Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Me Nhoma a Ɛka Bible Mu Nsɛm

Adesua 99: Abansoro Dan Bi Mu

Adesua 99: Abansoro Dan Bi Mu

AFEI ɛyɛ Yawda anwummere, nnanu akyi. Ná Yesu ne n’asomafo 12 no aba abansoro dan kɛse yi mu rebedi Twam aduan no. Ɔbarima a wuhu sɛ ɔrefi adi akɔ no yɛ Yuda Iskariot. Ɔrekɔkyerɛ asɔfo no ɔkwan a wobetumi afa so anya Yesu.

Awurade anwummeduan

Da a edi eyi anim ara no Yuda kɔɔ wɔn nkyɛn kobisae sɛ: ‘Sɛ meboa mo ma mokyere Yesu a, dɛn na mobɛma me?’ Wɔkae sɛ: ‘Nnwetɛbona aduasa.’ Enti afei na Yuda rekohyia saa mmarima no de wɔn aba Yesu nkyɛn. So eyi nyɛ bɔne kɛse?

Wɔawie Twam adidi no. Nanso afei na Yesu refi adidi titiriw bi nso ase. Ɔde abodoo maa n’asomafo no na ɔkae sɛ: ‘Munni, efisɛ eyi gyina hɔ ma me nipadua a wɔde bɛma mo no.’ Afei ɔde kuruwa a bobesa wom maa wɔn, na ɔkae sɛ: ‘Monnom, efisɛ eyi gyina hɔ ma me mogya, a wobehwie agu ama mo.’ Bible no frɛ eyi ‘Awurade anwummeduan,’ anaa ‘Awurade adidi.’

Israelfo no dii Twam afahyɛ no ma ɛkaee wɔn bere a Onyankopɔn bɔfo ‘twaa’ wɔn afie ho wɔ Misraim, na okunkum mmakan a wɔwɔ Misrifo no afie mu no. Nanso afei na Yesu pɛ sɛ n’akyidifo kae no ne sɛnea ɔde ne nkwa too hɔ maa wɔn. Ɛno nti na ɔka kyerɛɛ wɔn sɛ wonni aduan titiriw yi afe biara.

Wodii Awurade Anwummeduan no wiei no, Yesu ka kyerɛ n’asomafo no sɛ wonnya akokoduru na wɔnyɛ den wɔ gyidi mu. Afei wɔtoo nnwom yii Onyankopɔn ayɛ na wofii adi. Ná ade asa, ebia na anadwo dumien atwam. Ma yɛnhwɛ baabi a wɔkɔe.

Mateo 26:14-30; Luka 22:1-39; Yohane ti 13 kosi 17; 1 Korintofo 11:20.



Nsɛmmisa

  • Sɛnea yehu wɔ mfonini no mu no, adɛn nti na Yesu ne n’asomafo 12 no aba abansoro dan kɛse bi mu?
  • Ɔbarima a ɔrefi adi akɔ no yɛ hena, na ɔrekɔyɛ dɛn?
  • Wowiee Twam adidi no, adidi titiriw bɛn na Yesu fii ase?
  • Twam afahyɛ no maa Israelfo no kaee adeyɛ bɛn, na dɛn na saa aduan titiriw yi kae Yesu akyidifo?
  • Wɔ Awurade Anwummeduan no akyi no, dɛn na Yesu ka kyerɛɛ n’akyidifo no, na dɛn na wɔyɛe?

Nsɛmmisa foforo

  • Kenkan Mateo 26:14-30.

    Ɔkwan bɛn so na Mateo 26:15 da no adi sɛ yi a Yuda yii Yesu mae no yɛ boapayɛ?

    Atirimpɔw abien bɛn na Yesu mogya a wohwie gui no di ho dwuma? (Mat. 26:27, 28; Yer. 31:31-33; Efe. 1:7; Heb. 9:19, 20)

  • Kenkan Luka 22:1-39.

    Ɔkwan bɛn so na Satan hyɛn Yuda mu? (Luka 22:3; Yoh. 13:2; Aso. 1:24, 25)

  • Kenkan Yohane 13:1-20.

    Esiane asɛm a ɛwɔ Yohane 13:2 no nti, so wobetumi de asodi ato Yuda so wɔ nea ɔyɛe no ho, na dɛn na Onyankopɔn asomfo betumi asua afi eyi mu? (Gen. 4:7; 2 Kor. 2:11; Gal. 6:1; Yak. 1:13, 14)

    Nhwɛsode a asuade wom bɛn na Yesu de mae? (Yoh. 13:15; Mat. 23:11; 1 Pet. 2:21)

  • Kenkan Yohane 17:1-26.

    Bere a Yesu bɔɔ mpae sɛ n’akyidifo “nyɛ biako” no, na dɛn na ɔpɛ sɛ ɔkyerɛ? (Yoh. 17:11, 21-23; Rom. 13:8; 14:19; Kol. 3:14)