Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Me Nhoma a Ɛka Bible Mu Nsɛm

Adesua 91: Yesu Kyerɛkyerɛ wɔ Bepɔw So

Adesua 91: Yesu Kyerɛkyerɛ wɔ Bepɔw So

HWƐ Yesu a ɔte ha. Ɔrekyerɛkyerɛ saa nnipa yi nyinaa wɔ bepɔw bi so wɔ Galilea. Wɔn a wɔte ne nkyɛn pɛɛ no yɛ n’asuafo. Na wapaw wɔn mu 12 ma wɔabɛyɛ n’asomafo. Asomafo no yɛ Yesu asuafo titiriw. Wunim wɔn din?

Yesu rekyerɛkyerɛ

Wɔne Simon Petro ne ne nua Andrea. Afei Yakobo ne Yohane, a wɔn nso yɛ anuanom. Wɔfrɛ biako Yakobo, na wɔfrɛ ɔfoforo nso Simon. Wɔfrɛ asomafo baanu nso Yuda. Biako ne Yuda Iskariot, na biako nso ne Yuda a wɔsan frɛ no Tadeo. Ne afei Filipo ne Natanael (a wɔsan frɛ no Bartolomeo), ne Mateo ne Toma.

Na Yesu fi Samaria san bae no ofii ase kaa asɛm nea edi kan sɛ: ‘Ɔsoro ahenni no abɛn.’ Wunim nea saa ahenni no yɛ? Ɛyɛ Onyankopɔn nniso ankasa. Yesu ne ne hene. Ofi soro bedi hene na ɔde asomdwoe aba asase so. Onyankopɔn ahenni no bɛma asase nyinaa adan paradise fɛfɛɛfɛ.

Yesu rekyerɛkyerɛ nkurɔfo no ahenni no ho ade. Ɔrekyerɛkyerɛ sɛ: ‘Sɛnea ɛsɛ sɛ mobɔ mpae ni. Yɛn Agya a wowɔ soro, wo din ho ntew. W’ahenni mmra. Wɔnyɛ wo pɛ wɔ asase so, sɛnea wɔyɛ ɔsoro.’ Nnipa pii frɛ eyi ‘Awurade Mpaebɔ.’ Afoforo nso frɛ no ‘Yɛn Agya a Wowɔ Soro.’ Wunim mpaebɔ no nyinaa?

Ná Yesu rekyerɛ wɔn sɛnea ɛsɛ sɛ wɔne wɔn ho wɔn ho di nso. Ɔkae sɛ: ‘Nea wopɛ sɛ afoforo yɛ ma wo no, yɛ ma wɔn nso.’ Sɛ afoforo ne wo di no ayamye so a, so w’ani nnye ho? Saa na na Yesu reka, ɛsɛ sɛ yɛne nkurɔfo di no ayamye so. So ɛrenyɛ nwonwa wɔ paradise asase so bere a obiara bɛyɛ eyi anaa?

Mateo ti 5 kosi 7; 10:1-4.



Nsɛmmisa

  • Sɛ wohwɛ mfonini no a, ɛhefa na Yesu rekyerɛkyerɛ no, na henanom na wɔte ne nkyɛn pɛɛ no?
  • Dɛn ne asomafo 12 no din?
  • Ahenni bɛn na na Yesu reka ho asɛm no?
  • Dɛn na Yesu kyerɛɛ nkurɔfo no sɛ wɔmmɔ ho mpae?
  • Dɛn na Yesu ka faa ɔkwan a ɛsɛ sɛ nnipa ne wɔn ho wɔn ho di ho?

Nsɛmmisa foforo

  • Kenkan Mateo 5:1-12.

    Akwan bɛn so na yebetumi ada no adi sɛ honhom fam nneɛma ho hia yɛn? (Mat. 5:3; Rom. 10:13-15; 1 Tim. 4:13, 15, 16)

  • Kenkan Mateo 5:21-26.

    Ɔkwan bɛn so na Mateo 5:23, 24 si so dua sɛ yɛne yɛn nuanom ntam abusuabɔ tumi ka yɛne Yehowa ntam abusuabɔ? (Mat. 6:14, 15; Dw. 133:1; Kol. 3:13; 1 Yoh. 4:20)

  • Kenkan Mateo 6:1-8.

    Dɛn ne su a ɛma obi bu ne ho treneeni a ɛsɛ sɛ Kristofo kwati no bi? (Luka 18:11, 12; 1 Kor. 4:6, 7; 2 Kor. 9:7)

  • Kenkan Mateo 6:25-34.

    Dɛn na Yesu kyerɛkyerɛe de fa hia a ehia sɛ yɛde yɛn ho to Yehowa so wɔ yɛn honam fam ahiade ho? (Ex. 16:4; Dw. 37:25; Filip. 4:6)

  • Kenkan Mateo 7:1-11.

    Dɛn na mfatoho a emu da hɔ fann a ɛwɔ Mateo 7:5 no kyerɛ yɛn? (Mmeb. 26:12; Rom. 2:1; 14:10; Yak. 4:11, 12)