Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Me Nhoma a Ɛka Bible Mu Nsɛm

Adesua 34: Aduan Foforo

Adesua 34: Aduan Foforo

WUBETUMI akyerɛ ade a nkurɔfo no retase wɔ fam hɔ no? Ɛte sɛ fam bosu a akyen. Ɛyɛ fitaa, ntrantraa. Nanso ɛnyɛ bosu a akyen ankasa; ɛyɛ biribi a wodi.

Israelfo retase mana

Na bɛyɛ ɔsram biako pɛ ni fi bere a Israelfo fii Misraim. Wɔwɔ sare so. Aduan titiriw biara nni ha, enti nkurɔfo no fii ase nwiinwii sɛ: ‘Yɛn yam a anka Yehowa kunkum yɛn wɔ Misraim mmom. Anyɛ yiye koraa no ɛhɔ de na yɛwɔ aduan a yɛpɛ nyinaa.’

Enti Yehowa kae sɛ: ‘Mɛma aduan fi soro atɔ ama mo.’ Na eyi na Yehowa yɛe. Ade kyee a Israelfo no huu saa ade fitaa a atɔ yi, wobisabisaa wɔn ho sɛ: ‘Ɛdɛn ni?’

Mose kae sɛ: ‘Eyi ne aduan a Yehowa de ama mo sɛ munni.’ Nkurɔfo no frɛɛ no MANA. Na ne dɛ te sɛ tetare a ɛwo wom.

Mose ka kyerɛɛ nkurɔfo no sɛ: ‘Montase nea onipa biako betumi adi.’ Enti anɔpa biara wɔyɛɛ eyi. Na sɛ owia no bɔ a, mana a aka fam hɔ no nan.

Mose kae nso sɛ: ‘Ɛnsɛ sɛ obiara de mana no bi sie ma ade kyẽ so.’ Nanso ebinom antie. Wunim nea ɛbae? Ade kyee no, na mana a wɔde asie no adɔ mmoa, na efii ase bɔnee!

Nanso dapɛn no mu da koro wɔ hɔ a Yehowa ka kyerɛɛ nkurɔfo no sɛ wɔntase mana no mmɔho. Eyi ne da a ɛto so asia no. Na Yehowa kae sɛ wɔmfa bi nsie mma da a edi hɔ no, efisɛ ɔremma ebi ntɔ da a ɛto so ason no. Na sɛ wɔde sie ma da a ɛto so ason no a, ɛnnɔ mmoa na ɛmmɔn! Eyi yɛ anwonwade foforo!

Mfe a na Israelfo wɔ sare no so nyinaa mu no, Yehowa maa wɔn mana.

Exodus 16:1-36; Numeri 11:7-9; Yosua 5:10-12.



Nsɛmmisa

  • Sɛ wohwɛ mfonini no a, dɛn na nkurɔfo no retase wɔ fam hɔ no, na wɔfrɛ no dɛn?
  • Akwankyerɛ bɛn na Mose de maa nkurɔfo no fa mana a na wɔbɛtase no ho?
  • Yehowa kae sɛ da a ɛto so asia no nkurɔfo no nyɛ dɛn, na dɛn nti na ɔkaa saa?
  • Anwonwade bɛn na Yehowa yɛe bere a wɔde mana no bi sie maa da a ɛto so ason no?
  • Yehowa maa nkurɔfo no mana kosii bere bɛn?

Nsɛmmisa foforo

  • Kenkan Exodus 16:1-36 ne Numeri 11:7-9.

    Dɛn na ɛwɔ Exodus 16:8 a ɛkyerɛ sɛ ɛsɛ sɛ yɛde obu ma wɔn a Onyankopɔn apaw wɔn wɔ Kristofo asafo no mu no? (Heb. 13:17)

    Bere a Israelfo no nam sare so no, ɔkwan bɛn so na Yehowa kaee wɔn da biara sɛ ɔno na ɔhwɛ wɔn? (Ex. 16:14-16, 35; Deut. 8:2, 3)

    Yesu kyerɛe sɛ mana no yɛ dɛn ho sɛnkyerɛnne, na yɛyɛ dɛn nya ‘abodoo a efi soro’ no so mfaso? (Yoh. 6:31-35, 40)

  • Kenkan Yosua 5:10-12.

    Mfe dodow ahe na Israelfo no dii mana; ɔkwan bɛn so na ɛsɔɔ wɔn hwɛe, na dɛn na yebetumi asua afi asɛm yi mu? (Ex. 16:35; Num. 11:4-6; 1 Kor. 10:10, 11)