafo no sɛ: ‘Mahu Awurade!’

Akyiri yi, saa da no ara, bere a asuafo baanu nam rekɔ akuraa bi a wɔfrɛ no Emaus ase no, ɔbarima bi bɛkaa wɔn ho. Na asuafo no werɛ ahow efisɛ wɔakum Yesu. Nanso bere a wɔnam rekɔ no, ɔbarima no kyerɛkyerɛɛ wɔn nneɛma pii fii Bible mu a ɛmaa wɔn werɛ kyekyee. Akyiri yi, bere a wɔsoɛɛ baabi redidi no, asuafo no hui sɛ ɔbarima no yɛ Yesu. Afei Yesu yerae, na asuafo baanu no yɛɛ ntɛm san kɔɔ Yerusalem sɛ wɔkɔbɔ asomafo no amanneɛ.

Bere a eyi rekɔ so no, Yesu yii ne ho adi kyerɛɛ Petro nso. Afoforo no nso ho peree wɔn bere a wɔtee no. Na asuafo baanu yi kɔɔ Yerusalem kohuu asomafo no. Wɔkaa sɛnea Yesu yii ne ho adi kyerɛɛ wɔn wɔ kwan no so no ho asɛm. Na bere a wogu so reka eyi ho asɛm no, wunim anwonwade a esii?

Hwɛ mfonini no. Yesu bepuee dan mu hɔ ankasa, ɛwom sɛ na wɔato pon no mu de. Anigye bɛn ara na asuafo no nyae! So ɛno nyɛ anigye da anaa? Wubetumi akan mpɛn dodow a Yesu ayi ne ho adi akyerɛ n’akyidifo de bedu saa bere yi? Wunyaa mpɛn anum?

Yesu reyi ne ho adi akyerɛ asuafo no

Na ɔsomafo Toma nni hɔ bere a Yesu bae no. Enti asuafo no ka kyerɛɛ no sɛ: ‘Yɛahu Awurade!’ Nanso Toma kae sɛ gye sɛ ɔno ankasa hu Yesu na wagye adi. Nnawɔtwe akyi no asuafo no hyiaa ɔdan bi mu bio a na wɔato pon no mu, na saa bere yi de na Toma ka wɔn ho. Mpofirim ara Yesu puee dan mu hɔ. Afei de Toma gye dii.

Yohane 20:11-29; Luka 24:13-43.



Nsɛmmisa

  • Dɛn na Maria ka kyerɛɛ ɔbarima bi a osusuwii sɛ ɔyɛ turom hɔ hwɛfo no, nanso dɛn na ɛma ohui sɛ ɛyɛ Yesu ankasa?
  • Dɛn na asuafo baanu a wɔnam rekɔ akuraa bi a wɔfrɛ no Emaus no hui?
  • Anwonwade bɛn na esii bere a asuafo baanu no reka akyerɛ asomafo no sɛ wɔahu Yesu no?
  • Mpɛn ahe na Yesu ayi ne ho adi akyerɛ n’akyidifo no?
  • Dɛn na Toma kae bere a ɔtee sɛ asuafo no ahu Awurade no, nanso dɛn na esii wɔ nnawɔtwe akyi?

Nsɛmmisa foforo

  • Kenkan Yohane 20:11-29.

    So na Yesu reka wɔ Yohane 20:23 sɛ wɔama nnipa tumi sɛ wɔmfa bɔne nkyɛ? Kyerɛkyerɛ mu. (Dw. 49:2, 7; Yes. 55:7; 1 Tim. 2:5, 6; 1 Yoh. 2:1, 2)

  • Kenkan Luka 24:13-43.

    Yɛbɛyɛ dɛn atumi asiesie yɛn koma ma agye Bible mu nokware atom? (Luka 24:32, 33; Esra 7:10; Mat. 5:3; Aso. 16:14; Heb. 5:11-14)