Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Me Nhoma a Ɛka Bible Mu Nsɛm

Adesua 43: Yosua Bɛyɛ Kannifo

Adesua 43: Yosua Bɛyɛ Kannifo

MOSE pɛe sɛ ɔne Israelfo no kɔ Kanaan. Enti ɔsrɛe sɛ: ‘Yehowa, ma mintwa Yordan Asubɔnten no, na minkohu asase pa no.’ Nanso Yehowa kae sɛ: ‘Ayɛ yiye! Mmɔ eyi so bio!’ Wunim nea enti a Yehowa kae saa?

Ɛyɛ nea ɛbae bere a Mose de poma bɔɔ ɔbotan no nti. Kae sɛ ɔne Aaron anhyɛ Yehowa anuonyam. Wɔanka ankyerɛ nkurɔfo no sɛ Yehowa na ɔbɛma wɔn nsu afi ɔbotan no mu. Ne saa nti Yehowa kae sɛ ɔremma wɔnkɔ Kanaan asase no so.

Aaron wui no akyi asram kakra no, Yehowa ka kyerɛɛ Mose sɛ: ‘Fa Yosua gyina Eleasar ne ɔman no nyinaa anim. Na wɔn nyinaa anim no ka kyerɛ obiara sɛ Yosua ne wɔn kannifo foforo.’ Mose yɛɛ nea Yehowa kae no ara, sɛnea wuhu wɔ mfonini no mu no.

Mose de Yosua rekyerɛ sɛ ɔbɛyɛ ɔkannifo

Afei Yehowa ka kyerɛɛ Yosua sɛ: ‘Yɛ den, na nsuro. Wubedi Israel anim akɔ Kanaan asase a mede ahyɛ wɔn bɔ no so, na mɛka wo ho.’

Akyiri yi Yehowa ka kyerɛɛ Mose sɛ ɔmforo nkɔ Bepɔw Nebo so wɔ Moab asase so. Ná Mose betumi afi hɔ ahu Kanaan asase fɛfɛ no wɔ Yordan Asubɔnten no agya. Yehowa kae sɛ: ‘Eyi ne asase a mehyɛɛ bɔ sɛ mede mɛma Abraham, Isak ne Yakob asefo no. Mama woahu, na meremma wonkɔ so.’

Mose wui wɔ Bepɔw Nebo so. Ná wadi mfe 120. Ná ɔda so wɔ ahoɔden, na na n’ani tumi hu ade yiye. Nkurɔfo no werɛ howee na wosui esiane Mose wu no nti. Nanso wɔn ani gyei sɛ Yosua bɛyɛɛ wɔn kannifo foforo.

Numeri 27:12-23; Deuteronomium 3:23-29; 31:1-8, 14-23; 32:45-52; 34:1-12.



Nsɛmmisa

  • Sɛ wohwɛ mfonini no a, mmarima baanu bɛn na wɔne Mose gyina hɔ no?
  • Asɛm bɛn na Yehowa ka kyerɛɛ Yosua?
  • Ɛyɛɛ dɛn na Mose foro kɔɔ Bepɔw Nebo so, na dɛn na Yehowa ka kyerɛɛ no?
  • Mose dii mfe ahe ansa na ɔrewu?
  • Adɛn nti na nkurɔfo no werɛ howee, nanso dɛn na ɛmaa wɔn ani gyei?

Nsɛmmisa foforo

  • Kenkan Numeri 27:12-23.

    Dwumadi kɛse bɛn na Yehowa de hyɛɛ Yosua nsa, na dɛn na Yehowa yɛ de kyerɛ sɛ ɔdwene ne nkurɔfo ho nnɛ? (Num. 27:15-19; Aso. 20:28; Heb. 13:7)

  • Kenkan Deuteronomium 3:23-29.

    Ɛyɛɛ dɛn na Yehowa amma Mose ne Aaron antwa Yordan no ankɔ bɔhyɛ asase no so, na dɛn na yebetumi asua afi mu? (Deut. 3:25-27; Num. 20:12, 13)

  • Kenkan Deuteronomium 31:1-8, 14-23.

    Ɔkwan bɛn so na nsɛm a Mose ne Israelfo de dii nkra no da no adi sɛ ɔde ahobrɛase gyee asotwe a Yehowa de maa no no toom? (Deut. 31:6-8, 23)

  • Kenkan Deuteronomium 32:45-52.

    Ɛsɛ sɛ Onyankopɔn Asɛm ka yɛn abrabɔ wɔ kwan bɛn so? (Deut. 32:47; Lev. 18:5; Heb. 4:12)

  • Kenkan Deuteronomium 34:1-12.

    Dɛn na Deuteronomium 34:10 ka de fa Yehowa ne Mose ntam ayɔnkofa ho ɛwom sɛ wamfa n’ani anhu Yehowa ankasa no? (Ex. 33:11, 20; Num. 12:8)