Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Me Nhoma a Ɛka Bible Mu Nsɛm

Adesua 49: Owia no Gyina Faako

Adesua 49: Owia no Gyina Faako

HWƐ Yosua. Ɔreka sɛ: ‘Owia, gyina!’ Na egyinae. Egyinaa faako da mu nyinaa. Yehowa na ɔma ɛbaa saa! Ma yɛnhwɛ nea enti a na Yosua pɛ sɛ owia kɔ so bɔ no.

Owia

Bere a ahemmɔne baanum a wofi Kanaan asase so no fii ase sɛ wɔreko atia Gibeonfo no, Gibeonfo no somaa obi kɔfrɛɛ Yosua sɛ ɔmmɛboa wɔn. Ose: ‘Bra ntɛm begye yɛn! Ahene a wɔte mmepɔw so no nyinaa aba ne mo nkoa rebɛko.’

Ntɛm ara Yosua ne ne dɔm siim. Wotwaa kwan anadwo no nyinaa. Bere a wobeduu Gibeon no ehu kaa ahene baanum no asraafo na wofii ase sɛ wɔreguan. Afei Yehowa maa amparubo akɛse fi soro tɔe, na eyi kunkum asraafo pii sen wɔn a Yosua dɔm no kunkum wɔn no.

Yosua

Ná Yosua tumi hu sɛ ɛrenkyɛ na owia no akɔtɔ. Esum bɛba, na ahemmɔne baanum no asraafo no binom beguan. Ɛno nti na Yosua bɔɔ Yehowa mpae na ɔkae sɛ: ‘Owia, gyina!’ Na bere a owia no kɔɔ so bɔe no, Israelfo tumi wiee wɔn nkonimdi wɔ ɔko no mu.

Ná ahemmɔne pii da so wɔ Kanaan a wɔmpɛ Onyankopɔn nkurɔfo asɛm. Egyee Yosua ne ne dɔm mfe nsia na wɔde adi ahene 31 so nkonim wɔ asase no so. Bere a wɔyɛɛ eyi no, Yosua hwɛ ma wɔkyekyɛɛ Kanaan asase no mu maa mmusua a wonnyaa baabi ntrae no.

Mfe pii twaam, na Yosua wui a na wadi mfe 110. Bere dodow a ɔne ne nnamfonom te ase no, ɔman no tiee Yehowa. Na bere a nnipa pa yi wuwui no, nkurɔfo no fii ase yɛɛ nneɛma bɔne na ɛde ɔhaw baa wɔn so. Eyi ne bere a ná wohia Onyankopɔn hɔ mmoa ankasa.

Yosua 10:6-15; 12:7-24; 14:1-5; Atemmufo 2:8-13.



Nsɛmmisa

  • Sɛ wohwɛ mfonini no a, dɛn na Yosua reka, na dɛn nti na ɔreka saa?
  • Ɔkwan bɛn so na Yehowa boaa Yosua ne ne dɔm no?
  • Ahene baahe na Yosua dii wɔn so nkonim na egyee bere tenten ahe?
  • Adɛn nti na Yosua kyekyɛɛ Kanaan asase no mu?
  • Yosua dii mfe ahe ansa ɔrewu, na dɛn na ɛbaa nkurɔfo no so wɔ ne wu akyi?

Nsɛmmisa foforo

  • Kenkan Yosua 10:6-15.

    Esiane sɛ yenim sɛ Yehowa maa owia ne ɔsram gyina maa Israelfo nti, awerɛhyem bɛn na yɛwɔ nnɛ? (Yos. 10:8, 10, 12, 13; Dw. 18:3; Mmeb. 18:10)

  • Kenkan Yosua 12:7-24.

    Hena ankasa na Kanaan ahene 31 no so nkonim a wodii no ho anuonyam yɛ ne de, na dɛn nti na eyi ho hia yɛn nnɛ? (Yos. 12:7; 24:11-13; Deut. 31:8; Luka 21:9, 25-28)

  • Kenkan Yosua 14:1-5.

    Ɔkwan bɛn na wɔnam so kyɛɛ asase no maa Israel mmusuakuw no, na ɛma yehu sɛ Paradise asase no kyɛ nso bɛyɛ dɛn? (Yos. 14:2; Yes. 65:21; Hes. 47:21-23; 1 Kor. 14:33)

  • Kenkan Atemmufo 2:8-13.

    Henanom na wɔko tia ɔwae nnɛ te sɛ Yosua a na ɔwɔ Israel no? (Atem. 2:8, 10, 11; Mat. 24:45-47; 2 Tes. 2:3-6; Tito 1:7-9; Adi. 1:1; 2:1, 2)