Kɔ emu nsɛm afã hɔ

Kɔ emu nsɛm afã hɔ

Yehowa Adansefo

Yi kasa a wopɛ Twi

Adesua 42: Afurum Kasa

Adesua 42: Afurum Kasa

WOATE sɛ afurum rekasa pɛn? Ebia wobɛka sɛ ‘Dabi, mmoa nkasa.’ Nanso Bible ka afurum bi a ɔkasae ho asɛm. Ma yɛnhwɛ sɛnea ɛbae.

Ɔbɔfo

Na aka kakra ma Israelfo no adu Kanaan asase no so. Moab hene Balak suro Israelfo. Enti ɔsoma kɔfrɛɛ obi a n’ani atew a wɔfrɛ no Bileam sɛ ɔnkɔdome Israelfo. Balak hyɛɛ Bileam bɔ sɛ ɔbɛma no sika pii, enti Bileam foro traa n’afurum so sɛ okohu Balak.

Na Yehowa mpɛ sɛ Bileam dome Ne nkurɔfo. Enti ɔsomaa ne bɔfo ma ɔde nkrante tenten bi kogyinaa kwan so ma wasiw Bileam kwan. Na Bileam ntumi nhu ɔbɔfo no, nanso afurum no hu no. Enti afurum no bɔɔ mmɔden sɛ ɔbɛsan n’akyi, na awiei koraa no obutuw fam wɔ kwan no so. Bileam bo fuwii kɛse, na ɔde abaa hwee afurum no.

Afei Yehowa maa afurum no kasa kyerɛɛ Bileam. Afurum no bisae sɛ: ‘Dɛn na mayɛ wo na woboro me yi?’

Bileam te afurum so

Bileam kae sɛ: ‘Woama mayɛ sɛ ɔkwasea. Sɛ mewɔ nkrante a anka mekum wo!’

Afurum no bisae sɛ: ‘Mayɛ wo saa da anaa?’

Bileam buae sɛ: ‘Dabi.’

Afei Yehowa maa Bileam huu ɔbɔfo a okura nkrante gyina kwan no so no. Ɔbɔfo no kae sɛ: ‘Dɛn nti na woaboro w’afurum no? Mebae sɛ merebesi wo kwan, efisɛ ɛnsɛ sɛ wokɔdome Israel. Sɛ w’afurum no annan ne ho amfi m’anim a, anka mikum wo, nanso anka merenyɛ afurum no hwee.’

Bileam kae sɛ: ‘Mayɛ bɔne. Na minnim sɛ wugyina kwan no so.’ Ɔbɔfo no maa Bileam kɔe, na okohuu Balak. Ɔbɔɔ mmɔden ara sɛ ɔbɛdome Israel, nanso, mmom no, Yehowa ma ohyiraa Israel mprɛnsa.

Numeri 21:21-35; 22:1-40; 23:1-30; 24:1-25.



Nsɛmmisa

  • Hena ne Balak, na adɛn nti na ɔsoma kɔfrɛɛ Bileam?
  • Adɛn nti na Bileam afurum no daa fam wɔ kwan so?
  • Asɛm bɛn na afurum no ka kyerɛɛ Bileam?
  • Asɛm bɛn na ɔbɔfo bi ka kyerɛɛ Bileam?
  • Bere a Bileam yɛɛ n’adwene sɛ ɔbɛdome Israel no, dɛn na esii?

Nsɛmmisa foforo

  • Kenkan Numeri 21:21-35.

    Ɛyɛɛ dɛn na Israel tumi dii Amorifo hene Sihon ne Basan hene Og so nkonim? (Num. 21:21, 23, 33, 34)

  • Kenkan Numeri 22:1-40.

    Adwene bɛn na Bileam de domee Israel, na dɛn na yebetumi asua afi mu? (Num. 22:16, 17; Mmeb. 6:16, 18; 2 Pet. 2:15; Yuda 11)

  • Kenkan Numeri 23:1-30.

    Ɛwom sɛ Bileam kasae te sɛ obi a ɔsom Yehowa de, nanso ɔkwan bɛn so na ne nneyɛe ankyerɛ saa? (Num. 23:3, 11-14; 1 Sam. 15:22)

  • Kenkan Numeri 24:1-25.

    Ɔkwan bɛn so na Bible mu asɛm yi ma yenya gyidi kɛse sɛ nea Yehowa abɔ ne tirim biara ɔbɛyɛ? (Num. 24:10; Yes. 54:17)