Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Me Nhoma a Ɛka Bible Mu Nsɛm

Adesua 64: Salomo Si Asɔredan

Adesua 64: Salomo Si Asɔredan

ANSA na Dawid rewu no, ɔde Yehowa asɔredan a wobesi no nsusuwso a Onyankopɔn de mae no maa Salomo. N’ahenni afe a ɛto so anan no mu no, Salomo fii asɔredan no si ase, na ɔde mfe ason ne fã wiei. Nnipa ɔpedudu pii yɛɛ asɔredan no ho adwuma, na egyee sika pii. Efisɛ wɔde sika kɔkɔɔ ne dwetɛ pii dii dwuma wɔ mu.

Ná asɔredan no wɔ afã atitiriw abien, sɛnea na ntamadan no wɔ no. Nanso na afã yi kɛse yɛ ntamadan no mu de no mmɔho. Salomo ma wɔde apam adaka no kosii piam, na wɔde nneɛma afoforo a na ɛwɔ ntamadan no mu no sisii asa so hɔ.

Bere a wowiee asɔrefi no si no, afahyɛ kɛse kɔɔ so. Salomo kotow asɔredan no anim bɔɔ mpae, sɛnea wutumi hu wɔ mfonini no mu no. Salomo ka kyerɛɛ Yehowa sɛ: ‘Ɔsoro mpo ntumi nkora wo, na afei asɔredan yi. Nanso, O me Nyankopɔn, mesrɛ wo, sɛ wo nkurɔfo de wɔn ani kyerɛ ha bɔ mpae a, tie wɔn.’

Ɔhene Solomon rebɔ mpae

Bere a Salomo wiee ne mpaebɔ no, ogya fi soro bae. Ɛbɛhyew mmoa afɔre a wɔasiesie no. Na hann bi a efi Yehowa nkyɛn baa asɔredan no mu. Eyi kyerɛ sɛ na Yehowa retie, na n’ani asɔ asɔrefi no ne Salomo mpaebɔ no. Afei asɔredan no bɛyɛɛ baabi a nkurɔfo ba bɛsom, ɛnyɛ ntamadan no.

Salomo dii tumi nyansa mu bere tenten, na ɔman no ani gyei. Nanso Salomo warewaree mmea pii a wofi aman afoforo so a wɔnsom Yehowa. Wutumi hu wɔn mu biako a ɔresom ohoni no anim no anaa? Awiei koraa no Salomo yerenom nyaa no ma ɔno nso som anyame afoforo. Wunim nea ɛbae bere a Salomo yɛɛ eyi no? Afei na ɔne nkurɔfo nni no ayamye so. Ne tirim bɛyɛɛ den, na na nkurɔfo ani nnye bio.

Ɔhene Solomon resom ohoni

Eyi maa Yehowa bo fuw Salomo, na ɔka kyerɛɛ no sɛ: ‘Megye ahenni no afi wo nsam de ama onipa foforo. Merenyɛ eyi wo bere so, na mmom wo ba ahenni mu. Nanso merennye ahemman no mu nnipa nyinaa mfi wo ba nsam.’ Ma yɛnhwɛ sɛnea eyi bae.

1 Beresosɛm 28:9-21; 29:1-9; 1 Ahene 5:1-18; 2 Beresosɛm 6:12-42; 7:1-5; 1 Ahene 11:9-13.



Nsɛmmisa

  • Bere tenten bɛn na Salomo de sii Yehowa asɔredan no wiei, na dɛn nti na egyee sika pii saa?
  • Asɔredan no wɔ afã atitiriw ahe, na dɛn na wɔde sii piam hɔ?
  • Bere a wosii asɔredan no wiei no, mpae bɛn na Salomo bɔe?
  • Dɛn na Yehowa yɛ de kyerɛɛ sɛ n’ani asɔ Salomo mpaebɔ no?
  • Salomo yerenom nyaa no ma ɔyɛɛ dɛn, na dɛn na ɛtoo no?
  • Ɛyɛɛ dɛn na Yehowa bo fuw Salomo, na dɛn na Yehowa ka kyerɛɛ no?

Nsɛmmisa foforo

  • Kenkan 1 Beresosɛm 28:9, 10.

    Sɛnea Dawid nsɛm a ɛwɔ 1 Beresosɛm 28:9, 10 kyerɛ no, dɛn na ɛsɛ sɛ yɛyere yɛn ho yɛ wɔ da biara da asetra mu? (Dw. 19:14; Filip. 4:8, 9)

  • Kenkan 2 Beresosɛm 6:12-21, 32-42.

    Dɛn na Salomo kae a ɛkyerɛ sɛ ɔdan a onipa asi biara ntumi nkora Ɔsorosoroni Nyankopɔn no? (2 Be. 6:18; Aso. 17:24, 25)

    Salomo nsɛm a ɛwɔ 2 Beresosɛm 6:32, 33 no ma yehu dɛn wɔ Yehowa ho? (Aso. 10:34, 35; Gal. 2:6)

  • Kenkan 2 Beresosɛm 7:1-5.

    Te sɛ Israelfo no a wɔn koma kaa wɔn ma wɔkamfoo Yehowa bere a wohuu n’anuonyam no, ɔkwan bɛn so na ɛsɛ sɛ ɛka yɛn nnɛ wɔ bere a yesusuw nhyira a Yehowa de ahyira ne nkurɔfo no ho? (2 Be. 7:3; Dw. 22:22; 34:1; 96:2)

  • Kenkan 1 Ahene 11:9-13.

    Sɛ yɛhwɛ Salomo asetra a, ɔkwan bɛn so na ɛma yehu hia a ehia sɛ yedi nokware kodu awiei? (1 Ahe. 11:4, 9; Mat. 10:22; Adi. 2:10)