Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Me Nhoma a Ɛka Bible Mu Nsɛm

Adesua 20: Asɛm to Dina

Adesua 20: Asɛm to Dina

WUHU wɔn a Dina rekɔsra wɔn no? Ɔrekɔ mmea a wɔwɔ Kanaan asase so no binom nkyɛn. So ne papa Yakob ani begye ho? Sɛnea ɛbɛyɛ na woatumi abua asɛm yi no, bɔ mmɔden sɛ wobɛkae nea na Abraham ne Isak susuw wɔ Kanaanfo mmea ho.

Dina rekɔsra Kanaanfo mmabea no

So Abraham pɛe sɛ ne ba Isak ware Kanaan babea? Dabi. So na Isak ne Rebeka pɛ sɛ wɔn ba Yakob ware Kanaan babea? Dabi. Wunim nea enti?

Efisɛ na Kanaanfo yi som abosom. Na wɔnyɛ nnipa pa a ɛsɛ sɛ wɔne wɔn tra sɛ okununom anaa yerenom, na na wɔnyɛ nnipa a ɛsɛ sɛ wɔne wɔn bɔ sɛ nnamfo. Enti yebetumi ahu sɛ na Yakob ani rennye sɛ ne babea ne Kanaan mmabea yi refa yɔnko.

Na ampa nso asɛm too Dina. Wuhu Kanaanni barima a ɔwɔ mfonini no mu a ɔrehwɛ Dina no? Wɔfrɛ no Sekem. Da koro a Dina baa ha no, Sekem kyeree Dina na ɔhyɛɛ no ne no dae. Na eyi yɛ bɔne. Efisɛ awarefo nkutoo na ɛsɛ sɛ wɔne wɔn ho da. Saa bɔne a Sekem yɛɛ Dina no de ɔhaw pii bae.

Bere a Dina nuanom tee nea aba no, wɔn bo fuwii kɛse. Wɔn mu baanu, Simeon ne Lewi, bo fuwii araa ma wɔfaa nkrante kɔɔ kurow no mu kopuee mmarima no so mpofirim. Wɔne wɔn nuanom kokum Sekem ne mmarima a aka no nyinaa. Yakob bo fuwii sɛ ne mma no yɛɛ adebɔne a ɛte saa.

Ɛyɛɛ dɛn na saa bɔne yi nyinaa fii ase? Efisɛ Dina ne nnipa a wonni Onyankopɔn mmara so yɛɛ nnamfo. Yɛrempɛ sɛ yɛfa nnamfo bi a wɔte saa, ɛnte saa anaa?

Genesis 34:1-31.



Nsɛmmisa

  • Adɛn nti na Abraham ne Isak ampɛ sɛ wɔn mma ware Kanaanfo?
  • So Yakob ani gyee ho sɛ ne babea ne Kanaanfo mmabea bɛfa nnamfo?
  • Ɔbarima bɛn na ɔrehwɛ Dina wɔ mfonini no mu no, na adebɔne bɛn na ɔyɛe?
  • Bere a Dina nuanom Simeon ne Lewi tee nea aba no, dɛn na wɔyɛe?
  • So Yakob ani gyee ade a Simeon ne Lewi yɛe yi ho?
  • Ɛyɛɛ dɛn na abusua no mu haw nyinaa fii ase?

Nsɛmmisa foforo

  • Kenkan Genesis 34:1-31.

    Da koro pɛ na Dina kɔɔ Kanaanfo mmabea no nkyɛn anaa? Kyerɛkyerɛ mu. (Gen. 34:1, NW)

    Adɛn nti na yebetumi aka sɛ Dina ka ho bi na ɔhweree ne baabunyɛ? (Gal. 6:7)

    Ɔkwan bɛn so na mmabun a wɔwɔ hɔ nnɛ betumi akyerɛ sɛ wɔasua biribi afi Dina kɔkɔbɔ nhwɛso no mu? (Mmeb. 13:20; 1 Kor. 15:33; 1 Yoh. 5:19)