Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Me Nhoma a Ɛka Bible Mu Nsɛm

Adesua 59: Nea Enti a Ɛsɛ sɛ Dawid Guan

Adesua 59: Nea Enti a Ɛsɛ sɛ Dawid Guan

DAWID kum Goliat akyi no, Israel safohene Abner de no baa Saul anim. Saul ani gyee Dawid ho. Ɔyɛɛ no ne dɔm mu asafohene no biako, na ɔmaa ɔbɛtraa ahemfie.

Akyiri yi, bere a asraafo no fi wɔne Filistifo akodi no resan aba no, mmea no too dwom sɛ: ‘Saul akum mpempem, nanso Dawid akum ɔpedudu.’ Eyi maa Saul ani beree, efisɛ wɔhyɛɛ Dawid anuonyam sen Saul. Nanso Saul ba Yonatan ani ammere. Na ɔdɔ Dawid kɛse, na na Dawid nso dɔ Yonatan pii. Enti wɔn baanu nyinaa hyɛɛ wɔn ho bɔ sɛ wɔbɛyɛ nnamfo bere nyinaa.

Ɔhene Saul retow peaw

Ná Dawid yɛ obi a otumi bɔ sanku yiye, na na Saul pɛ nnwom a ɔbɔ no. Nanso da koro, ahoɔyaw maa Saul yɛɛ biribi a enye koraa. Bere a Dawid rebɔ sanku no, Saul faa ne peaw towee, na ɔkae sɛ: ‘Mɛbɔ Dawid afam fasu no ho!’ Nanso Dawid dan ne ho, na peaw no anka no. Akyiri yi Saul tow peaw no bio a anka Dawid. Enti Dawid hui sɛ ɛsɛ sɛ ɔhwɛ yiye.

Wokae ɛbɔ a Saul hyɛe no? Ɔhyɛɛ bɔ sɛ ɔde ne babea bɛma ɔbarima a obekum Goliat no aware. Akyiri yi Saul ka kyerɛɛ Dawid sɛ ɔde ne babea Mikal bɛma no, nanso ɛsɛ sɛ okum Filistifo 100 ansa. Hwɛ asɛm! Ná Saul ani da so sɛ Filistifo no bekum Dawid. Nanso wɔankum no, enti Saul de ne babea maa Dawid sɛ ne yere.

Da koro Saul ka kyerɛɛ Yonatan ne ne nkoa nyinaa sɛ ɔpɛ sɛ okum Dawid. Nanso Yonatan ka kyerɛɛ n’agya sɛ: ‘Nyɛ Dawid bɔne. Ɔnyɛɛ wo bɔne da. Mmom no, biribiara a wayɛ no yɛ nea ɔde boa wo. Ɔde ne nkwa too ne nsam kokum Goliat, na bere a wuhui no, w’ani gyei.’

Dawid retwe ne ho na peaw anwɔ no

Saul tiee ne ba no, na ɔhyɛɛ bɔ sɛ ɔrenyɛ Dawid bɔne. Wɔsan de Dawid bae, na ɔkɔɔ so som Saul wɔ ne fie hɔ sɛ kan no ara. Nanso, da koro, bere a Dawid rebɔ nnwom no, Saul san too ne peaw no bio sɛ ɔde rebɔ Dawid. Dawid twee ne ho na peaw no kɔwɔɔ fasu no mu. Eyi to so abiɛsa! Afei Dawid hui sɛ ɛsɛ sɛ oguan!

Saa anadwo no Dawid kɔɔ n’ankasa ne fie. Nanso Saul somaa nnipa sɛ wonkokum no. Ná Mikal nim nea n’agya abɔ ne tirim sɛ ɔbɛyɛ. Enti ɔka kyerɛɛ ne kunu sɛ: ‘Sɛ woanguan anadwo yi a wobekum wo ɔkyena.’ Anadwo no Mikal boaa Dawid ma ɔfaa mfɛnsere mu guanee. Bɛyɛ mfe ason no na ɛsɛ sɛ Dawid de ne ho sie sɛnea ɛbɛyɛ a Saul nhu no.

1 Samuel 18:1-30; 19:1-18.



Nsɛmmisa

  • Ɛyɛɛ dɛn na Saul ani beree Dawid, nanso ɔkwan bɛn so na ɛsono Saul ba Yonatan?
  • Ɛda bi, bere a Dawid rebɔ sanku ama Saul no, dɛn na esii?
  • Saul kaa sɛ Dawid nyɛ dɛn ansa na ɔde ne ba Mikal ama no aware, na adɛn nti na Saul kaa saa?
  • Sɛnea wuhu wɔ mfonini no mu no, dɛn na esii mprɛnsa bere a Dawid rebɔ sanku ama Saul no?
  • Dɛn na Mikal yɛe de bɔɔ Dawid nkwa ho ban, na na ɛsɛ sɛ Dawid yɛ dɛn mfe ason?

Nsɛmmisa foforo

  • Kenkan 1 Samuel 18:1-30.

    Ɔkwan bɛn so na ɔdɔ kɛse a na ɛwɔ Dawid ne Yonatan ntam no ma yehu ɔdɔ a ɛwɔ “nguan foforo” no ne “kuw ketewa” no ntam? (1 Sam. 18:1; Yoh. 10:16; Luka 12:32; Sak. 8:23)

    Ɔkwan bɛn so na 1 Samuel 18:4 da Yonatan ahobrɛase a ɛda nsow ma nea Yehowa ayi no sɛ ɔmmɛyɛ ɔhene no adi, ɛmfa ho nokwasɛm a ɛyɛ sɛ ɔno na anka ɛsɛ sɛ odi Saul ade no?

    Ɔkwan bɛn so na nea Saul yɛe no ma yehu sɛ nitan betumi ama yɛayɛ bɔne a ɛsõ, na kɔkɔbɔ bɛn na ɛde ma yɛn? (1 Sam. 18:7-9, 25; Yak. 3:14-16)

  • Kenkan 1 Samuel 19:1-17.

    Ɔkwan bɛn so na Yonatan de ɔno ara nso kra too ne nsam bere a ɔkaa nsɛm a ɛwɔ 1 Samuel 19:4, 5 no? (1 Sam. 19:1, 6)