Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Me Nhoma a Ɛka Bible Mu Nsɛm

Adesua 66: Yesebel—Ɔhemmaa Tirimɔdenfo

Adesua 66: Yesebel—Ɔhemmaa Tirimɔdenfo

ƆHENE Yerobeam wu akyi no, ɔhene biara a odii kusuufam mmusuakuw 10 Israel ahemman no so no bɛyɛɛ ɔhemmɔne. Ɔhene Ahab na ɔbɛyɛɛ ɔhene a onye koraa. Wunim nea enti? Nea ɛma ɛbaa saa titiriw biako ne ne yere, Ɔhemmaa Yesebel.

Yesebel nyɛ Israelni bea. Na ɔyɛ Sidon hene babea. Na ɔsom atoro nyame Baal, na onyaa Ahab ne Israelfo pii nso ma wɔsom Baal. Ná Yesebel tan Yehowa na okunkum n’adiyifo pii. Na ɛsɛ sɛ afoforo hintaw wɔ abodan mu na wɔankum wɔn. Sɛ Yesebel hwehwɛ biribi a, obetumi akum onipa mpo sɛnea ɛbɛyɛ na ne nsa aka.

Da koro bi na Ɔhene Ahab werɛ ahow pii. Enti Yesebel bisaa no sɛ: ‘Dɛn nti na wo werɛ ahow nnɛ?’

Ahab buae sɛ: ‘Esiane asɛm a Nabot ka kyerɛɛ me nti. Na mepɛ sɛ metɔ ne bobeturo no. Nanso ɔka kyerɛɛ me sɛ ɔremfa mma me.’

Yesebel kae sɛ: ‘Nhaw wo ho. Megye ama wo.’

Enti Yesebel kyerɛkyerɛw nkrataa kɔmaa kurow a Nabot te mu no mu mpanyimfo no binom. Ɔka kyerɛɛ wɔn sɛ: ‘Monhwehwɛ akwasampafo bi mma wɔnka sɛ Nabot adome Onyankopɔn ne ɔhene. Na afei momfa Nabot nkɔ kurow no akyi nkosiw no abo nkum no.’

Yesebel tee sɛ Nabot awu pɛ no, ɔka kyerɛɛ Ahab sɛ: ‘Afei kɔfa ne bobeturo no.’ Wunnye nni sɛ na ɛsɛ sɛ wɔtwe Yesebel aso?

Ɔhemmaa Yesebel

Enti, bere bi akyi no, Yehowa somaa ɔbarima Yehu sɛ ɔnkɔtwe n’aso. Yesebel tee sɛ Yehu reba no, ɔkekaa n’ani akyi bɔɔ mmɔden sɛ ɔbɛma ne ho ayɛ fɛ. Nanso bere a Yehu bae na ohuu Yesebel wɔ mfɛnsere no mu no, ɔteɛɛm frɛɛ mmarima a wɔwɔ ahemfie hɔ no sɛ: ‘Montow no nkyene fam!’ Mmarima no tiei, sɛnea wuhu wɔ mfonini yi mu no. Wɔtow no kyenee fam, na owui. Eyi ne Ɔhemmaa Yesebel tirimɔdenfo no awiei.

1 Ahene 16:29-33; 18:1-4; 21:1-16; 2 Ahene 9:30-37.



Nsɛmmisa

  • Hena ne Yesebel?
  • Dɛn na ɛmaa Ɔhene Ahab werɛ howee da koro bi?
  • Dɛn na Yesebel yɛe de gyee Nabot bobeturo no maa ne kunu Ahab?
  • Hena na Yehowa somaa no maa no kɔtwee Yesebel aso?
  • Sɛnea mfonini no ma yehu no, bere a Yehu duu Yesebel ahemfie hɔ no, dɛn na esii?

Nsɛmmisa foforo

  • Kenkan 1 Ahene 16:29-33 ne 18:3, 4.

    Bere a Ɔhene Ahab di ade wɔ Israel no, na nneɛma asɛe akodu he? (1 Ahe. 14:9)

  • Kenkan 1 Ahene 21:1-16.

    Ɔkwan bɛn so na Nabot kyerɛe sɛ ɔwɔ akokoduru na odi nokware ma Yehowa? (1 Ahe. 21:1-3; Lev. 25:23-28)

    Sɛ yɛhwɛ nea Ahab yɛe no a, asuade bɛn na ɛde ma yɛn bere a biribi ankɔ yiye no? (1 Ahe. 21:4; Rom. 5:3-5)

  • Kenkan 2 Ahene 9:30-37.

    Dɛn na yebetumi asua afi ahokeka a Yehu de yɛɛ Yehowa apɛde no mu? (2 Ahe. 9:4-10; 2 Kor. 9:1, 2; 2 Tim. 4:2)